মাৰিজুৱানাৰ বজাৰত প্ৰৱেশ কৰিব জনপ্ৰিয় মোবাইল এপ উবেৰে! কানাডাৰ অণ্টাৰিঅ’ত উবেৰ ইটছ ব্যৱহাৰকাৰীসকলে শীঘ্ৰেই এপ্পটোত গাঞ্জাৰ সামগ্ৰী অৰ্ডাৰ কৰিবলৈ সক্ষম হ’ব।
গ্ৰাহকসকলে গাঞ্জাৰ ৰিটেইলাৰ টকিঅ স্মোকৰ বাবে এপৰ এটা শাখাত অৰ্ডাৰ দিব পাৰিব আৰু তাৰ পিছত ওচৰৰ দোকানৰ পৰা গাঞ্জা সংগ্ৰহ কৰিব পাৰিব।
অৱশ্যে প্ৰতিষ্ঠানটোৱে কানাডা আৰু আমেৰিকা যুক্তৰাষ্ট্ৰত আগলৈ এই প্ৰস্তাৱ আগবঢ়াব নে নাই সেই বিষয়ে জনাবলৈ অস্বীকাৰ কৰিছিল।
উল্লেখ্য যে, কানাডাৰ মাৰিজুৱানা বজাৰৰ মূল্য বছৰি প্ৰায় চিএডি 5 বিলিয়ন ডলাৰ।
উবেৰ ইটছ ব্যৱহাৰকাৰীসকলে এপ্পটোত তেওঁলোকৰ বয়স প্ৰমাণিত কৰিব লাগিব আৰু তাৰ পিছত এঘণ্টাৰ ভিতৰত তেওঁলোকৰ অৰ্ডাৰ ল’বলৈ সক্ষম হ’ব বুলি কোম্পানীটোৱে জানিবলৈ দিছে।
কানাডিয়ান আইনৰ অধীনত যদিও ২০১৮ চনৰ পৰা মাৰিজুৱানা ব্যৱহাৰ আইনী হৈ আহিছে, তথাপিও ইয়াক প্ৰদান কৰাটো অবৈধ।
উবেৰে কিছু সময়ৰ পৰা বাঢ়ি অহা গাঞ্জাৰ বজাৰত দৃষ্টি ৰাখিছে।
এপ্ৰিলত মুখ্য কাৰ্যবাহী দাৰা খোচৰোশাহীয়ে কৈছিল যে কোম্পানীটোৱে আমেৰিকা যুক্তৰাষ্ট্ৰৰ আইনৰ অধীনত অনুমতি দিয়াৰ পিছত গাঞ্জা বিতৰণ কৰাৰ বিষয়ে বিবেচনা কৰিব।
তিনি বছৰ আগতে কানাডাত মনোৰঞ্জনমূলক ব্যৱহাৰৰ বাবে গাঞ্জা বিক্ৰী আইনী হোৱা স্বত্বেও অবৈধ উৎপাদকসকলে এতিয়াও বিক্ৰীৰ এক বৃহৎ অংশ নিয়ন্ত্ৰণ কৰে। সেয়েহে ইয়াৰ প্ৰতিকাৰৰ বাবে চৰকাৰে চেষ্টা কৰি আছে।
উবেৰে কয় যে টকিঅ’ স্মোকৰ সৈতে ইয়াৰ অংশীদাৰীত্বই দেশৰ প্ৰাপ্তবয়স্কসকলক সুৰক্ষিত, আইনী গাঞ্জা ক্ৰয় কৰাত সহায় কৰিব আৰু অবৈধ বিক্ৰেতাসকলক মোকাবিলা কৰিব।
কানাডাৰ গাঞ্জাৰ বজাৰ অনাগত বছৰবোৰত সম্প্ৰসাৰিত হৈ থাকিব বুলি অনুমান কৰা হৈছে আৰু উদ্যোগ গৱেষণা প্ৰতিষ্ঠান বিডিএছ এনালিটিক্সে আশা কৰিছে যে ২০২৬ চনৰ ভিতৰত বিক্ৰী ৬.৭ বিলিয়ন ডলাৰলৈ বৃদ্ধি হ’ব।
“আমি বজাৰৰ নিয়ম আৰু সুযোগবোৰ গভীৰভাৱে চোৱা অব্যাহত ৰাখিম। স্থানীয় আৰু ফেডাৰেল আইন বিকশিত হোৱাৰ লগে লগে আমি আন অঞ্চলত কাম কৰা ব্যৱসায়ীসকলৰ সৈতে সুযোগ অন্বেষণ কৰিম।” উবেৰৰ এজন মুখপাত্ৰই কয়।
উল্লেখ্য যে, যোৱা বছৰ লকডাউনৰ পৰিপ্ৰেক্ষিতত দেশখনত গাঞ্জাৰ সামগ্ৰীৰ চাহিদা যথেষ্ট বৃদ্ধি পাইছিল। গাঞ্জাৰ এই চাহিদা অক্ষুন্ন থকাৰ পিছতে গাঞ্জাৰ বজাৰখনত প্ৰৱেশৰ মন মেলিছে উবেৰে।
