প্ৰথম দুই পৰ্যায়ৰ আলোচনাৰ বিফলতাৰ পিছত সোমবাৰে নিশা পুনৰ আলোচনাত মিলিত হয় ইউক্ৰেইন আৰু ৰাছিয়া। কিন্তু ফলাফলবিহীন ভাৱেই বেলাৰুছত তৃতীয় পৰ্যায়ৰ আলোচনাৰ অন্ত পৰে।
অৱশ্যে আলোচনাত কিয়েভক প্ৰতিনিধিত্ব কৰা এজন বিষয়ববীয়াই আলোচনা কিয়েভৰ বাবে ইতিবাচক আছিল বুলি মন্তব্য কৰিছে।
আনহাতে ৰাছিয়াৰ এজন প্ৰতিনিধিয়ে তৃতীয় পৰ্যায়ৰ আলোচনাই মস্কোৰ প্ৰত্যাশা পূৰণ কৰা নাই বুলি সংবাদ মাধ্যমৰ আগত প্ৰকাশ কৰে।
তৃতীয় পৰ্যায়ৰ আলোচনাত ইউক্ৰেইনৰ চহৰসমূহৰ পৰা সাধাৰণ নাগৰিকৰ স্থানান্তৰৰ বাবে মানৱীয় কৰিডৰ মুকলি কৰাৰ ওপৰত গুৰুত্ব দিয়া হৈছিল।
বৈঠকৰ পিছত ৰাছিয়াৰ প্ৰতিনিধি দলৰ মুৰব্বী ভ্লাদিমিৰ মেডিনস্কিয়ে কয়, “আলোচনাৰ পৰা আমাৰ প্ৰত্যাশা পূৰণ হোৱা নাছিল। আমি আশা কৰোঁ যে পৰৱৰ্তী সময়ত আমি অধিক গুৰুত্বপূৰ্ণ পদক্ষেপ ল’বলৈ সক্ষম হ’ম।”
অৱশ্যে কিয়েভৰ ৰাষ্ট্ৰপতিৰ উপদেষ্টা মিখাইলো পোডোলিয়াকে আলোচনাত ইউক্ৰেইনৰ সপক্ষে কিছু অগ্ৰগতি হোৱাৰ ইংগিত দি টুইট কৰি কয়, “মানৱীয় কৰিডৰ সন্দৰ্ভত আমি কিছু ইতিবাচক ফলাফল লাভ কৰিছো।”
উল্লেখ্য যে পূৰ্বৰ দুইবাৰৰ আলোচনাৰ পূৰ্বে ৰাছিয়াই ইউক্ৰেইনৰ সৈতে এক চুক্তিত উপনীত হোৱাৰ ইচ্ছা প্ৰকাশ কৰিছিল।
আনহাতে ইউক্ৰেইনে তাৎক্ষণিক যুদ্ধবিৰতিৰ লগতে ইউক্ৰেইনৰ পৰা ৰাছিয়াৰ সৈন্য বাহিনী প্ৰত্যাহাৰ দাবী কৰিছিল।
লগতে সাধাৰণ নাগৰিকৰ ওপৰত ৰাছিয়াক বোমাবৰ্ষণ বন্ধ কৰিবলৈ দাবী জনাইছিল ইউক্ৰেইনৰ ৰাষ্ট্ৰপতি ভলোডিমিৰ জেলেনস্কিয়ে।
