জাগুন-মাৰ্ঘেৰিটা-তিনিচুকীয়া পথেদি হৈ আছে নেকি চোৰাং কয়লা ভৰ্তি ট্ৰাকৰ সৰবৰাহ! বিগত লকডাউন আৰম্ভ হোৱাৰ পৰা চোৰাং কয়লা সৰবৰাহ বন্ধ হৈ থকাৰ কথা একপ্ৰকাৰৰ অপপ্ৰচাৰ নেকি?
যদি এয়া অপপ্ৰচাৰ নহয় তেন্তে কেনেকৈ জাগুন লিডু আৰক্ষী চকী তথা লেখাপানী আৰক্ষী থানা পাৰ হৈ আহিল এই দুখন চোৰাং কয়লা ভৰ্তি ট্ৰাক? এই প্ৰশ্নই উত্থাপন হৈছে ৰাইজৰ মাজত।
আজি পুৱতি নিশা মাৰ্ঘেৰিটা থানাৰ নৱনিযুক্ত ভাৰপ্ৰাপ্ত আৰক্ষী বিষয়া উৎপল বৰাৰ নেতৃত্বত যোৱা এটা আৰক্ষীৰ দলে এক গোপন সূত্ৰৰ ভিত্তিৰ অভিযানত চলায় এ এচ ০১ জে চি ৫৫৪৫ আৰু এ এচ ২৫ এ চি ১৪৭৬ নম্বৰৰ দুখন ট্ৰাক জব্দ কৰা ঘটনাই উন্মোচিত কৰিছে চোৰাং কয়লা সৰবৰাহ হৈ থকাৰ কথা।
অৰুণাচল প্ৰদেশৰ মেওৰ পৰা চোৰাংভাৱে কয়লা বোজাই কৰি আনি থকা অৱস্থাত জব্দ কৰা হয় ট্ৰাক কেইখন। আৰক্ষীৰ চকুত ধূলি দি কয়লাৰ ওপৰত কাঠ দি নিয়াৰ চেষ্টা কৰিছিল চোৰাং কয়লা বেপাৰীয়ে।
ট্ৰাককেইখনৰ সৈতে দেৱব্ৰত দত্ত নামৰ ব্যৱসায়ী এজনৰ লগতে ললিত গগৈ আৰু অনন্ত দেউৰী নামৰ দুই ড্ৰাইভাৰক গ্ৰেপ্তাৰ কৰিছে আৰক্ষীয়ে। মাৰ্ঘেৰিটা আৰক্ষী থানা গোচৰ নং ৩০৩/২০ ভাৰতীয় দণ্ডবিধি আইনৰ ৩৭৯, আৰ ডাব্লিউ ৩ পি ডি পি এক্টৰ গোচৰ পঞ্জীয়ন কৰি সমগ্ৰ ঘটনাৰ তদন্ত আৰম্ভ কৰিছে আৰক্ষীয়ে।
কয়লাখিনি সৰবৰাহৰ অন্তৰালত চোৰাং কয়লা বেহাৰ এক বহুল চৰ্চিত নাম প্ৰিন্স জড়িত থকা বুলি এক সূত্ৰই সদৰী কৰিছে। ইতিমধ্যে উক্ত চোৰাং কয়লা সৰবৰাহৰ আৰৰ ব্যক্তিজনকো আৰক্ষীয়ে ক্ষীপ্ৰতাৰে অনুসন্ধান কৰি আটক কৰিবলৈ সক্ষম হয়। ধৃত লোকজন দেবব্ৰত দত্ত ওৰফে দেবু বুলি জানিব পৰা গৈছে।
দেবুৰ বিৰুদ্ধে বিগত সময়ত লেখাপানীত বাহৰ পাতি কয়লাৰ বৃহৎ কাৰবাৰ চলাই অহাৰ অভিযোগ উত্থাপিত হৈছিল।
এটা সূত্ৰই দাবী কৰা মতে, দেৱব্ৰতে এজন প্ৰাক্তন আৰক্ষী বিষয়াৰ পুত্ৰ প্ৰিন্সৰ পৰা চোৰাং কয়লাখিনি ক্ৰয় কৰি প্ৰাক্তন আৰক্ষী বিষয়া গৰাকীৰ সাহসত কিছুদিনৰ পৰা কয়লা সৰবৰাহ কৰি আহিছিল। ইতিমধ্যে ২০ খনকৈ ট্ৰাক সৰবৰাহ কৰাৰ পিছতেই আজি ঘটে এই অথন্তৰ। জব্দকৃত চোৰাং কয়লাখিনি কৰ পৰা অনা হৈছিল সেই কথা এতিয়াও স্পষ্ট হোৱা নাই যদিও এক সূত্ৰই এয়া জাগুনৰ ৱাৰা বস্তিৰ পৰা অনা বুলি দাবী কৰিছে।
সমষ্টিটোত কোনো চিণ্ডিকেট নাই বুলি সততে দাবী কৰি নিজকে ধুৱা তুলসীৰ পাত সজোৱা সমষ্টিটোৰ বিধায়ক ভাস্কৰ শৰ্মাৰ অতি ঘনিষ্ঠ এইজন প্ৰাক্তন আৰক্ষী বিষয়াই কিছুদিন পূৰ্বে চাকৰিৰ পৰা অৱসৰ গ্ৰহণ কৰি নিজ গৃহলৈ উভতি নগৈ মাৰ্ঘেৰিটাৰ এটা বিশেষ ভাৰাঘৰত বাহৰ পাতি কয়লাৰ চোৰাং বেহা চলোৱাৰ অভিযোগ উত্থাপন হৈছে।
যিদৰে আৰক্ষী এছ আই কেলেংকাৰিত প্ৰাক্তন আৰক্ষী বিষয়া জালত পৰিছে মুখ্যমন্ত্ৰী সৰ্বানন্দ সোণোৱাল নেতৃত্বাধীন গৃহ বিভাগে কয়লাৰ চিণ্ডিকেট তথা চোৰাং কয়লা বেহাৰ বিৰুদ্ধে তদন্ত কৰিলে এইজনা বহু বিৰ্তকিত আৰক্ষী বিষয়া জালত পৰাটো নিশ্চিত বুলি সচেতন মহলত চৰ্চা হৈছে।
ইতিমধ্যেই এইজনা আৰক্ষী বিষয়াৰ বিৰুদ্ধে কয়লা চোৰাং বেহা অভিযোগ উত্থাপন কৰি কিছুদিন পূৰ্বে মাৰ্ঘেৰিটা আৰক্ষী থানাত মাৰ্ঘেৰিটা কংগ্ৰেছে এক গোচৰ পঞ্জীয়ন কৰাইছিল। যদিও এইক্ষেত্ৰত আৰক্ষীয়ে নিজ আৰক্ষীৰ বিৰুদ্ধে কি পৰ্যায়ত তদন্ত কৰিছে সেই সম্পৰ্কে জানিব পৰা হোৱা নাই।
ইফালে মাৰ্ঘেৰিটা মহকুমা আৰক্ষী বিষয়া পুনা গগৈ আৰু মাৰ্ঘেৰিটা আৰক্ষী থানাৰ নৱনিযুক্ত আৰক্ষী বিষয়া উৎপল বৰাৰ এই সাহসী পদক্ষেপক শলাগ লৈছে মাঘেৰিটাৰ সচেতন মহলে।
