ছত্তীশগড়ত দুটা পৃথক সংঘৰ্ষত নিহত ২২ জন মাওবাদী; নিহত ১ জন আৰক্ষী কৰ্মীও
ছত্তীশগড়ৰ বিজাপুৰত মাওবাদী আৰু নিৰাপত্তাৰক্ষীৰ মাজত তুমুল সংঘৰ্ষ ঘটে। দুটা পৃথক এনকাউণ্টাৰত ২২ জন মাওবাদী নিহত হয়। সংঘৰ্ষত এজন আৰক্ষী কৰ্মীৰো মৃত্যু ঘটিছে। বৃহস্পতিবাৰে পুৱা ৭ বজাৰ পৰা বিজাপুৰ আৰু দান্তেৱাড়া জিলাৰ সীমান্তত দুয়োপক্ষৰ মাজত সংঘৰ্ষ আৰম্ভ হয়।
সূত্ৰ অনুসৰি আজি পুৱা গংগালুৰ থানা এলেকাত মাওবাদীৰ বিৰুদ্ধে ছত্তীশগড় আৰক্ষী আৰু কেন্দ্ৰীয় বাহিনীৰ জোৱানে অভিযান আৰম্ভ কৰে। গংগালুৰ আৰক্ষী থানা বিজাপুৰ জিলাত। প্ৰথমৰে পৰাই অঞ্চলটো চাৰিওফালে ঘেৰি লৈ নিশ্চিদ্ৰ তালাচী আৰম্ভ কৰা হয়।
আৰক্ষীক দেখাৰ লগে লগে জংঘলত আত্মগোপন কৰি থকা মাওবাদীয়ে নিৰ্বিচাৰে গুলীচালনা কৰিবলৈ ধৰে। তেওঁলোকৰ গুলীত নিহত হয় ছত্তীশগড় জিলা ৰিজাৰ্ভ গাৰ্ডৰ এজন আৰক্ষী কৰ্মী।
এই পৰ্যন্ত বিজাপুৰ জংঘলৰ পৰা এই সংঘৰ্ষত নিহত ১৮ জন মাওবাদীৰ মৃতদেহ উদ্ধাৰ কৰা হৈছে। মাওবাদীয়ে ব্যৱহাৰ কৰা ৰাইফল আৰু বিস্ফোৰক জব্দ কৰা হৈছে। সংঘৰ্ষ এতিয়াও বন্ধ হোৱা নাই। ইপিনে, কাংকেৰ বনাঞ্চলত উদ্ধাৰ হৈছে আৰু চাৰিজন মাওবাদীৰ মৃতদেহ।
ইয়াৰ পূৰ্বে মাওবাদীয়ে বাঘৰ বসতি বনাঞ্চলত শিবিৰ পাতিছিল। তেওঁলোকক উৎখাত কৰিবলৈ মধ্য প্ৰদেশৰ কানহা ৰাষ্ট্ৰীয় উদ্যানত যুটীয়া বাহিনীয়ে অভিযান চলায়। দুয়োপক্ষৰ মাজত হোৱা সংঘৰ্ষত ৰক্তাক্ত হৈ পৰে কানহা টাইগাৰ ৰিজাৰ্ভ। মধ্যপ্ৰদেশৰ এই বিখ্যাত বাঘ্ৰ অৰণ্যৰ মূল অঞ্চলত দেওবাৰে বিয়লি যৌথ বাহিনীৰ সৈতে হোৱা সংঘৰ্ষত এজন মাওবাদী নিহত হয়। বাকীবোৰৰ সন্ধানত দেওবাৰে বিয়লিৰ পৰা সোমবাৰে নিশালৈকে বাঘ্ৰ সংৰক্ষিত বনাঞ্চল আৰু ইয়াৰ আশে-পাশে থকা অঞ্চলত কম্বিং অপাৰেছন চলাইছিল।
কেন্দ্ৰীয় গৃহমন্ত্ৰী অমিত শ্বাহে অহা বছৰৰ মাৰ্চৰ ভিতৰত দেশৰ পৰা মাওবাদী সম্পূৰ্ণৰূপে নিৰ্মূল কৰাৰ প্ৰতিশ্ৰুতি দিছে। চত্তীশগড়ৰ বিভিন্ন অঞ্চলত মাওবাদীৰ বিৰুদ্ধে চলা অভিযানত নিৰাপত্তা বাহিনীয়ে বৃহৎ সফলতা লাভ কৰিছে। কেন্দ্ৰীয় গৃহমন্ত্ৰীগৰাকীয়ে কয় যে, ২০২৬ চনৰ ৩১ মাৰ্চৰ পূৰ্বে আমি দেশৰ পৰা নক্সালবাদ নিৰ্মূল কৰিম। যাতে দেশৰ কোনো নাগৰিকে তেওঁলোকৰ বাবে প্ৰাণ হেৰুৱাব লগা নহয়। এই কাৰণে মই মোৰ সংকল্প পুনৰবাৰ ব্যক্ত কৰিছো।”