ক্ৰীড়া ভাৰতীৰ নগাঁও জিলা সমিতিৰ উদ্যোগত তথা “টাগ অব ৱাৰ” নগাঁও সমিতিৰ সহযোগত চামগুৰি উচ্চতৰ মাধ্যমিক বিদ্যালয়ৰ খেল পথাৰত সোমবাৰে দিনজোৰাকৈ অনুষ্ঠিত হয় ৯তম সদৌ অসম আন্তঃজিলা ৰচী টনা প্ৰতিযোগিতা।
প্ৰায় এঘাৰখন জিলাৰ পৰা অহা পুৰুষ-মহিলাৰ কেইবাটাও দলে অংশগ্ৰহণ কৰে এই ৰচী টনা প্ৰতিযোগিতা খনত।
বিধায়ক ৰাজেন বৰঠাকুৰৰ প্ৰতচ্ছবিৰ সন্মুখত বন্তি প্ৰজ্বলন কৰি শ্ৰদ্ধাঞ্জলি জ্ঞাপন কৰাৰ পিছতেই ক্ৰীড়া ভাৰতীৰ পতাকা উত্তোলন কৰে কলিয়াবৰ জিলা বিজেপিৰ সভাপতি অনিল শইকীয়াই। লগতে জ্যেষ্ঠ উদ্যোক্তা সকলেও নিজ-নিজ সন্থাৰ পতাকা উত্তোলন কৰা দেখা যায়।
ইয়াৰ পিছতেই জিলা বিজেপিৰ সভাপতি গৰাকীয়ে আনুষ্ঠানিকভাৱে প্ৰতিযোগিতা খনিৰ শুভাৰাম্ভ কৰে।
ভাৰতৰ এক পৰম্পৰাগত খেল ৰূপে পৰিচিত ৰচী টনা খেলে আন্তৰ্জাতিক পৰ্য্যায়তো সম্প্ৰতি গুৰুত্ব আৰোপ কৰিবলৈ সক্ষম হোৱাৰ সমান্তৰালভাৱে এই প্ৰতিযোগিতা খনৰ জৰিয়তে ৰাষ্ট্ৰীয় পৰ্য্যায়ৰ ৰচী টনা খেলৰ বাবে অসমৰ খেলুৱৈ সকলেও যোগ্যতা অৰ্জন কৰিব বুলি আশাবাদী উদ্যোক্তা সকল।
ইফালে অতি উদ্বেগজনক ভাবে কলিয়াবৰ জিলা বিজেপিৰ সভাপতি গৰাকীয়ে জোতা পিন্ধিয়েই ক্ৰীড়া ভাৰতীৰ পতাকা উত্তোলন কৰাক লৈ প্ৰতিক্ৰিয়াৰ সৃষ্টি হৈছে।
