উচ্চতম ন্যায়ালয়ে এক গোচৰৰ শুনানিৰ সময়ত ২০২১ চনত সমগ্ৰ দেশত ১৩,০০০ৰো অধিক ছাত্ৰ-ছাত্ৰীয়ে আত্মহত্যা কৰা তথ্য প্ৰকাশ কৰে। এটা দশকতে দুগুণে বৃদ্ধি পাইছে ছাত্ৰ-ছাত্ৰীৰ আত্মহত্যাৰ ঘটনা। ইফালে ২০২১ চনত ১০,২৮১ জন কৃষকে আত্মহত্যা কৰিছিল। যিটো তুলনামূলকভাবে শিক্ষাৰ্থীৰ আত্মহত্যাৰ সংখ্যা বেছি।
এই ঘটনাৰ পটভূমিত, উচ্চতম ন্যায়ালয়ে দহজনীয়াৰ এক ৰাষ্ট্ৰীয় টাস্ক ফ’ৰ্চ গঠন কৰিছে। এই টাস্ক ফ’ৰ্চে উচ্চ শিক্ষানুষ্ঠানত অধ্যয়ন কৰা ছাত্ৰ-ছাত্ৰীৰ মানসিক স্বাস্থ্য আৰু আত্মহত্যাৰ বৃদ্ধিৰ হাৰ নিয়ন্ত্ৰণৰ ওপৰত কাম কৰিব বুলি সদৰী কৰিছে।
শুনানিৰ সময়ত আদালতে উল্লেখ কৰিছে যে, ছাত্ৰ-ছাত্রীসকলৰ আত্মহত্যা কেৱল এক বা দুটা প্ৰতিষ্ঠানত সীমাবদ্ধ নহয়। সমগ্ৰ দেশজুৰি শিক্ষাৰ্থীৰ আত্মহত্যাৰ ঘটনা দেখিবলৈ পোৱা গৈছে। উল্লেখ্য যে ২০২৪ চনৰ ১৮ ফেব্ৰুৱাৰীত কেৰেলাৰ ৱায়ানাদৰ এখন কলেজৰ ছাত্ৰ এজনে আত্মহনৰ প্থ বাছি লৈছিল। ২০২৫ চনৰ ১৯ মাৰ্চত গুজৰাটৰ এখন আইন বিশ্ববিদ্যালয়ৰ ছাত্ৰ এজনে আত্মহত্যা কৰিছিল। এই ঘটনাসমূহৰ প্ৰেক্ষিতত, উচ্চতম ন্যায়ালয়ে বিষয়টো গভীৰভাৱে অনুসন্ধান কৰিবলৈ টাস্ক ফ’ৰ্চ গঠন কৰিছে।
উল্লেখ্য যে আইআইটি দিল্লীৰ দুজন ছাত্ৰৰ মৃত্যুৰ ঘটনাৰ সৈতে জড়িত গোচৰটোত পৰিয়ালৰ অভিযোগ আৰু প্ৰতিষ্ঠানৰ ভিতৰত জাতিগত বৈষম্যৰ বাবে সৃষ্ট বিতৰ্কৰ পৰিপ্ৰেক্ষিতত এই টাস্ক ফ’ৰ্চ গঠন কৰা বুলি সদৰী কৰিছে।
