আলফা স্বাধীনে অপহৰণ কৰা অ’এনজিচিৰ দুগৰাকী কৰ্মচাৰীক নিৰাপত্তা বাহিনীয়ে উদ্ধাৰ কৰিবলৈ সক্ষম হৈছে।
বাতৰি অনুসৰি, আছাম ৰাইফলছ আৰু আৰক্ষীৰ এক যৌথ অভিযানত শুকুৰবাৰে শেষ নিশা নাগালেণ্ডৰ মন জিলাৰ পৰা অ’এনজিচিৰ কৰ্মচাৰী দুগৰাকীক উদ্ধাৰ কৰা হয়।
‘’অ’এনজিচিৰ আনগৰাকী অপহৃত কৰ্মচাৰীক উদ্ধাৰৰ বাবে অভিযান অব্যাহত ৰখা হৈছে,’’-ভাৰতীয় সেনাৰ এগৰাকী বিষয়াই জানিবলৈ দিয়ে।
যোৱা ২১ এপ্ৰিলত সন্দেহযুক্ত আলফা স্বাধীন উগ্ৰপন্থীয়ে অসম –নাগালেণ্ড সীমান্তত থকা শিৱসাগৰৰ লাকুৱা তৈলক্ষেত্ৰৰ পৰা অ’এনজিচিৰ তিনিগৰাকী কৰ্মচাৰীক অপহৰণ কৰিছিল।
শিৱসাগৰৰ লাকুৱা তৈলক্ষেত্ৰত প্ৰায় ছয় দশক ধৰি কামকাজ চলাই থকা খনন কোম্পানীটোৰ এখন গাড়ীৰে কৰ্মচাৰীকেইগৰাকীক অপহৰণ কৰা হৈছিল।
অপহৃত কৰ্মচাৰী তিনিগৰাকীৰ ভিতৰত মোহিনী মোহন গগৈ (৩৫) আৰু ৰিতুল শইকীয়া (৩৩) দুয়োগৰাকী জুনিয়ৰ টেকনিচিয়ান আৰু আনগৰাকী অলকেশ শইকীয়া (২৮) হৈছে এগৰাকী কণিষ্ঠ অভিযন্তা (উৎপাদন)।
উদ্ধাৰ হোৱা অপহৃত কৰ্মচাৰী দুগৰাকী হৈছে অলকেশ শইকীয়া আৰু মোহিনী মোহন গগৈ।
অভিযানকাৰী দলটোৱে এটা এ কে-৪৭ ৰাইফলো উদ্ধাৰ কৰা বুলি জানিবলৈ দিয়ে এগৰাকী সেনা বিষয়াই।
