তৃণমূল কংগ্ৰেছৰ আভ্যন্তৰীণ সংকট ক্ৰমাগতভাৱে গভীৰ হৈ পৰিছে। এজনৰ পিছত এজন সাংসদে দলৰ পৰা পদত্যাগ কৰিছে। ১০ জুনত দলৰ ৰাজ্যসভাৰ সাংসদ সুস্মিতা দেৱেও উচ্চ সদনৰ পৰা পদত্যাগ কৰে। দলটোৰ বৰ্ধিত আভ্যন্তৰীণ খেলিমেলিৰ মাজতে এসপ্তাহৰ ভিতৰত এয়া দ্বিতীয়টো পদত্যাগৰ ঘটনা। শিলচৰৰ প্ৰাক্তন কংগ্ৰেছী লোকসভা সাংসদ সুস্মিতা দেৱে ২০১৯ চনৰ নিৰ্বাচনত পৰাজিত হোৱাৰ পিছত ২০২১ চনত তৃণমূল কংগ্ৰেছত যোগদান কৰিছিল। পৰৱৰ্তী সময়ত তেওঁ দলৰ ৰাষ্ট্ৰীয় মুখপাত্ৰ হিচাপে গুৰুত্বপূৰ্ণ দায়িত্ব পালন কৰাৰ লগতে ৰাজ্যসভালৈকো নিৰ্বাচিত হৈছিল।
সুস্মিতা দেৱৰ এই পদত্যাগৰ কেইদিনমান পূৰ্বে তৃণমূল কংগ্ৰেছৰ জ্যেষ্ঠ নেতা তথা ৰাজ্যসভাৰ সাংসদ সুখেন্দু শেখৰ ৰায়েও উচ্চ সদন আৰু দল ত্যাগ কৰিছিল। ৰায়ে দলীয় কাম-কাজত দুৰ্নীতি, প্ৰশাসনীয় ব্যৰ্থতা আৰু ক্ৰমৱৰ্ধমান জনঅসন্তুষ্টিৰ দোহাই দি পদত্যাগ কৰিছিল।
বাতৰি যুগুতাই থকা সময়ত বিশেষ সূত্ৰৰ পৰা লাভ কৰা খবৰ অনুসৰি সায়নী ঘোষেও তৃণমূল কংগ্ৰেছৰ পৰা পদত্যাগ কৰিছে। জ্যেষ্ঠ নেতাসকলৰ এই ক্ৰমাগত পদত্যাগে মমতা বেনাৰ্জীৰ নেতৃত্বাধীন দলটোৰ ভিতৰচৰাৰ তীব্ৰ মতানৈক্যক পুনৰবাৰ পোহৰলৈ আনিছে। খবৰ অনুসৰি, এই সংকট কেৱল ৰাজ্যিক বিধানসভাতে সীমাবদ্ধ থকা নাই, বৰঞ্চ সংসদলৈকো সম্প্ৰসাৰিত হৈছে আৰু তৃণমূলৰ এটা অংশৰ সাংসদে দলীয় নেতৃত্বৰ প্ৰতি অসন্তুষ্টি প্ৰকাশ কৰিছে।
চলতি সপ্তাহৰ আৰম্ভণিতে দাখিল কৰা নিজৰ পদত্যাগ পত্ৰত সুখেন্দু শেখৰ ৰায়ে অভিযোগ কৰিছিল যে দুৰ্নীতি, শাসন ব্যৱস্থাৰ ব্যৰ্থতা, আইন-শৃংখলাজনিত সমস্যা আৰু মহিলাৰ ওপৰত হোৱা অত্যাচাৰৰ বাবেই জনসাধাৰণে দলটোক প্ৰত্যাখ্যান কৰিছে। ইয়াৰ উপৰি তেওঁ পশ্চিম বংগৰ নৱনিৰ্বাচিত বিজেপি চৰকাৰে ৰাজ্যখনত গ্ৰহণ কৰা উন্নয়নমূলক পদক্ষেপসমূহৰ প্ৰশংসা কৰাও দেখা গৈছিল।
সাম্প্ৰতিক নিৰ্বাচনী বিপৰ্যয় আৰু দলৰ ভিতৰত সৃষ্টি হোৱা অন্তর্দ্বন্দ্বৰ বাবে তৃণমূল কংগ্ৰেছ ইতিমধ্যে এক বৃহৎ ৰাজনৈতিক সংকটৰ মাজেৰে গতি গতি কৰি থকাৰ সময়তে সুস্মিতা দেৱ আৰু সায়নী ঘোষৰ প্ৰস্থানে ৰাজ্যসভাত দলটোৰ শক্তি অধিক দুৰ্বল কৰি তুলিব বুলি ধাৰণা কৰা হৈছে। উল্লেখ্য যে সুস্মিতা দেৱে পদত্যাগ কৰিয়ে অসমৰ মুখ্যমন্ত্ৰীক সাক্ষাৎ কৰা কাৰ্যই বিজেপিত যোগদান কৰাটো প্ৰায় নিশ্চিত কৰি তুলিছে।
প্ৰতিবেদন প্ৰস্তুত কৰাৰ সময়লৈকে তৃণমূল কংগ্ৰেছ নেতৃত্বৰ তৰফৰ পৰা এই পদত্যাগসমূহৰ প্ৰকৃত কাৰণ সন্দৰ্ভত কোনো ধৰণৰ আনুষ্ঠানিক বিবৃতি প্ৰকাশ কৰা হোৱা নাই।
