প্ৰায় এমাহ পূৰ্বে শিৱসাগৰৰ দিখৌ নদীত পাঁচজনীয়া পৰিয়ালটোৰ সৈতে এখন গাড়ী ডুব যোৱাৰ ঘটনাটোৰ দৰে আন এটা ঘটনা আজি সংঘটিত হয়। জিলাখনৰ নামতিৰ পৰা আমগুৰিৰ অভিমুখে আহি থকা এখন গাড়ী পুলত খুন্দা মাৰি নদীত বাগৰি পৰে। দুৰ্ঘটনাগ্ৰস্ত নেক্সন গাড়ীখনৰ নম্বৰ আছিল AS04T-3333.
অৱশ্যে গাড়ীত থকা আৰোহী আৰু চালকক স্থানীয় ৰাইজৰ সহযোগত লগে লগে উদ্ধাৰ কৰি চিকিৎসালয়লৈ নিয়া হয়। দুয়োজনৰে অৱস্থা সংকটজনক বুলি জনাইছে আত্মীয় লোকে।
জানিব পৰা মতে, গাড়ীখনত থাওৰা সমষ্টিৰ বিজেপিৰ বিধায়ক কুশল দুৱৰীৰ ভায়েক বকুল দুৱৰী আৰু লগৰ এজন আহিছিল। কিন্তু সৰু নদীখনৰ ওপৰত থকা পুলত উঠিব খোজোতেই চালকৰ ভুলৰ বাবে গাড়ীখনে খুন্দা মাৰে আৰু তললৈ বাগৰি পৰে।
বকুল দুৱৰীৰ লগৰজনৰ নাম এই পৰ্য্যন্ত জানিব পৰা হোৱা নাই। দুয়োকে বৰ্তমান ডিব্ৰুগড়ৰ অসম মেডিকেল কলেজ হস্পিটেলত চিকিৎসা প্ৰদান কৰি থকা হৈছে।