এতিয়া প্ৰায় সকলো খাদ্যতে ভেজালেই ভেজাল।
মিঠাতেল, শাক-পাচলি,গাখীৰ ফল-মূল সকলোতে কেৱল ভেজালেই ভেজাল।
ভেজাল খাদ্য গ্ৰহণ কৰি মানুহে এতিয়া নানা ৰোগ দেহত চপাই ল’বলগীয়া হৈছে।তথাপি ভেজাল হ’লেও খাদ্য নোখোৱাকৈও থাকিব নোৱাৰি।
তথাপি কিছুমান প্ৰায়ে ব্যৱহাৰ কৰি অহা খাদ্য আপুনি ঘৰতে ভেজাল নে ভাল সেয়া পৰীক্ষা কৰি চাব পাৰে।
ইয়াৰ বাবে আপোনাক বিশেষ কোনো পৰীক্ষাগাৰৰো প্ৰয়োজন নহব।
Consumer Guidence Society of India ৰ অধ্যক্ষ সীতাৰাম দিক্ষীতে এই ক্ষেত্ৰত আপোনালৈ আগবঢ়াইছে কেইটামান সাধাৰণ কিটিপ—
হালধিৰ ভেজালকৰণ কিদৰে ধৰিব:
প্ৰতিদিনে প্ৰয়োজন হোৱা হালধিৰ ৰং উজ্জ্বল কৰিবলৈ Metanil Yellow নামৰ ক্ষতিকাৰ ৰাসায়নিক পদাৰ্থ বিধ মিহলি কৰা হয়।
এনে পদাৰ্থই নানা ৰোগৰ লগতে কেঞ্চাৰৰো সৃষ্টি কৰিব পাৰে।
হালধিত কৰা এনে ভেজাল ধৰিবলৈ আপুনি অলু কুহুমীয়া গৰম পানীত আধা চামুচ হালধি গুৰি পেলাই দিয়ক।
তাৰ পিছত তাত কেইটোপাল মান বজাৰত সহজে কিনিবলৈ পোৱা হাইড্ৰ’ক্ল’ৰিক এচিড বা আন যিকোনো এচিড পেলাই দিয়ক।
যদি পানীৰ ৰং গুলপীয়া বা ঈষৎ ৰঙা হৈছে তেন্তে বুজিব হালধিত ভেজাল আছে।
গ্ৰীণ চিলি,গাজৰত ভেজালকৰণ:
গ্ৰীণ চিলি,গাজৰ আদিৰ ৰং চকুত লগাকৈ উজ্জ্বল কৰিবলৈ Malachite Green নামৰ পদাৰ্থ মিহলোৱা হয়।
এই পদাৰ্থৰ উপস্থিতি ধৰিবলৈ চিলি বা গাজৰৰ এটা সৰু চুকুৰা লৈ সেয়া অলপ তিতি থকা ব্লটিং পেপাৰত কিছুসময় থৈ দিয়ক। যদি ভেজাল আছে তেন্তে ব্লটিং পেপাৰত দাগ বহিব।
সৰিয়হত কৰা ভেজাল:
বিভিন্ন খাদ্যত আমি গোটা সৰিয়হ ব্যৱহাৰ কৰো।গোটা সৰিয়হত Argemone seeds মিহলাই ভেজাল কৰা হয়।
ই অতি মাৰাত্মক।
এই গুটিয়ে মানুহক অন্ধ পৰ্যন্ত কৰি দিব পাৰে।ই ড্ৰপছি ৰোগৰ সৃষ্টি কৰে।
সেয়া সৰিয়হত ভেজাল ধৰিবলৈ আপুনি কেইটামান সৰিয়হ গুটি আঙুলিৰে হেঁচা দি ভাঙি দিয়ক।যদি গুটিৰ ভিতৰখন হালধীয়া তেন্তে সেয়া সঁচাকৈয়ে সৰিয়হ, যদি ভিতৰ খন বগা তেন্তে সেয়া Argemone seeds বুলি নিশ্চিত হ’ব পাৰে।
Argemone seeds ৰ ভিতৰ খন বগা হয়।
আইচক্ৰীমত মিহলোৱা হয় Washing powder:
আইচক্ৰীমৰ ৰং উজ্জ্বল কৰিবলৈ ইয়াত Washing powder মিহলোৱা হয়।
ফলত মানুহে যকৃতৰ ৰোগৰ লগতে কেঞ্চাৰতো আক্ৰান্ত হোৱাৰ ভয় থাকে।
আইচক্ৰীমৰ ভেজাল ধৰিবলৈ আপুনি কেইটোপাল মান নেমুৰ ৰস আইচক্ৰীমত পেলাই দিয়ক যদি বুৰবুৰণি উঠে বুজিব তাত Washing powder মিহলোৱা আছে।