দেশজুৰি বাহাল থকা লকডাউনৰ সময় চোৱাত শতাধিক দৰিদ্ৰ পৰিয়ালৰ কাষত ঠিয় দিছে নগাঁও জিলাৰ চামগুৰিৰ আৰু পুৰণিগুদামৰ কেইবাখনো ব্যক্তিগত বেচৰকাৰী শিক্ষানুষ্ঠানে।
অহা ৩ মে’লৈকে লকডাউনৰ সময়সীমা বৃদ্ধি কৰাৰ ফলত বৃহত্তৰ অঞ্চল দুটাৰ বহু সংখ্যক দৰিদ্ৰ পৰিয়ালে অত্যাৱশ্যকীয় খাদ্য সামগ্ৰীৰ বাবে বিহুৰ দিনকেইটাতো হাহাকাৰ কৰিব লগীয়া পৰিস্থিতিৰ সৃষ্টি হোৱা পৰিলক্ষিত হৈছিল।
ইয়াৰ পৰিপেক্ষিততে ৰাজ্যৰ শিক্ষা স্বাস্থ্য আৰু বিত্ত মন্ত্ৰী ড০ হিমন্ত বিশ্ব শৰ্মাৰ আহ্বানৰ প্ৰতি বিপুল সহাঁৰি জনাই পুৰণিগুদাম কলংপাৰ কনিষ্ঠ মহাবিদ্যালয়ে লকডাউনৰ সময়ত ছাত্ৰ-ছাত্ৰী সকলক এমাহৰ মাহেকীয়া মাচুল ৰেহাই দিয়াৰ উপৰি সমীপৰে দুখীয়া পৰিয়ালৰ মাজত খাদ্য সামগ্ৰীও বিতৰণ কৰা দেখা যায়।
মহাবিদ্যালয়খনৰ শিক্ষয়িত্ৰী আৰু কৰ্মচাৰী সকলৰ সহযোগত পুৰণিগুদাম ভৰাগুৰি, ব্ৰহ্মচাৰী, খাটোৱাল আদিকে ধৰি বহুকেইখন গাঁৱৰ অৰ্ধ শতাধিক দৰিদ্ৰ লোকৰ মাজতো চাউল, দালি, আলু, চিৰা, মিঠাতেল আদিকে ধৰি খাদ্য সামগ্ৰী বিতৰণ কৰাৰ লগতে ছাত্ৰ-ছাত্ৰী সকলৰ অহা বৰ্ষৰ নামভৰ্তিৰ ক্ষেত্ৰত ২০ শতাংশ মাচুল ৰেহাই দিয়া হ’ব বুলি কনিষ্ঠ মহাবিদ্যালয়খনৰ অধ্যক্ষ পবিত্ৰ বৰাই সংবাদ মাধ্যমক জানিবলৈ দিয়ে৷
ইফালে দুখীয়া লোকক সহায়ৰ বাবে আগবাঢ়ি আহিছে ফ্লৰেঞ্চ একাডেমি নামৰ এখন শিশু শিক্ষাৰ শিক্ষানুষ্ঠান।
শিক্ষানুষ্ঠান খনৰ সমূহ শিক্ষক-শিক্ষয়ত্ৰী তথা কৃৰ্তপক্ষৰ হৈ সমাজকৰ্মী পাৰ্থপ্ৰতীম হাজৰীকাই দুখীয়া ৰাইজৰ মাজত বিতৰণ কৰিলে অত্যাৱশ্যকীয় খাদ্য সামগ্ৰী।
পাৰ্থপ্ৰতীম হাজৰিকাই চামগুৰিৰ কেইজনমান সচেতন যুৱকৰ সহযোগত চামগুৰি গাঁও পঞ্চায়তৰ প্ৰায় চাৰি শতাধিক দুখীয়া পৰিয়ালক চাউল, দাইল, মুড়ী, মিঠাতেল, আলু, চয়াবিন, শাক-পাছলি আদি বিভিন্ন অত্যাবশ্যকীয় সামগ্ৰী বিৰতণ কৰা দেখা যায়।
লক্ষণীয় কথাটো হ’ল যে, সংকটৰ সময়ত আৰ্তজনৰ প্ৰতি এনে ধৰণেৰে সজাগতা তথা সহায়ৰ হাত আগবঢ়োৱাক কেন্দ্ৰ কৰি সম্প্ৰতি চামগুৰি আৰু পুৰণিগুদামৰ একাংশ সচেতন লোকে ভূয়সী প্ৰশংসা কৰা দেখা গৈছে বেচৰকাৰী শিক্ষানুষ্ঠান দুখনক।