আমেৰিকাত বসবাস কৰা ভাৰতীয় বংশোদ্ভৱসকলৰ মন জয় কৰাৰ বাবে সকলো প্ৰকাৰে চেষ্টা অব্যাহত ৰাখিছে ৰাষ্ট্ৰপতি ডোনাল্ড ট্ৰাম্পে।
বৰ্তমান ইয়াৰ আঁৰত এটা কাৰণ আৰু সেয়া হৈছে আমেৰিকান ভাৰতীয়সকলৰ ভোট লাগে ট্ৰাম্পক।
ডোনাল্ড ট্ৰাম্পে ভাৰতীয় মূলৰ লোকসকলৰ সৈতে তেওঁৰ সম্পৰ্ক সুদৃঢ় কৰিবলৈ যৎপৰোনাস্তি চেষ্টা চলাইছে।
ইয়াৰ লগতে ট্ৰাম্পে ভাৰতৰ প্ৰধান মন্ত্ৰী নৰেন্দ্ৰ মোদীৰ প্ৰশংসাত পঞ্চমুখ হৈ পৰিছে।
হোৱাইট হাউছত অনুষ্ঠিত সংবাদ মেলত ট্ৰাম্পে কয় যে ভাৰতৰ পৰা তেওঁ প্ৰচুৰ সমৰ্থন লাভ কৰিছে। প্ৰধান মন্ত্ৰী মোদীৰো তেওঁৰ প্ৰতি দ্বিধাহীন সমৰ্থন আছে।
তেওঁৰ মতে আমেৰিকাৰ ভাৰতীয়সকলে ট্ৰাম্পকে ভোট দিব।
ৰাজনৈতিক পৰ্যবেক্ষকসকলে ক’ব খোজে যে ট্ৰাম্পৰ বিৰোধী পক্ষৰ উপ-ৰাষ্ট্ৰপতি পদৰ প্ৰাৰ্থী কমলা হেৰিছ ভাৰতীয় মূলৰ হোৱাৰ বাবে আমেৰিকান ভাৰতীয়সকলৰ ভোট হাতৰ পৰা গুচি যাব পাৰে বুলি ট্ৰাম্প শংকিত হৈ পৰিছে।
সেয়েহে, ভাৰতীয় মূলৰ আমেৰিকানসকলৰ সৈতে তেওঁৰ সম্পৰ্ক যে মধুৰ সেইকথা জোৰ কৰি প্ৰকাশ কৰিবলৈ লৈছে।
আনহাতে, ভাৰতীয় মূলৰ আমেৰিকানসকলৰ মাজত নৰেন্দ্ৰ মোদীৰ জনপ্ৰিয়তাক নিজৰ ভোটবেংক শক্তিশালী কৰাৰ স্বাৰ্থত ব্যৱহাৰ কৰাত মনোনিৱেশ কৰিছে ট্ৰাম্পে।
সকলো উদ্দেশ্য সন্মুখত ৰাখিয়ে ট্ৰাম্পে কৈছে, ‘’প্ৰধানমন্ত্ৰী মোদী মোৰ ভাল বন্ধু আৰু তেওঁ বহুত ভাল কাম কৰিছে। যদিও কোনোটোৱে সহজ নহয়, তেওঁ কিন্তু ভাল কাম কৰিছে।‘’
ইয়াতেই ট্ৰাম্প থমকি ৰোৱা নাই। যোৱাবছৰৰ ছেপ্টেম্বৰত হিউষ্টনত অনুষ্ঠিত ‘হাউডি মোদী’ৰ জেৰ টানি ট্ৰাম্পে কয়,’’ আপোনালোকে জানে হিউষ্টনত সেইটো বিশাল অনুষ্ঠান আছিল। মোক প্ৰধান মন্ত্ৰী মোদীয়ে আমন্ত্ৰণ জনাইছিল আৰু সেয়া সঁচাকৈয়ে আছিল অবিশ্বাস্য।‘’
ট্ৰাম্পে লগতে ভাৰতীয়সকলক উদ্দেশ্যি কয়, ‘’আপোনালোকে এগৰাকী মহান নেতা পাইছে আৰু তেওঁ এগৰাকী মহান মানুহ।‘’