এক গোপন সূত্ৰৰ পৰা পোৱা তথ্যৰ ভিত্তিত তিনিচুকীয়া জিলাৰ মাৰ্ঘেৰিটা মহকুমাৰ লেখাপানী আৰক্ষী থানাৰ অন্তৰ্গত লাল পাহাৰ গাঁৱত আজি আৰক্ষীয়ে এক অভিযান চলাই দুজন ড্ৰাগছ সৰবৰাহকাৰীক আটক কৰে।
ধৃত ড্ৰাগছ সৰবৰাহকাৰী দুজন ক্ৰমে লাল পাহাৰ গাঁৱৰ নিবাসী ভিকাছে চেমা (২৪) আৰু আন এজন টিপং বি টাইপৰ নিবাসী বি ৰামান্ন (২৩) বুলি অভিযানকাৰী আৰক্ষী দলটোৱে জানিবলৈ দিয়ে।
অভিযানকাৰী দলয়োৱে ধৃত দুই ড্ৰাগছ সৰবৰাহকাৰী দুজনৰ পৰা প্ৰায় ১০ গ্ৰাম ব্ৰাউন চুগাৰ জব্দ কৰিবলৈ সক্ষম হয়। ইতিমধ্যে লেখাপানী আৰক্ষীয়ে ধৃত ড্ৰাগছ সৰবৰাহকাৰী দুজনক সোধা-পোছা অব্যাহত ৰাখিছে।
উল্লেখ্য যে বিগত সময়ছোৱাত মাৰ্ঘেৰিটা মহকুমাৰ বিভিন্ন প্ৰান্তত নিচাজাতীয়ে সামগ্ৰীৰ প্ৰচলন যথেষ্ট পৰিমাণে বৃদ্ধি পোৱাৰ পিছতো এই ক্ষেত্ৰত আবকাৰী বিভাগে চকু মুদা কুলিৰ ভাও ধৰা বুলি বিভিন্ন জনে অভিযোগ উত্থাপন কৰিছে।
