দ্বিতীয়বাৰৰ বাবে ৰাষ্ট্ৰপতি হিচাপে কাৰ্যভাৰ গ্ৰহণ কৰাৰ পিছত প্ৰব্ৰজন সন্দৰ্ভত কঠোৰ স্থিতি গ্ৰহণ কৰে ড’নাল্ড ট্ৰাম্পে। কেইবাটাও নিয়ম সলনি কৰি পেলাইছে। কিন্তু হোৱাইট হাউছৰ সন্মুখত হোৱা গুলীচালনাৰ ঘটনাৰ পিছত তেওঁ আৰু কোনো ধৰণৰ ৰেহাই দিব নিবিচাৰে।
ড’নাল্ড ট্ৰাম্পে তৃতীয় বিশ্বৰ কোনো দেশৰ পৰা অহা অনুপ্ৰৱেশকাৰীক আমেৰিকাত প্ৰৱেশ কৰিবলৈ নিদিয়ে। শুকুৰবাৰে পুৱা (ভাৰতীয় সময় অনুসৰি) ট্ৰুথ ছ’চিয়েলত এটা দীঘলীয়া পোষ্টত এই কথা ঘোষণা কৰে ট্ৰাম্পে। তেওঁৰ মতে অনুপ্ৰৱেশকাৰীৰ বাবেই দেশখনে ক্ষতিগ্ৰস্ত হৈছে।
বুধবাৰে মাজনিশা নেশ্যনেল গাৰ্ডৰ সদস্য চাৰা আৰু এণ্ড্ৰুৱে হোৱাইট হাউছৰ পৰা কেইটামান ব্লক দূৰৈত ডাউনটাউনত টহল দি আছিল। হঠাৎ ৰহমানুল্লাহ লাকানৱালা নামৰ এজন আফগান যুৱকে তেওঁলোকৰ ওপৰত গুলীচালনা কৰে। নেচনেল গাৰ্ডৰ সদস্যসকলেও প্ৰত্যুত্তৰ দিয়ে। সংঘৰ্ষ সংঘটিত হয়।
কিন্তু শেষত নেচনেল গাৰ্ডৰ দুজন সদস্য গুৰুতৰভাৱে আহত হৈ ৰাজপথত লুটি খাই পৰে। চিকিৎসালয়ত ভৰ্তি কৰোৱা হয়। ইয়াৰে এজনৰ পুৱা মৃত্যু হয়। এই ঘটনাক লৈ ট্ৰাম্প অতিশয় ক্ষুব্ধ।
গুলীচালনাৰ ঘটনাৰ লগে লগে ট্ৰাম্প প্ৰশাসনে আফগান নাগৰিকৰ অনুপ্ৰৱেশৰ আবেদন অনিৰ্দিষ্টকাললৈ বন্ধ কৰি দিয়ে। আজি তৃতীয় বিশ্বৰ সকলো দেশৰ পৰা অহা অনুপ্ৰৱেশকাৰীক আমেৰিকাত প্ৰৱেশ কৰাত কাৰ্যতঃ নিষেধাজ্ঞা আৰোপ কৰা হৈছে। আজি ট্ৰাম্পে ছ’চিয়েল মিডিয়াত লিখিছে, ‘তৃতীয় বিশ্বৰ সকলো দেশৰ পৰা অনুপ্ৰৱেশ স্থগিত ৰখা হৈছে।’
তেওঁ লিখিছে, ‘ আমি প্ৰযুক্তিগতভাৱে যিমানেই আগবাঢ়ি নাযাও কিয়, অনুপ্ৰৱেশৰ কাৰণে সেই অগ্ৰগতি থমকি ৰৈছে। বহু লোকৰ জীৱনৰ মানদণ্ড ধ্বংস হৈছে।’
বৰ্তমান আমেৰিকাত থকা অনুপ্ৰৱেশকাৰীসকলৰ কি হ’ব? এক কথাত ক’বলৈ গ’লে তেওঁলোকৰ নিশাৰ টোপনি হৰিছে। ট্ৰাম্পে কৈছে, ‘যিসকলে দেশখনক ভাল নাপায় তেওঁলোকে থাকিব নোৱাৰিব।’ তেওঁ লগতে সকীয়াই দিছে যে যিসকল আমেৰিকাৰ নাগৰিক নহয় তেওঁলোকৰ বাবে সকলো সুবিধা আৰু ৰাজসাহায্য বন্ধ কৰা হ’ব। ট্ৰাম্পে কয় যে যিসকল অনুপ্ৰৱেশকাৰী চৰকাৰৰ ওপৰত বোজা, যিয়ে দেশৰ নিৰাপত্তাত ব্যাঘাত জন্মাব পাৰে, তেওঁলোকৰ নাগৰিকত্ব বাতিল কৰা হ’ব বা বিতাড়িত কৰা হ’ব।
ট্ৰাম্পে লগতে কয় যে তেওঁ বাইডেনৰ সময়ৰ “লাখ লাখ অবৈধ অনুপ্ৰৱেশকাৰীৰ অন্ত পেলাবলৈ” দৃঢ়প্ৰতিজ্ঞ। তেওঁ কয় যে আমাৰ লক্ষ্য হৈছে অবৈধ আৰু বিশৃংখল লোকৰ সংখ্যা হ্ৰাস কৰা। পোষ্টটোৰ শেষত আমেৰিকাৰ ৰাষ্ট্ৰপতিগৰাকীয়ে থেংকচগিভিং বাৰ্তাও দিছে। কিন্তু অলপ বেলেগ ধৰণেৰে। ট্ৰাম্পে লিখিছে, “সকলোকে ধন্যবাদ। কিন্তু যিসকলে ঘৃণা কৰে, চুৰি কৰে, হত্যা কৰে তেওঁলোকে ইয়াত বেছি দিন থাকিব নোৱাৰিব।”
