গৰুখুটি, ঢলপুৰৰ অমানৱীয় উচ্ছেদে এমাহ অতিক্ৰম কৰি গ’ল। উচ্ছেদিত স্থানত আৰম্ভ কৰা হৈছে গৰুখুটি প্ৰকল্প। এতিয়াও অৱৰুদ্ধ দ্বীপত জীৱন নিৰ্বাহ কৰি আছে দুৰ্ভগীয়া উচ্ছেদিত লোকসকলে।
চতিয়াৰ বিধায়ক তথা গৰুখুটি প্ৰকল্পৰ অধ্যক্ষ পদ্ম হাজৰিকাৰ নেতৃত্ব উচ্ছেদস্থলীত আৰম্ভ কৰা হৈছে প্ৰকল্পৰ কৃষি কৰ্ম।
উক্ত কৃষিকৰ্মৰ দোহাই দি গৰুখুটিসহ ঢলপুৰৰ চৰত অব্যাহত আন-অফিচিয়েল জৰুৰী অৱস্থা তথা ১৪৪ ধাৰা।
গৰুখুটি প্ৰকল্পত কেৱল প্ৰকল্পৰ কৰ্মী তথা স্বেচ্ছাসেৱক আৰু প্ৰশাসনে অনুমতি দিয়া লোকৰহে প্ৰৱেশ কৰাৰ অধিকাৰ আছে। উচ্ছেদিত লোকসকলকো শিবিৰ পতা স্থানৰ পৰা গৰুখুটিলৈ যোৱাটো নিষিদ্ধ কৰি দিছে প্ৰশাসনে।
সংবাদ মাধ্যমৰ লোকৰো প্ৰৱেশ নিষিদ্ধ কৰা হৈছে গৰুখুটিত। নিষিদ্ধ কৰা হৈছে গৰুখুটি প্ৰকল্পত ফ’টোকে আদি কৰি যিকোনো প্ৰকাৰৰ তথ্য সংগ্ৰহৰ।
গৰুখুটিলৈ যোৱা মূল পথটোকো ভাৰতীয় সেনাৰ অস্থায়ী শিবিৰ পাতি বন্ধ কৰি দিয়া হৈছে। উক্ত পথৰে কোনো লোককে যাতায়াত কৰাটো নিষিদ্ধ কৰি দিছে ভাৰতীয় সেনাই।
যাৰ ফলত উচ্ছেদিত লোকসকলে পিছ দুৱাৰৰ দৰে ব্যৱহাৰ কৰিবলগীয়া হৈছে বিকল্প পথ। দৈনন্দিন ব্যৱহাৰ কৰা মূল পথটো যাতায়াতৰ বাবে বন্ধ কৰি দিয়াৰ ফলত উচ্ছেদিত লোকসকলৰ বাবে ভূতৰ ওপৰত দানহ পৰাৰ দৰেই অৱস্থা হৈছে।
তেওঁলোকৰ বাবে মূলপথটো বন্ধ কৰি দিয়াৰ ফলতে অস্থায়ী শিবিৰ পাতি থকা উচ্ছেদিতসকলৰ দুটি শিশু চিকিৎসাৰ অভাৱত মৃত্যুও হৈছে। চিকিৎসাৰ অভাৱৰ বাবে মাত্ৰ চাৰি মহীয়া দুটি শিশুৰ কৰুণ মৃত্যু ঘটিছে গৰুখুটিৰ উচ্ছেদিত স্থানত।
ৰহিম আলী আৰু মেচিৰণ নেচাৰ চাৰিমহীয়া পুত্ৰ সন্তান মজিবৰ আলীৰ যোৱা ১২ অক্টোবৰত চিকিৎসাৰ অভাৱত কৰুণ মৃত্যুক সাৱতি লোৱা বুলি দাবী কৰিছে উচ্ছেদিত লোকসকলে।
আনহাতে আকেশ আলী আৰু মিনুৱাৰা পাৰবিনৰ চাৰিমহীয়া আখি আখতাৰা নামৰ কন্যা সন্তানটিও মূল পথটো বন্ধ কৰি ৰখাৰ ফলত চিকিৎসাৰ অভাৱত পৰিছিল। অৱশ্যে পিছলৈ বিকল্প পথেৰে চিকিৎসাৰ বাবে গুৱাহাটী চিকিৎসা মহাবিদ্যালয় আৰু চিকিৎসালয়ত ভৰ্তি কৰোৱা হয় যদিও ১৫ অক্টোবৰত কন্যা শিশুটিৰ GMCHতে কৰুণ মৃত্যু ঘটে।
ইফালে ফাতেমা বিবি নামৰ এগৰাকী প্ৰসূতিৰ এটি নৱজাতকতো চিকিৎসাৰ অভাৱতে মৃত্যু হোৱা বুলি দাবী কৰিছে উচ্ছেদিত লোকসকলে। তেওঁলোকৰ মতে মূল পথটো বন্ধ কৰি দিয়াৰ ফলত প্ৰসূতিগৰাকীক যথাসময়ত চিকিৎসালয়লৈ নিব পৰা নাছিল।
বিকল্প পথেৰে স্থানীয় চিকিৎসালয়লৈ নিয়াৰ পিছতে প্ৰসূতিগৰাকীৰ গুৱাহাটীস্থিত GMCHলৈ প্ৰেৰণ কৰা হয়। কিন্তু যথেষ্ট পলম হোৱাত যোৱা ২৩ ছেপ্টেম্বৰত নৱজাতকটিৰ কৰুণ মৃত্যু হয় বুলি জানিব পৰা গৈছে। অৱশ্যে প্ৰসূতিগৰাকী এতিয়া স্বাস্থ্যৰ অৱস্থা সন্তোষজনক।
উচ্ছেদিত লোকসকলে প্ৰকাশ কৰা অনুসৰি যোৱা ২০ ছেপ্টেম্বৰত ধলপুৰত উচ্ছেদ আৰম্ভ হোৱাৰ পিছতে বৃষ্টিপাতৰ আৰম্ভ হৈছিল। প্ৰশাসনে জাননী প্ৰদানৰ মাত্ৰ ১২ ঘণ্টাৰ ভিতৰত হঠাতে উচ্ছেদ কাৰ্য আৰম্ভ কৰাৰ ফলত বৃষ্টিপাতৰ পৰা চাৰিমহীয়া শিশুকেইটি ৰক্ষা কৰিব নোৱাৰাৰ বাবেই শাৰীৰিক অসুস্থতাৰ আৰম্ভ হয় আৰু পথ বন্ধৰ বাবে যথাসময়ত চিকিৎসা প্ৰদান কৰিব নোৱাৰা বাবেই কৰুণভাৱে মৃত্যুক আঁকোৱালি লয় দুয়োটি শিশুৱে।
আনহাতে উচ্ছেদৰ পূৰ্বে ধলপুৰ আৰু গৰুখুটিৰ সকলো ইঞ্জিনযুক্ত আৰু অন্যান্য নাওকে প্ৰশাসনে জব্দ কৰি থৈছিল আৰু তেওঁলোক বৰ্হিবিশ্বৰে সম্পূৰ্ণৰূপে বিচ্ছিন্ন হৈ থকাৰ লগতে প্ৰথমাৱস্থাত বিকল্প পথৰেৰে যাতায়ত কৰাৰ সকলো বাটো বন্ধ হৈ পৰিছিল। যাৰফলত ৰোগীয়া শিশু আৰু প্ৰসূতিগৰাকীক সময়মতে চিকিৎসালয়লৈ প্ৰেৰণ কৰিবলৈ অপৰাগ হৈছিল উচ্ছেদিত লোকসকল।
ইফালে কোনো ক্ষতিপূৰণ, পুনঃসংস্থাপন আৰু চৰকাৰী সাহায্য নোপোৱাকৈয়ে এতিয়াও চৰৰ মাজতে মাটিৰ ওপৰত চালি একোখন লৈ জীৱন যাপন কৰি আছে উচ্ছেদিত লোকসকলে।
