নিচাজাতীয় সামগ্ৰী বিৰোধী অভিযানত পুনৰ সফলতা অৰ্জন ত্ৰিপুৰা আৰক্ষীৰ। বৃহস্পতিবাৰে পূব আগৰতলা আৰক্ষীয়ে চলোৱা এক অভিযানত নিচাজাতীয় সামগ্ৰী সৰবৰাহৰ লগত জড়িত ৩ জনকৈ লোকৰ লগতে হিৰোইন আৰু ম্যানমাৰত নিৰ্মিত কিছু আপত্তিজনক টেবলেট জব্দ কৰিবলৈ সক্ষম হয়।
‘কালি এক গোপন সূত্ৰৰ পৰা লাভ কৰা তথ্যৰ ভিত্তিত অভিযান চলাই ৰুবালছন দেৱবৰ্মা নামৰ এজন সৰবৰাহকাৰীক আটক কৰিছো। সৰবৰাহকাৰীজনৰ পৰা কিছু পৰিমানৰ হিৰোইন জব্দ হৈছে। পাছত তেওঁ দিয়া স্বীকাৰোক্তিৰ ভিত্তিত গান্ধীগ্ৰামৰ পৰা অন্য দুজন সৰবৰাহকাৰী আটক কৰিছো’। পূব আগৰতলা আৰক্ষী থানাৰ বিষয়া দেবাশীষ সাহাই সাংবাদিকৰ আগত এই কথা উল্লেখ কৰে।
তেওঁ লগতে জানিবলৈ দি কয়, ‘পাছত আটক কৰা লোক দুজন ক্ৰমে বিকাশ চন্দ্ৰ ৰায় আৰু হৰিপদ দাস বুলি চিনাক্ত কৰা হৈছে। আমি তেওঁলোকৰ পৰা ম্যানমাৰত নিৰ্মিত ৪ হেজাৰ নিষিদ্ধ টেবলেট, ৩২ গ্ৰাম ওজনৰ হিৰোইনৰ এটা পেকেট, হিৰোইন ভৰ্তি ৬৫০টা সৰু সৰু কাছৰ বটলৰ লগতে প্ৰায় ৫৭ হেজাৰ টকা জব্দ কৰিছো’।
ইফালে আৰক্ষীয়ে জব্দ কৰা নিচাজাতীয় সামগ্ৰীখিনিৰ বজাৰ মূল্য আনুমানিক ২ লাখ টকা হ’ব বুলি জানিবলৈ দিয়ে।
মোহনপুৰ মহকুমা আৰক্ষী বিষয়া, ভাৰপ্ৰাপ্ত আৰক্ষী বিষয়াৰ লগতে পূব আগৰতলা আৰক্ষী থানাৰ আৰক্ষীৰ সহায়ত বৃহস্পতিবাৰে এই অভিযানটো চলোৱা হৈছিল বুলি জানিব পৰা গৈছে।
উল্লেখ্য যে বিপ্লব কুমাৰ দেব নেতৃত্বাধীন ত্ৰিপুৰা চৰকাৰে ৰাজ্যখনৰ যুৱ প্ৰজন্মক নিচাজাতীয় সামগ্ৰীৰ কৱলৰ পৰা মুক্ত কৰিবলৈ বদ্ধপৰিকৰ। সেয়ে বিগত কিছু দিনৰ পৰা আৰক্ষী প্ৰশাসনে ইয়াৰ বিৰুদ্ধে বিভিন্ন পদক্ষেপ গ্ৰহণ কৰাৰ লগতে সফলতাও অৰ্জন কৰা পৰিলক্ষিত হৈছে।