আমেৰিকাৰ উচ্চতম ন্যায়ালয়ৰ ৰায়ৰ পিছত ভেনিজুৱেলাৰ পৰা অবৈধভাৱে অনুপ্ৰৱেশ কৰা এটা দলৰ বিতাড়ন প্ৰক্ৰিয়া সাময়িকভাৱে স্থগিত ৰাখিছে। ড’নাল্ড ট্ৰাম্পৰ প্ৰশাসনে ১৭৯৮ চনৰ ‘এলিয়েন এনিমিজ এক্ট’নামৰ যুদ্ধকালীন আইন ব্যৱহাৰ কৰি ২৬১ জন ভেনিজুৱেলাৰ নাগৰিকক তেওঁলোকৰ দেশলৈ ঘূৰাই পঠিয়াবলৈ পদক্ষেপ লৈছিল। এই আইনখন যুদ্ধৰ সময়ত শত্ৰু দেশৰ নাগৰিকক বিতাড়নৰ বাবে প্ৰণয়ন কৰা হৈছিল।
এই অনুপ্ৰৱেশকাৰীসকল ড্ৰাগছ সৰবৰাহ আৰু অপৰাধমূলক কাৰ্যকলাপৰ সৈতে জড়িত হৈ দেশৰ নিৰাপত্তাৰ বাবে ভাবুকিৰ সৃষ্টি কৰিছিল বুলি ট্ৰাম্প প্ৰশাসনে দাবী কৰিছিল। কিন্তু শনিবাৰে উচ্চতম ন্যায়ালয়ে এই বিতাড়ন প্ৰক্ৰিয়া স্থগিত ৰখাৰ নিৰ্দেশ প্ৰদান কৰিছে।
এই গোটৰ কিছু সদস্যই দাবী কৰিছে যে তেওঁলোক কোনো অপৰাধৰ সৈতে জড়িত নহয়। দ্বিতীয় বিশ্বযুদ্ধৰ পিছত এই আইন আমেৰিকাত ব্যৱহাৰ কৰা হোৱা নাছিল। ট্ৰাম্পে পূৰ্বে কৈছিল যে তেওঁ পুনৰ ক্ষমতালৈ আহিলে এই আইনৰ জৰিয়তে অবৈধ অনুপ্ৰৱেশকাৰীক বিতাড়ন কৰিব। ১৫ মাৰ্চত নিম্ন আদালতে এই প্ৰক্ৰিয়া স্থগিত কৰিছিল, কিন্তু ৮ এপ্ৰিলত উচ্চতম ন্যায়ালয়ে স্থগিতাদেশ প্ৰত্যাহাৰ কৰই কয় যে বন্দীসকলক বিতাড়ন প্ৰক্ৰিয়াক প্ৰত্যাহ্বান জনোৱাৰ সুযোগ দিয়া উচিত। বৰ্তমান এই ভেনিজুৱেলাৰ নাগৰিকসকল টেক্সাছৰ এল ছালভাডৰ কাৰাগাৰত বন্দী হৈ আছে।
এটা অধিকাৰ সংগঠনে উচ্চতম ন্যায়ালয়ত অভিযোগ কৰিছে যে চৰকাৰে কাৰাগাৰলৈ ইংৰাজীত জাননী প্ৰেৰণ কৰিছিল, যিখন স্পেনিছ ভাষী বন্দীসকলে বুজিব পৰা নাছিল। তেওঁলোকক জাননীৰ বিষয়ে ব্যাখ্যা বা আদালতত প্ৰত্যাহ্বানৰ তথ্য প্ৰদান কৰা হোৱা নাছিল। এই অভিযোগৰ ভিত্তিত শনিবাৰে উচ্চতম ন্যায়ালয়ে বিতাড়ন প্ৰক্ৰিয়া সাময়িকভাৱে স্থগিত ৰখাৰ নিৰ্দেশ দিয়ে, যাতে বন্দীসকলে ন্যায্য প্ৰক্ৰিয়াৰ সুযোগ লাভ কৰে।
