গুৱাহাটী আৰু উত্তৰ গুৱাহাটীৰ মাজত চলা দুখনকৈ ফেৰি ব্ৰহ্মপুত্ৰ নৈৰ মাজৰ বালিত লাগি আবদ্ধ হৈ পৰিছে। ৰজাদুৱাৰ আৰু মধ্যম খণ্ডৰ ফেৰি দুখন নদীৰ বুকুত আবদ্ধ হোৱাৰ পিছত যাত্ৰীসকলৰ মাজত এক হাহাকাৰ পৰিস্থিতিৰ সৃষ্টি হৈছে।
জানিব পৰা মতে এখন ফেৰি ঘন কুৱলীৰ বাবে বাট ভুল হোৱাত পুনৰ ঘাটলৈ উভটি যোৱাৰ সময়তে নদীৰ বুকুৰ বালিত লাগি আবদ্ধ হৈ পৰে। আৰু আন এখন ফেৰি কেনেদৰে নৈৰ বুকুত আবদ্ধ হৈ পৰে সেয়া এতিয়াও জানিব পৰা হোৱা নাই।
ইয়াৰ উপৰি এই দুৰ্ঘটনাটোৰ ফলত এই পৰ্যন্ত কোনো লোক হতাহত হোৱা নাই বুলি আমালৈ খবৰ আহিছে।
লুইতৰ বুকুত ফেৰি দুখন আবদ্ধ হৈ পৰাত যাত্ৰীসকলৰ মাজত এক শংকাই দেখা দিছে কিয়নো দুমাহ মান পূৰ্বে উক্ত অঞ্চলতে এক ভয়ংকৰ নাও দুৰ্ঘটনা সংঘটিত হৈছিল য’ত কেইবাজনো লোকে প্ৰাণ হেৰুৱাইছিল।
জানিব পৰা মতে এই পৰ্যন্ত ফেৰি দুৰ্ঘটনা হোৱা স্থলত প্ৰশাসনৰ লোক তথা উদ্ধাৰকাৰীৰ কোনো দল উপস্থিত হোৱা নাই।
উল্লেখ্য যে বিগত দিন সমূহত লুইতৰ বুকুত সংঘটিত হোৱা ভয়ংকৰ দুৰ্ঘটনাৰ পিছতে চৰকাৰ তথা বিভাগীয় কৰ্তৃপক্ষ তৎপৰ হৈ পৰে যদিও পিছত যে সকলো ফুটুকাৰ ফেনত পৰিণত হৈ সেয়া পুনৰ আজিৰ এই দুৰ্ঘটনাই প্ৰমাণ কৰি দিলে।