এজন ১৩ বছৰীয়া ছাত্ৰক বিয়া পাতি চৰ্চালৈ আহিছে এগৰাকী টিউচন শিক্ষয়িত্ৰী।
পাঞ্জাৱৰ জলন্ধৰৰ বস্তি বেৱা খেল নামৰ অঞ্চলত সংঘটিত হৈছে এই আজৱ ঘটনা।
শিক্ষয়িত্ৰীগৰাকীয়ে ছাত্ৰজনক বিয়া পতাৰ কাৰণটো হৈছে তেওঁৰ জন্ম কুণ্ডলীত থকা ‘মাংগলিক দোষ’সমূহৰ ৰক্ষা পোৱা।
আৰক্ষীয়ে কোৱা মতে, শিক্ষয়িত্ৰীগৰাকীৰ পৰিয়ালক এটা মন্দিৰৰ পুজাৰীয়ে জনাইছিল তেওঁৰ ‘মাংগলিক দোষ’ৰ বাবে বিয়া-বাৰু এতিয়ালৈকে হোৱা নাই।
তদুপৰি যাজকজনে কৈছিল যে এটা সৰু ল’ৰাৰ স’তে তেওঁৰ প্ৰতীকী বিবাহ সম্পন্ন কৰিলে এই ‘দোষ’ৰ পৰা হাত সাৰিব পাৰিব।
সেই অনুসৰি ১৩ বছৰীয়া ছাত্ৰজনক দৰা সজা হ’ল।
টিউচন শিক্ষয়িত্ৰীগৰাকীয়ে ছাত্ৰজনৰ পৰিয়ালক কৈছিল যে টিউচন ক্লাচৰ বাবে ছাত্ৰজন এসপ্তাহৰ বাবে তেওঁৰ ঘৰত থাকিবলৈ দিব লাগে।
কিন্তু ছাত্ৰজন যেতিয়া এসপ্তাহৰ পাছত ঘৰলৈ যায়, তেতিয়াহে আচল ঘটনাটো মুকলি হয়।
ঘৰলৈ গৈ ছাত্ৰজনে সকলো কথা কৈ দিয়ে।
তাৰপাছত ছাত্ৰজনৰ অভিভাৱকে আৰক্ষীক ঘটনাটো অৱগত কৰে।
অভিযোগপত্ৰত কোৱা হৈছে যে শিক্ষয়িত্ৰী আৰু শিক্ষয়িত্ৰীগৰাকীৰ পৰিয়ালবৰ্গই জোৰ কৰি ছাত্ৰজনক হালধি-মেহেন্দী সানি পৰম্পৰা অনুযায়ী বৈবাহিক কাৰ্য সমাপ্ত কৰিছিল।
তাৰ পাছত ফুলশয্যাতো ছাত্ৰজনক জোৰ কৰি শিক্ষয়িত্ৰীগৰাকীৰ স’তে শোওৱা হৈছিল।
পাছদিনাখনেই শিক্ষয়িত্ৰীগৰাকীক হাতৰ খাৰু ভাঙি তেওঁক বিধৱা বুলি ঘোষণা কৰা হৈছিল।
বিধৱা ঘোষণা কৰাৰ পাছত পৰিয়ালবৰ্গই পৰম্পৰা অনুযায়ী এখন শোকসভা অনুষ্ঠিত কৰিছিল।
তদুপৰি অভিযোগপত্ৰখনত কোৱা হৈছে যে পৰম্পৰা অনুযায়ী ছাত্ৰজনে কিছুমান সাংসাৰিক কামো কৰিব লগা হৈছিল।
আৰক্ষীয়ে অভিযোগপত্ৰখন গ্ৰহণ কৰাৰ পাছতে শিক্ষয়িত্ৰীগৰাকী গৈ আৰক্ষী থানাত উপস্থিত হয় আৰু বিষয়টো মিত-মাত কৰিবলৈ চেষ্টা কৰে।
তদুপৰি অভিযোগপত্ৰখন উঠাই ল’বলৈ তেওঁ ছাত্ৰজনৰ পৰিয়ালবৰ্গক জোৰ কৰে।
আৰক্ষীয়ে জনোৱামতে, অভিযোগপত্ৰখন দুই পক্ষৰ বুজা-বুজি মতে পাছত উঠাই লোৱা হয়।
আনহাতে, জ্যেষ্ঠ আৰক্ষী বিষয়াসকলে বিষয়টোক গুৰুত্তৰ হিচাপে বিবেচনা কৰি এই সংক্ৰান্তত এটা অনুসন্ধানৰ দাবী কৰে।
জলন্ধৰৰ ডি.এছ.পি. গুৰমীত সিঙে কয় যে বিষয়টোৰ সন্দৰ্ভত বৰ্তমান অনুসন্ধান চলাই থকা আছে যিহেতু ই এটা বেআইনী বিষয়।
অৱশ্যে এতিয়ালৈকে অভিযুক্ত শিক্ষয়িত্ৰীগৰাকী আৰু তেওঁৰ পৰিয়ালবৰ্গৰ বিৰুদ্ধে কোনোধৰণৰ ব্যৱস্থা লোৱা হোৱা নাই।
