মণিপুৰত এখন বিবাহযাত্ৰী কঢ়িয়াই নিয়া বাহন গভীৰ খাদত বাগৰি পৰাৰ ফলত এক শোকাৱহ পৰিৱেশৰ সৃষ্টি হৈছে। মঙলবাৰে দুপৰীয়া চুৰাচান্দপুৰ জিলাৰ এটা পাহাৰীয়া ৰাস্তাত এই ভয়াৱহ দুৰ্ঘটনাটো সংঘটিত হয়। জানিব পৰা মতে এখন পিকআপ ভানত প্ৰায় ৪০ জন যাত্ৰী এখন বিয়াৰ অনুষ্ঠানত অংশগ্ৰহণ কৰিবলৈ গৈ আছিল। দুপৰীয়া প্ৰায় ১২ বজাত সিংঙ্গাত এলেকাৰ নগলজাং গাঁৱৰ ওচৰৰ এটা বিপদজনক কেকুৰীত গাড়ীখনে নিয়ন্ত্ৰণ হেৰুৱাই পোনচাটেই দ খাৱৈত বাগৰি পৰে।
এই দুৰ্ঘটনাত তিনিগৰাকী মহিলাসহ চাৰিজন লোকৰ থিতাতে মৃত্যু হয় আৰু বহু যাত্ৰী গুৰুতৰভাৱে আহত হয়। আৰক্ষীৰ সূত্ৰ অনুসৰি থাংমুয়ানমুং খুপতং, হাউচিন, চিংগাইসিয়াম আৰু নিয়াংজানিয়াং নামৰ লোককেইজনে প্ৰাণ হেৰুৱাইছে। স্থানীয় ৰাইজ আৰু প্ৰশাসনে দুৰ্ঘটনাস্থলীত উপস্থিত হৈ আহতসকলক উদ্ধাৰ কৰি চিকিৎসালয়ত ভৰ্তি কৰাৰ ব্যৱস্থা কৰে।
আনহাতে মহাৰাষ্ট্ৰৰ মুম্বাই চহৰতো এখন বাছৰ খুন্দাত কেইবাজনো পথচাৰীৰ মৃত্যু হোৱাৰ খবৰ পোৱা গৈছে। সোমবাৰে নিশা মুম্বাইৰ ভাণ্ডুপ অঞ্চলত বৃহন্মুম্বই ইলেক্ট্ৰিক ছাপ্লাই এণ্ড ট্ৰেন্সপোৰ্ট চমুকৈ বেষ্টৰ এখন বাছে নিয়ন্ত্ৰণ হেৰুৱাই পথচাৰীসকলক মহতিয়াই লৈ যায়। সেই সময়ত ৰাস্তাত যথেষ্ট ভিৰ আছিল আৰু বাছখনে হঠাৎ দ্ৰুতগতিত আহি মানুহৰ ওপৰেৰে চলাই দিয়াত চাৰিজন লোকৰ মৃত্যু হয় আৰু আন নজন লোক আহত হয়। এই ঘটনাক কেন্দ্ৰ কৰি সমগ্ৰ অঞ্চলটোত আতংকময় পৰিৱেশৰ সৃষ্টি হয় আৰু বহুলোকে প্ৰাণ ৰক্ষাৰ বাবে ওচৰৰ দোকানত আশ্ৰয় লয়। ঘটনাৰ পাছতে আৰক্ষী বাহিনীয়ে ঘটনাস্থলীত উপস্থিত হৈ মৃতদেহ আৰু আহতসকলক উদ্ধাৰ কৰে।
এই দুৰ্ঘটনা সন্দৰ্ভত বেষ্টৰ জনসম্পৰ্কৰক্ষী বিষয়াই জানিবলৈ দিছে যে বাছখন পাছলৈ ঘূৰাবলৈ লওঁতেই এই অঘটনটো ঘটে। আৰক্ষীয়ে ইতিমধ্যে ৫২ বছৰীয়া বাছ চালক সন্তোষ ৰমেশ সাৱন্তক আটক কৰিছে আৰু তেওঁৰ বিৰুদ্ধে গোচৰ ৰুজু কৰিছে। চালকজনৰ ভুল আছিল নেকি বা অন্য কিবা কাৰিকৰী বিসংগতি আছিল সেই বিষয়ে তদন্ত আৰম্ভ কৰা হৈছে।
মুম্বাইৰ এই কৰুণ ঘটনাত দেশৰ প্ৰধানমন্ত্ৰী নৰেন্দ্ৰ মোদীয়ে গভীৰ শোক প্ৰকাশ কৰিছে। তেওঁ মৃতকৰ পৰিয়াললৈ পাঁচ লাখ টকাকৈ সাহায্য ঘোষণা কৰিছে আৰু আহতসকলৰ আশু আৰোগ্য কামনা কৰিছে। একেদৰে মহাৰাষ্ট্ৰৰ মুখ্যমন্ত্ৰী দেৱেন্দ্ৰ ফড়নবীশেও এই দুৰ্ঘটনাক দুৰ্ভাগ্যজনক আখ্যা দি মৃতকৰ পৰিয়াললৈ ৰাজ্য চৰকাৰৰ তৰফৰ পৰা পাঁচ লাখ টকাৰ আৰ্থিক সাহাৰ্যৰ কথা ঘোষণা কৰিছে।
