অৱশেষত বিড়ম্বনা আঁতৰিল! দেশজুৰি বিগত কিছুদিন ধৰি চলি থকা ট্ৰাক চালকসকলৰ প্ৰতিবাদৰ অন্ত পৰিল। সংশোধিত “হিট এণ্ড ৰাণ” আইন সম্পৰ্কত কেন্দ্ৰই আশ্বাস দিয়াৰ পিছতে ট্ৰাক চালকসকলে প্ৰতিবাদ সামৰিলে।
জানিব পৰা মতে, কেন্দ্ৰৰ সৈতে দীঘলীয়া আলোচনা আৰু কেন্দ্ৰীয় গৃহ সচিব অজয় ভাল্লাৰ আশ্বাসৰ অন্তত নিখিল ভাৰত মটৰ পৰিবহণ কংগ্ৰেছে এই প্ৰতিবাদ উঠাই লোৱাৰ কথা ঘোষণা কৰে। আজিৰে পৰা সকলো ট্ৰাক চালকক কাম আৰম্ভ কৰিবলৈ কোৱা হৈছে।
লগতে পঢ়কঃ পৰিয়ালৰ বাধা নামানি গৈছিল ফুৰিবলৈঃ নৱবৰ্ষৰ প্ৰথম দিনাই দুৰ্ঘটনাত প্ৰাণ হেৰুৱালে ৬ যুৱকে
নতুন বছৰৰ আৰম্ভণিৰে পৰা বিভিন্ন ৰাজ্যত ট্ৰাক চালকসকলে প্ৰতিবাদ সাব্যস্ত কৰি আহিছে। ‘হিট এণ্ড ৰান’ৰ ক্ষেত্ৰত সৰ্বোচ্চ শাস্তি ২ বছৰৰ পৰা ১০ বছৰলৈ বৃদ্ধি কৰাৰ বাবে ইয়াৰ প্ৰতিবাদত ট্ৰাক চালকসকলে ৰাজপথলৈ ওলাই আহে। ঘাইপথত ট্ৰাকৰ দীঘলীয়া শাৰী দেখা যায়।
ইপিনে, ট্ৰাক চালকৰ এই প্ৰতিবাদৰ বাবে অত্যাৱশ্যকীয় সামগ্ৰীৰ যোগানো প্ৰভাৱিত হৈছে। পৰিস্থিতিৰ সৈতে মোকাবিলা কৰিবলৈ কেন্দ্ৰীয় চৰকাৰে তৎপৰতা অৱলম্বন কৰে।
কেন্দ্ৰীয় গৃহ সচিব অজয় ভাল্লাই মঙলবাৰে কয়, ‘অল ইণ্ডিয়া মটৰ ট্ৰেন্সপ’ৰ্টৰ প্ৰতিনিধিৰ সৈতে আমি কথা পাতিছো। চৰকাৰে সকলোকে জনাব বিচাৰিছে যে এই নতুন আইনখন এতিয়াও কাৰ্যকৰী হোৱা নাই। ভাৰতীয় দণ্ডবিধিৰ ১০৬/২ ধাৰা কাৰ্যকৰী কৰাৰ পূৰ্বে আমি সৰ্বভাৰতীয় পৰিবহণ কংগ্ৰেছৰ প্ৰতিনিধিৰ সৈতে আলোচনা কৰিম, তাৰ পিছত সিদ্ধান্ত লোৱা হ’ব।”
লগতে পঢ়কঃ জাপানৰ বিমান দুৰ্ঘটনাঃ পাঁচজনৰ মৃত্যু নিশ্চিত কৰিলে কৰ্তৃপক্ষই
আনহাতে, কেন্দ্ৰৰ আশ্বাসৰ পাছত অল ইণ্ডিয়া মটৰ ট্ৰেন্সপ’ৰ্টৰ কোৰ কমিটীৰ অধ্যক্ষ বাল মালকিটেও কয় যে নতুন আইনখন এতিয়াও কাৰ্যকৰী হোৱা নাই। তেওঁলোকৰ সৈতে আলোচনাৰ অন্ততহে সিদ্ধান্ত লোৱা হ’ব। গতিকে তেওঁলোকে প্ৰতিবাদ উঠাই লৈছে।
