ৰাষ্ট্ৰপতি ড’নাল্ড ট্ৰাম্পৰ আবেদন নাকচ কৰিলে আমেৰিকাৰ উচ্চতম ন্যায়ালয়ে। ফলত তেওঁ মহিলা সাংবাদিক ই জিন কেৰলক ৫০ লাখ ডলাৰ (ভাৰতীয় মুদ্ৰাত প্ৰায় ৪৭ কোটি ৩০ লাখ ৮৮ হাজাৰ টকা) ক্ষতিপূৰণ দিব লাগিব।
সোমবাৰে দেশখনৰ শীৰ্ষ আদালতে ট্ৰাম্পৰ আবেদনৰ শুনানি গ্ৰহণ কৰিবলৈ অস্বীকাৰ কৰে, য’ত তেওঁ যৌন নিৰ্যাতন আৰু মানহানিৰ অভিযোগত কেৰলৰ সপক্ষে দিয়া নিম্ন আদালতৰ ৰায়ক প্ৰত্যাহ্বান জনাইছিল। ফলত ২০২৩ চনত দিয়া ৫০ লাখ ডলাৰৰ ৰায়দান কাৰ্যকৰী হৈ থাকিব।
কেৰলে প্ৰথমবাৰৰ বাবে ২০১৯ চনত ট্ৰাম্পৰ বিৰুদ্ধে মানহানিৰ গোচৰ ৰুজু কৰিছিল।পিছলৈ ২০২২ চনত নিউয়ৰ্কত নতুন আইন কাৰ্যকৰী হোৱাৰ পিছত তেওঁ নতুনকৈ গোচৰ তৰিছিল। সেই আইনৰ জৰিয়তে যৌন নিৰ্যাতনৰ বলি হোৱা লোকসকলেও পুৰণি কাণ্ডৰ বাবে দেৱানী গোচৰ ৰুজু কৰাৰ সুযোগ পায়।
এক অদ্ভুত আইনী পৰিস্থিতিৰ বাবে ২০২২ চনৰ গোচৰটো প্ৰথমে আদালতলৈ গৈছিল। সেই গোচৰত জুৰীয়ে কেৰলৰ সপক্ষে ৰায় দিছিল আৰু ট্ৰাম্পক ৫০ লাখ ডলাৰ ক্ষতিপূৰণ দিবলৈ নিৰ্দেশ দিছিল।
পৰৱৰ্তী সময়ত ২০১৯ চনৰ মানহানি গোচৰৰ বিচাৰ চলিছিল আৰু সেই গোচৰত ট্ৰাম্পৰ বিৰুদ্ধে ৮৩ মিলিয়ন ডলাৰ প্ৰদানৰ ৰায় দিয়া হয়। সুতকে ধৰি কেৰলৰ বাবে ট্ৰাম্পে আদায় দিবলগীয়া মুঠ ধনৰাশি ১০ কোটি ডলাৰতকৈও অধিক বুলি কোৱা হৈছে।
২০২২ চনত কেৰলৰ গোচৰত অভিযোগ কৰা হৈছিল যে ১৯৯০ চনৰ মাজভাগত নিউয়ৰ্কৰ এখন ডিপাৰ্টমেণ্ট ষ্ট’ৰত ট্ৰাম্পে তেওঁক যৌন নিৰ্যাতন চলাইছিল আৰু পিছত এই কাণ্ড অস্বীকাৰ কৰি তেওঁৰ মানহানি কৰিছিল।
ট্ৰাম্পে আৰম্ভণিৰে পৰাই এই অভিযোগ অস্বীকাৰ কৰি আহিছে। তেওঁৰ দাবী যে এই গোচৰৰ ন্যায়াধীশ আমেৰিকাৰ জিলা ন্যায়াধীশ লুইছ কেপলানে বিচাৰ প্ৰক্ৰিয়াত একাধিক ভুল কৰিছে।
ট্ৰাম্পৰ অধিবক্তাই অভিযোগ উত্থাপন কৰে যে ন্যায়াধীশগৰাকীয়ে এনে দুগৰাকী মহিলাৰ সাক্ষ্যৰ অনুমতি দিছিল যিয়ে পূৰ্বে ট্ৰাম্পৰ বিৰুদ্ধে যৌন নিৰ্যাতনৰ অভিযোগ উত্থাপন কৰিছিল। তেওঁলোকে লগতে ২০০৫ চনৰ “এক্সেছ হলিউড” টেপটো জুৰীক দেখুৱাবলৈ দিয়া অনুমতিৰ ওপৰতো প্ৰশ্ন উত্থাপন কৰে।
সেই অডিঅ’ ৰেকৰ্ডিঙত ট্ৰাম্পে মহিলাৰ বিষয়ে আপত্তিজনক মন্তব্য কৰা দেখা গৈছে, যিটো গোচৰৰ প্ৰমাণ হিচাপে দাখিল কৰা হৈছিল।
যোৱা বছৰ আমেৰিকাৰ দ্বিতীয় চাৰ্কিট আপিল আদালতে ৫০ লাখ ডলাৰৰ জুৰীৰ ৰায়ক সমৰ্থন কৰিছিল। আদালতে কয় যে ন্যায়াধীশগৰাকীয়ে কোনো ভুল কৰা নাই যাৰ বাবে নতুন বিচাৰৰ প্ৰয়োজন হ’ব।
২০২৫ চনৰ জুন মাহত ট্ৰাম্পে এই গোচৰৰ বিৰুদ্ধে পূৰ্ণ বিচাৰপীঠত আবেদন জনাইছিল যদিও সফলতা লাভ কৰা নাছিল। ইয়াৰ পিছতে তেওঁ উচ্চতম ন্যায়ালয়ত আবেদন জনায়।
ট্ৰাম্পৰ অধিবক্তাই উচ্চতম ন্যায়ালয়ত যুক্তি দিছিল যে এগৰাকী কাৰ্যবাহী ৰাষ্ট্ৰপতিক পুৰণি অভিযোগৰ বিৰুদ্ধে যুঁজিবলৈ ৰাষ্ট্ৰীয় কৰ্তব্যৰ পৰা মনোযোগ আঁতৰাবলৈ বাধ্য কৰা হৈছে আৰু ই ৰাষ্ট্ৰপতি পদৰ বাবে ক্ষতিকাৰক।
কিন্তু কেৰলৰ অধিবক্তাই যুক্তি দিছিল যে দ্বিতীয় চাৰ্কিট আদালতৰ সিদ্ধান্ত শুদ্ধ আছিল আৰু জুৰীয়ে পৰ্যাপ্ত প্ৰমাণৰ ভিত্তিতে ৰায়দান কৰিছিল।
জুৰীৰ ৰায়দানৰ পিছত ২০২৩ চনত ট্ৰাম্পে আদালতৰ নিয়ন্ত্ৰিত একাউণ্টত ৫৫ লাখ ডলাৰ জমা দিছিল।ফলস্বৰূপে কেৰলে তুলনামূলকভাৱে সোনকালে এই ধন লাভ কৰাৰ সম্ভাৱনা আছে।
ইফালে, ট্ৰাম্পৰ বিৰুদ্ধে ৮৩ মিলিয়ন ডলাৰৰ ৰায়দানক এতিয়াও উচ্চতম ন্যায়ালয়ত প্ৰত্যাহ্বান জনোৱাৰ সুযোগ আছে। জানিব পৰা মতে, ট্ৰাম্পৰ অধিবক্তাই সেই ৰায়ৰ বিৰুদ্ধেও অতি সোনকালে আবেদন কৰিব পাৰে।
