প্ৰথম বিশ্বৰ উন্নত দেশ আয়াৰলেণ্ডত শেহতীয়াকৈ এক বিশেষ ছবিয়ে ব্যাপক বিতৰ্কৰ সৃষ্টি কৰিছে। ছ’চিয়েল মিডিয়াত ভাইৰেল হোৱা এই ছবিখনক কেন্দ্ৰ কৰি দেশখনত ভাৰত বিৰোধী আৱেগ গঢ়ি উঠিছে। গলৱে বিশ্ববিদ্যালয়ৰ খাদ্য যোগান কাউণ্টাৰৰ সন্মুখত ছাত্ৰ-ছাত্ৰীৰ এক দীঘলীয়া শাৰী দেখা গৈছে য’ত বেছিভাগেই ভাৰতীয় শিক্ষাৰ্থী। এই ছবিখন ভাইৰেল হোৱাৰ পিছতে আইৰিছ নাগৰিকসকলৰ মাজত তীব্ৰ প্ৰতিক্ৰিয়াৰ সৃষ্টি হৈছে আৰু তেওঁলোকে ভাৰতীয় শিক্ষাৰ্থীসকলক লৈ বিভিন্ন কটু মন্তব্য কৰা পৰিলক্ষিত হৈছে।
আয়াৰলেণ্ডৰ বিশ্ববিদ্যালয়সমূহত ছাত্ৰ সংগঠনৰ তৰফৰ পৰা শিক্ষাৰ্থীসকলক কম মূল্যত বা বিনামূলীয়াকৈ খাদ্যৰ যোগান ধৰা হয়। আয়াৰলেণ্ডৰ দৰে ব্যয়বহুল দেশত পঢ়িবলৈ যোৱা বহু ভাৰতীয় শিক্ষাৰ্থীয়ে নিজৰ খৰচ ৰাহি কৰিবলৈ এই ফুড বেংকৰ ওপৰত নিৰ্ভৰ কৰে। কিন্তু এই দীঘলীয়া শাৰীৰ ছবিখনে স্থানীয় লোকসকলক ক্ষুব্ধ কৰি তুলিছে। বহু আইৰিছ নাগৰিকে ছ’চিয়েল মিডিয়াত লিখিছে যে ভাৰতীয়সকলে দেশখনত পঢ়িবলৈ অহাৰ আগতে নিজৰ থকা-খোৱাৰ খৰচ বহন কৰিব পৰাকৈ আৰ্থিকভাৱে স্বাৱলম্বী হোৱা উচিত আছিল। একাংশই আনকি এনেদৰেও কৈছে যে এই শাৰীত কেৱল ভাৰতীয়সকলকহে দেখা গৈছে আৰু আন কোনো বিদেশী শিক্ষাৰ্থী ইয়াত নাই।
এই সমগ্ৰ ঘটনাক কেন্দ্ৰ কৰি আয়াৰলেণ্ডত বৰ্ণবৈষম্যৰ গোন্ধ পোৱা গৈছে। একাংশ নেটিজেনে অত্যন্ত অপমানজনক মন্তব্য কৰিছে আৰু অভিবাসীসকলক চোৰ বুলিও অভিহিত কৰিছে। তেওঁলোকৰ মতে বিদেশী শিক্ষাৰ্থীসকলে দেশখনৰ চৰকাৰী আৰু সামাজিক সেৱাসমূহৰ অপব্যৱহাৰ কৰিছে যাৰ ফলত স্থানীয় লোকসকলৰ ওপৰত হেঁচা পৰিছে। বহুতে এতিয়া পোনপটীয়াকৈ ভাৰতীয়সকলক দেশৰ পৰা বাহিৰ কৰি দিয়াৰ দাবী তুলিছে। তেওঁলোকৰ মতে বাহিৰৰ পৰা অহা মানুহে আইৰিছ সন্তানসকলৰ ভৱিষ্যতৰ প্ৰতি ভাবুকি কঢ়িয়াই আনিছে।
বৰ্তমান সময়ত আয়াৰলেণ্ডত আকাশলংঘী মূল্যবৃদ্ধিৰ বাবে সাধাৰণ জনতাৰ জীৱন যাপন কঠিন হৈ পৰিছে। এনে পৰিস্থিতিত বিশ্ববিদ্যালয়সমূহে বিদেশী শিক্ষাৰ্থীক এনে সুযোগ দিয়াটোক একাংশই সহজভাৱে ল’ব পৰা নাই। স্থানীয় লোকসকলৰ মতে বিদেশী শিক্ষাৰ্থীসকলে দেশখনৰ সম্পদ লুটি লৈছে আৰু ইয়াৰ ফলত দেশৰ অৰ্থনীতি আৰু আস্থাত আঘাত লাগিছে। এই এটা ভাইৰেল ছবিয়ে এতিয়া আয়াৰলেণ্ডত থকা ভাৰতীয় শিক্ষাৰ্থীসকলৰ বাবে এক অস্বস্তিকৰ আৰু দুশ্চিন্তাৰ পৰিৱেশ সৃষ্টি কৰিছে।
