দেশৰ উচ্চ শিক্ষাখণ্ডত এতিয়া উজান উঠিছে ভুৱা শিক্ষা প্ৰতিষ্ঠানৰ। শুকুৰবাৰে বিশ্ববিদ্যালয় অনুদান আয়োগে (UGC) দেশৰ এনে ২১ খন বিশ্ববিদ্যালয়ক ভুৱা ঘোষণা কৰিছে।
ইউজিচিৰ সচিব ৰজনীশ জৈনৰ ভাষ্য মতে ইউজিচি আইন উলংঘা কৰি কাম কৰি থকা কমেও ২১ খন স্বঘোষিত আৰু অস্বীকৃত প্ৰতিষ্ঠানক ভুৱা বিশ্ববিদ্যালয় হিচাপে ঘোষণা কৰা হৈছে।
এই প্ৰতিষ্ঠান সমূহক কোনো ডিগ্ৰী প্ৰদান কৰাৰ নীতিগত ক্ষমতা দিয়া হোৱা নাই বুলি বিশ্ববিদ্যালয় অনুদান আয়োগৰ সচিবগৰাকীয়ে লগতে উল্লেখ কৰিছে।
ইউজিচিয়ে দিল্লী, কৰ্ণাটক, কেৰালা, মহাৰাষ্ট্ৰ, পশ্চিম বংগ, উত্তৰ প্ৰদেশ, উৰিষ্যা, পুডুচেৰী আৰু অন্ধ্ৰ প্ৰদেশত চলি থকা মুঠ ২১ খন ভুৱা বিশ্ববিদ্যালয়ৰ এখন তালিকা প্ৰকাশ কৰিছে।
শুকুৰবাৰে প্ৰকাশ কৰা এক বিবৃতিত ইউজিচিয়ে কয়, “শিক্ষাৰ্থী আৰু জনসাধাৰণক ইয়াৰ দ্বাৰা জনোৱা হৈছে যে বৰ্তমান ইউজিচি আইন উলংঘা কৰি কাম কৰি থকা ২১ টা স্বঘোষিত, অস্বীকৃত প্ৰতিষ্ঠানক ভুৱা বিশ্ববিদ্যালয় হিচাপে ঘোষণা কৰা হৈছে আৰু এইবোৰক কোনো ডিগ্ৰী প্ৰদান কৰাৰ ক্ষমতা দিয়া হোৱা নাই।”
বিশ্ববিদ্যালয় অনুদান আয়োগে প্ৰকাশ কৰা তালিকাত থকা সৰ্বাধিক সংখ্যক ভুৱা বিশ্ববিদ্যালয় হৈছে দিল্লীৰ। দিল্লীত মুঠ ৮ খন ভুৱা বিশ্ববিদ্যালয় চিনাক্ত কৰিছে ইউজিচি- এ। আনহাতে ছয়খন ভুৱা বিশ্ববিদ্যালয়েৰে দ্বিতীয় স্থানত আছে উত্তৰ প্ৰদেশ।
দিল্লীত থকা আঠখন ভুৱা বিশ্ববিদ্যালয় হৈছে ক্ৰমে- অল ইণ্ডিয়া ইনষ্টিটিউট অৱ পাব্লিক এণ্ড ফিজিকেল হেল্থ চাইন্সেছ; কমাৰ্চিয়েল ইউনিভাৰ্চিটি লিমিটেড, দৰিয়াগঞ্জ; ইউনাইটেড নেচনচ্ ইউনাভাৰ্ছিটি; ভকেচনেল ইউনিভাৰ্ছিটি; এডিআৰ-চেণ্ট্ৰিক জুৰিডিকেল ইউনিভাৰ্ছিটি; ভাৰতীয় বিজ্ঞান আৰু অভিযান্ত্ৰিক প্ৰতিষ্ঠান; বিশ্বকৰ্মা অ’পেন ইউনিভাৰ্ছিটি ফৰ চেল্ফ এমপ্লইমেণ্ট এণ্ড আধ্যাত্মিক বিশ্ববিদ্যালয়।
ইউজিচিৰ মতে উত্তৰ প্ৰদেশত এনে সাতখন বিশ্ববিদ্যালয় আছে। এইকেইখন ক্ৰমে- গান্ধী হিন্দী বিদ্যাপীঠ, নেচ’নেল ইউনিভাৰ্ছিটি অৱ ইলেক্ট্ৰ’ কমপ্লেক্স হোমিঅ’পেথি, নেতাজী সুভাষ চন্দ্ৰ বসু বিশ্ববিদ্যালয় (মুক্ত বিশ্ববিদ্যালয়), ভাৰতীয় শিক্ষা পৰিষদ।
একেদৰে কৰ্ণাটক, মহাৰাষ্ট্ৰ, পুডুচেৰী, অন্ধ্ৰ প্ৰদেশ, উৰিষ্যা, পশ্চিম বংগ আৰু কেৰালাত থকা এনে ভুৱা বিশ্ববিদ্যালয়ৰ নামো বিশ্ববিদ্যালয় অনুদান আয়োগৰ তালিকাখনত উল্লেখ কৰা হৈছে।
