ইজৰাইলৰ আক্ৰমণত, গাজাত হোৱা গণহত্যাৰ অভিযোগত ইজৰাইলৰ প্ৰধানমন্ত্ৰী বেঞ্জামিন নেতান্যাহু আৰু তেওঁৰ চৰকাৰৰ উচ্চপদস্থ বিষয়াসকলৰ বিৰুদ্ধে তুৰস্কই শুকুৰবাৰে গ্ৰেপ্তাৰী পৰোৱান জাৰি কৰাৰ কথা ঘোষণা কৰে। তুৰস্কৰ এই ঘোষণাই দুয়োখন দেশৰ মাজত উত্তেজনা আৰু বৃদ্ধি কৰিছে।
ইস্তানবুলৰ প্ৰচিকিউটৰ অফিচে এক বিবৃতিত জনায় যে যদিও সম্পূৰ্ণ তালিকা প্ৰদান কৰা হোৱা নাই, মুঠ ৩৭ জন সন্দেহযুক্ত লোকৰ বিৰুদ্ধে গ্ৰেপ্তাৰী পৰোৱানা জাৰি কৰা হৈছে। এই তালিকাত নেতান্যাহুৰ উপৰিও ইজৰাইলৰ প্ৰতিৰক্ষা মন্ত্ৰী ইজৰাইল কাটজ, ৰাষ্ট্ৰীয় নিৰাপত্তা মন্ত্ৰী ইটামাৰ বেন গ্ভিৰ আৰু সেনা প্ৰধান লেফটেনেণ্ট জেনেৰেল আয়েল জমিৰৰ নামো অন্তৰ্ভুক্ত আছে।
তুৰস্কৰ এই পদক্ষেপৰ বিৰুদ্ধে ইজৰাইলে তীব্ৰ প্ৰতিক্ৰিয়া প্ৰকাশ কৰিছে। দেশখনৰ বৈদেশিক মন্ত্ৰী গিডিয়ান ছাৰে এক বিবৃতিত কয় যে ইজৰাইলে এই অভিযোগসমূহ দৃঢ়ভাৱে নাকচ কৰে। তেওঁ এই গ্ৰেপ্তাৰী পৰোৱানাক ‘একনায়কত্ববাদী (তুৰ্কীৰ ৰাষ্ট্ৰপতি ৰেচেপ টাইপ) এৰদোগানৰ শেহতীয়া ৰাজনৈতিক চমক বুলি অভিহিত কৰে।
তেওঁ ছ’চিয়েল মিডিয়া প্লেটফৰ্ম এক্সত কয় যে এৰদোগানৰ তুৰস্কত ন্যায়পালিকা বহু দিনৰ পৰা ৰাজনৈতিক বিৰোধীক নীৰৱ কৰাৰ অস্ত্ৰ হৈ পৰিছে আৰু শেহতীয়াকৈ ইস্তানবুলৰ মেয়ৰ একৰেম ইমামোগ্লুক এৰদোগানৰ বিৰুদ্ধে নিৰ্বাচনত অৱতীৰ্ণ হোৱাৰ বাবে গ্ৰেপ্তাৰ কৰা হৈছিল।
তুৰস্কই ইজৰাইলৰ বিষয়াসকলৰ বিৰুদ্ধে ‘গণহত্যা আৰু মানৱতাৰ বিৰুদ্ধে অপৰাধ’ৰ অভিযোগ উত্থাপন কৰিছে। তেওঁলোকে দাবী কৰিছে যে ইজৰাইলে গাজাত ‘প্ৰণালীবদ্ধভাৱে’ এই অপৰাধমূলক কাৰ্য সংঘটিত কৰি আহিছে। ইয়াৰ ইজৰাইলে বোমা বিস্ফোৰণ কৰা ‘তুৰ্কী-পেলেষ্টাইনী ফ্ৰেণ্ডশ্বিপ হাস্পতাল’ৰ ঘটনাও উল্লেখ কৰা হৈছে।
আনহাতে, ইছলামিক উগ্ৰপন্থী সংগঠন হামাছে তুৰস্কৰ এই ঘোষণাক আদৰণি জনাই ইয়াক ‘তুৰ্কীৰ জনসাধাৰণ আৰু তেওঁলোকৰ নেতাসকলৰ আন্তৰিক স্থিতি নিশ্চিত কৰা এক প্ৰশংসনীয় পদক্ষেপ’ বুলি অভিহিত কৰিছে।
তুৰস্কই গাজা যুদ্ধৰ অন্যতম কঠোৰ সমালোচক হিচাপে পূৰ্বেও আন্তঃৰাষ্ট্ৰীয় ন্যায়ালয়ত ইজৰাইলৰ বিৰুদ্ধে গণহত্যাৰ গোচৰত দক্ষিণ আফ্ৰিকাৰ সৈতে যোগদান কৰিছিল।
বৰ্তমান ট্ৰাম্পৰ শান্তি পৰিকল্পনা অনুসৰি যুদ্ধৰ পিছৰ গাজাত ভূমিকা গ্ৰহণ কৰিবলৈ তুৰস্কই আন্তঃৰাষ্ট্ৰীয় স্থিতিশীলতা বাহিনীত অংশগ্ৰহণ কৰিব বিচাৰিছে। কিন্তু ইজৰাইলে তুৰস্কক হামাছৰ অতি ঘনিষ্ঠ বুলি গণ্য কৰি ইয়াৰ ঘোৰ বিৰোধিতা কৰিছে। ইজৰাইলৰ প্ৰাক্তন বৈদেশিক মন্ত্ৰী এভিগডৰ লিবাৰমেনে মন্তব্য কৰে যে এই গ্ৰেপ্তাৰী পৰোৱানে ‘স্পষ্ট হৈ পৰিছে যে তুৰস্ক কিয় গাজা ষ্ট্ৰিপত প্ৰত্যক্ষ বা পৰোক্ষভাৱে উপস্থিত থাকিব নালাগে।
ইজৰাইলে ৰাষ্ট্ৰসংঘকে ধৰি বিভিন্ন পক্ষই উত্থাপন কৰা গণহত্যাৰ অভিযোগক ‘মিছা’ আৰু ‘ইহুদী বিৰোধী’ বুলিও নাকচ কৰিছে। মন কৰিবলগীয়া যে আমেৰিকাৰ ৰাষ্ট্ৰপতি ড’নাল্ড ট্ৰাম্পৰ শান্তি পৰিকল্পনাৰ অধীনত ১০ অক্টোবৰৰ পৰা পেলেষ্টাইন ভূখণ্ডত অস্থায়ী যুদ্ধবিৰতি চলি আছে।
