এতিয়া যেন অপৰাধীৰ ৰম্যভূমিত পৰিণত হৈছে তীৰ্থনগৰী হাজো। হাজোত একেনিশাই সংঘটিত হ’ল চাঞ্চল্যকৰ অপহৰণ আৰু ডকাইতিৰ দুটাকৈ ঘটনা।
প্ৰথম ঘটনাটো শনিবাৰে সন্ধিয়াৰ। ৰাহুল আমিন নামৰ যুৱকজনে হাজোৰ কলিতাকুছিস্থিত এছবিআইৰ এটিএমটোলৈ আহিছিল টকা উলিয়াবলৈ। ৰাহুলে টকা উলিয়াই ওলাই অহাৰ সময়তে এজন অচিনাকী যুৱকে কথা পতাৰ চলেৰে এখন বগা ৰঙৰ বেলেন’ বাহনৰ ওচৰলৈ লৈ যায় ৰাহুলক।
তাৰ পাছতে বাহনখনত পূৰ্বৰে পৰা বহি থকা দুজন যুৱকৰ এজনে অস্ত্ৰ দেখুৱাই গুৱাহাটী অভিমুখে বাহনখনত ৰাহুল আমিনক উঠাই লৈ যায়।
গুৱাহাটীলৈ লৈ গৈ তিনিজনীয়া অপহৰণকাৰীৰ দলটোৱে যুৱকজনৰ চকুত ক’লা কাপোৰ বান্ধি এটা কোঠাত কিছু সময় ৰখাৰ পাছত গুৱাহাটীৰ বশিষ্ঠ চাৰিআলিৰ সমীপৰ এটা গলিত মোকলাই দিয়ে। অপহৰণকাৰীয়ে ৰাহুলে এটিমৰ পৰা উলিওৱা নগদ ২০ হাজাৰ টকাও লৈ যায়।
সেইদৰে, ৰাহুলৰ হাতত থকা আন এখন এটিএম কাৰ্ডৰ পিন কোড নোকোৱা বাবে অপহৰণকাৰী কেইজনে চোকা অস্ত্ৰৰে তেওঁক আক্ৰমণ কৰে।
আনহাতে, একে নিশাই হাজোৰ বৰুৱাবাৰীত আন এক ডকাইতিকাণ্ড ঘটে। বগা ৰঙৰ এখন অল্টো বাহনত অহা তিনিজনীয়া এটা দুৰ্বৃত্তৰ দলে চোকা অস্ত্ৰৰে আক্ৰমণ কৰি লুটিলে ৰুবুল আলী নামৰ এজন যুৱকক। দুৰ্বৃত্তৰ দলটোৱে ৰুবুল আলীৰ পৰা মোবাইল ফোনৰ লগতে কিছু নগদ ধন লৈ যায়।
জালুকবাৰীৰ পৰা হাজোৰ চৰাবৰীলৈ বুলি অল্টো বাহখনত ৰুবুলে যাত্ৰী হিচাপে বহিছিল। সেই বাহনখনতে যাত্ৰীৰ ভেশত অহা তিনিজনীয়া দুৰ্বৃত্তৰ দলটোৱে ৰুবুল আলীক হাজোৰ বৰুৱাবাৰীৰ মথাউৰিত চোকা অস্ত্ৰৰে আক্ৰমণ চলাই নগদ ধন আৰু মোবাইল ফোন লৈ যায়।