কাটাৰৰ গেছ উৎপাদন কেন্দ্ৰত ভয়ংকৰ বিস্ফোৰণ; নিহত ১৩ জনৰ ভিতৰত ১২ জনেই ভাৰতীয়

কাটাৰৰ সৰ্ববৃহৎ গেছ উৎপাদন কেন্দ্ৰ ৰাছ লাফান ঔদ্যোগিক চহৰত সংঘটিত এক বৃহৎ বিস্ফোৰণত ১৩ জন লোকৰ মৃত্যু হৈছে। আহত হৈছে কমেও ৬৬জন লোক। জানিব পৰা মতে, নিহত ১৩ জনৰ ভিতৰত ১২ জনেই ভাৰতীয় আৰু আহতসকলৰ ভিতৰতো কেইবাজনো ভাৰতীয়ও আছে। বিস্ফোৰণৰ পিছত কেইবাজনো লোক সন্ধানহীন হোৱাৰ খবৰও পোহৰলৈ আহিছে। এই ঘটনাক লৈ ডোহাত থকা ভাৰতীয় দূতাবাসে উদ্বেগ প্ৰকাশ কৰিছে।

সোমবাৰে সন্ধিয়া কাটাৰৰ ৰাছ লাফান এল এন জি (এল এন জি) কমপ্লেক্সৰ বাৰ্জান গেছ যোগান কেন্দ্ৰত সংঘটিত হয় এই বিস্ফোৰণ। কাটাৰ প্ৰশাসনে দাবী কৰিছে যে এইটো এটা ‘কাৰিকৰী দুৰ্ঘটনা’ আছিল।

কাটাৰৰ শক্তি মন্ত্ৰালয়ে প্ৰকাশ কৰা অনুসৰি এই বিস্ফোৰণত ১৩ জন লোক নিহত হোৱাৰ লগতে ৬৬ জন আহত হয়। ইফালে, দোহাত থকা ভাৰতীয় দূতাবাসে এক বিবৃতিযোগে কয় যে এই ঘটনাত কেইবাজনো লোক আহত হোৱাৰ লগতে কেইবাজনো লোক নিৰুদ্দেশ হোৱা বুলি প্ৰশাসনৰ সূত্ৰই জনাইছে।

ভাৰতীয় দূতাবাসে কয়, “ৰাছ লাফান ঔদ্যোগিক চহৰত সংঘটিত হোৱা দুৰ্ভাগ্যজনক কাণ্ডক লৈ আমি গভীৰ উদ্বেগ প্ৰকাশ কৰিছো। প্ৰশাসনৰ মতে বহু লোক আহত হৈছে।”

বিস্ফোৰণৰ প্ৰভাৱ ইমানেই তীব্ৰ আছিল যে ৰাছ লাফানৰ পৰা ৭০ কিলোমিটাৰতকৈও অধিক দূৰত্বত থকা ৰাজধানী ডোহাৰ বিভিন্ন অঞ্চলত কম্পন অনুভৱ হৈছিল। বহু ঘৰ আৰু অফিচৰ খিৰিকী কঁপি উঠিছিল। সাধাৰণ মানুহৰ মাজত আতংক বিয়পি পৰে।

বিশেষজ্ঞসকলৰ মতে, দীৰ্ঘদিন ধৰি বন্ধ হৈ থকাৰ পিছত এল এন জি উৎপাদন কাৰখানা পুনৰ আৰম্ভ কৰাটো অতি জটিল প্ৰক্ৰিয়া। যন্ত্ৰপাতিবোৰ পৰ্যায়ক্ৰমে ঠাণ্ডা কৰি উৎপাদন আৰম্ভ কৰিব লাগে। সকলো ইউনিট একেলগে আৰম্ভ কৰিলে কাৰিকৰী সমস্যাৰ সৃষ্টি হ’ব পাৰে।

ৰাছ লাফান ঔদ্যোগিক চহৰ কাটাৰৰ শক্তি উদ্যোগৰ কেন্দ্ৰবিন্দু। এই কমপ্লেক্সত বছৰি প্ৰায় ৭৭ মিলিয়ন মেট্ৰিক টন এল এন জি উৎপাদনৰ ক্ষমতা আছে। চলিত বৰ্ষৰ মাৰ্চ মাহত ইৰাণৰ ক্ষেপণাস্ত্ৰ আক্ৰমণত প্ৰকল্পটোৰ দুটা গুৰুত্বপূৰ্ণ গেছ প্ৰচেছিং ইউনিট ক্ষতিগ্ৰস্ত হৈছিল। ফলত কাটাৰৰ মুঠ এল এন জি ৰপ্তানি ক্ষমতাৰ প্ৰায় ১৭ শতাংশ হ্ৰাস পায়।

কাটাৰ এনাৰ্জীয়ে পূৰ্বে কৈছিল যে ক্ষতিগ্ৰস্ত আন্তঃগাঁথনি সম্পূৰ্ণৰূপে মেৰামতি কৰিবলৈ তিনিৰ পৰা পাঁচ বছৰ সময় লাগিব পাৰে। সংঘাতৰ সময়ত স্থল আৰু সাগৰৰ পাৰৰ উৎপাদন কেন্দ্ৰৰ পৰাও প্ৰায় ১০ হাজাৰ শ্ৰমিকক আঁতৰাই অনা হৈছিল।

Ministry of Interior Statement Regarding the Incident that Occurred at a Factory in Ras Laffan Industrial City Due to a Technical Malfunction During Operations.#MOIQatar pic.twitter.com/gLrEByhYH3

— Ministry of Interior – Qatar (@MOI_QatarEn) June 22, 2026

কাটাৰত পশ্চিম এছিয়াৰ অন্যতম বৃহৎ আমেৰিকাৰ সামৰিক ঘাটি আছে। ইৰাণ-ইৰাক সংঘাতৰ সময়ত দেশখনত একাধিক ক্ষেপণাস্ত্ৰ আৰু ড্ৰোন আক্ৰমণৰ লক্ষ্য হৈ পৰিছিল। এটা সময়ত এই সংঘাতৰ বাবে বিশ্বৰ প্ৰায় ২০ শতাংশ এল এন জি যোগান বন্ধ হৈ পৰিছিল। তাৰ পিছৰ পৰাই পৰিস্থিতি ক্ৰমান্বয়ে স্বাভাৱিক অৱস্থালৈ ঘূৰি আহিছে।