অসমৰ প্ৰতি কেন্দ্ৰীয় চৰকাৰৰ অৱহেলা আৰু অন্যায়ক কঠোৰ সমালোচনাৰে সংযুক্ত মুক্তি বাহিনী অসমে (স্বাধীন) শুকুৰবাৰে এক প্ৰেছ বিজ্ঞপ্তি প্ৰকাশ কৰে।
প্ৰেছ বিজ্ঞপ্তিটোত স্বাধীন অসমৰ যুক্তি উত্থাপন কৰি সংগঠনটোৱে পাকিস্তানৰ পৰা বাংলাদেশ স্বাধীন হৈ আজি পাকিস্তানতকৈ উন্নত দেশ হিচাপে প্ৰতিষ্ঠা লাভৰ উদাহৰণ উল্লেখ কৰে।
আনহাতে, অসমৰ সাম্প্ৰতিক বান পৰিস্থিতিৰ ভয়াবহতাৰ প্ৰতি লক্ষ্য ৰাখি প্ৰতিবছৰে হেজাৰ জনৰ মাটি-ভেঁটি উছন কৰা, বহুগৰাকীৰ প্ৰাণ কাঢ়ি নিয়া বানপানী কাৰ বাবে হৈ আছে সেই কথা অসমৰ জনসাধাৰণক গমি-পিতি চোৱাৰ বাবে আলফাই আহ্বান জনায়।
তদুপৰি, বিগত সময়ছোৱাত সংবাদ মাধ্যমৰ ভূমিকাৰ ওপৰতো প্ৰশ্ন তুলি সংগঠনটোৰ ফালৰ পৰা বিজ্ঞপ্তিটোত ম্যানমাৰত সংগঠনটোৰ দুই, এজন সদস্য স্বাস্থ্য জনিত কাৰণত মৃত্যু হোৱা বাতৰিক ভুল তথ্যৰে সংবাদমাধ্যমে প্ৰকাশ কৰা বাতৰিত সংগঠনটো ব্যথিত হৈ পৰিছে বুলি উল্লেখ কৰা হয়।
সংগঠনটোৱে উৰা বাতৰি বা সজা বাতৰি বিয়পি নপৰিবলৈ পুৰণিকলীয়া সংবাদ মাধ্যমৰ পুনৰ প্ৰচলনেৰে আৰু মুক্ত-সাংবাদিকতাৰে সচেতনতা বৰ্তাই ৰখাৰ প্ৰয়োজন আহি পৰিছে বুলি উল্লেখ কৰি বৰ্তমানৰ সংবাদ মাধ্যমৰ ধাৰাটোক তীব্ৰ সমালোচনা কৰে।
প্ৰেছ বিজ্ঞপ্তিটোত ভাৰতৰ প্ৰাক্তন গৃহমন্ত্ৰী ৰাজনাথ সিঙক সমালোচনা কৰি সংগঠনটোৱে কয় যে গৃহমন্ত্ৰীগৰাকীয়ে আলফাক দমন কৰিব পৰাটোৱে তেওঁৰ শ্ৰেষ্ঠ কৃতিত্ব বুলি ভাবে কিন্তু এনে দমন নীতিয়ে আলফাক পূৰ্বতকৈ শক্তিশালীহে কৰিছে।
বানপানী, সংবাদ মাধ্যমৰ ভূমিকা, বাংলাদেশক ভূমি হস্তান্তৰণ আদি বিষয়েৰে প্ৰকাশ কৰা আলফা(স্বাধীন)ৰ প্ৰেছ বিজ্ঞপ্তিয়ে যথেষ্ট তাৎপৰ্য্য বহন কৰিছে।
অসম চৰকাৰ আৰু ভাৰত চৰকাৰৰ গৃহ মন্ত্ৰালয়ৰ তৰফৰ পৰা পৰৱৰ্তী সময়ত কেনেদৰে ইয়াৰ প্ৰতিক্ৰিয়া প্ৰকাশ কৰে সেয়া লক্ষ্যণীয় হ’ব।