প্ৰতিষ্ঠিত ব্যৱসায়ী তথা ‘গৌতম কংষ্ট্ৰাকচন’ৰ অন্যতম সঞ্চালক উমেদ কুমাৰ সিংহী(৬৪) ৰ গুৱাহাটীৰ তৰুণ নগৰস্থিত বাসগৃহত হৃদক্ৰিয়া বন্ধ হৈ আকস্মিকভাৱে মৃত্যু হোৱাত চাপৰ-বিলাসীপাৰাতো শোকৰ ছাঁ পৰিছে।
উল্লেখযোগ্য যে প্ৰয়াত উমেদ কুমাৰ সিংহী অসম চৰকাৰৰ বিপণন নিগমৰ অধ্যক্ষ তথা বিলাসীপাৰা পূব সমষ্টিৰ প্ৰাক্তন বিধায়ক অশোক কুমাৰ সিংহীৰ জ্যেষ্ঠ ভাতৃ।
উমেদ কুমাৰ সিংহীয়ে মৃত্যুৰ পূৰ্বেই তেওঁৰ চকুযুৰি দান কৰি থৈ গৈছিল।
তেওঁৰ পত্নী ৰেণু দেৱী, পুত্ৰ ৰোহিত, আকাশ আৰু সন্দীপৰ সহমতত আৰু গুৱাহাটীৰ তেৰাপন্থ যুৱক পৰিষদৰ সহযোগত শংকৰ নেত্ৰালয়ৰ ‘আই বেংকে’ আজি পুৱা তেওঁৰ চকুজুৰি সংগ্ৰহ কৰে।
গুৱাহাটীৰ ভূতনাথ শ্মশানত তেওঁৰ অন্তেষ্টিক্ৰিয়া সম্পন্ন হয় বুলি অশোক কুমাৰ সিংহীয়ে অৱগত কৰিছে।
তেওঁৰ মৃত্যুত চাপৰ প্ৰেছ ক্লাব, বিজেপিৰ জ্যেষ্ঠ নেতা উমেশ ৰায়, এ ডি সি নবজিৎ পাঠক , প্ৰাক্তন ৱাৰ্ড( বিলাসীপাৰা ) আয়ুক্ত চন্দন দাস, চাপৰ প্ৰেছ ক্লাবৰ সম্পাদক ছাজিদ হুছেইন , বিশিষ্ট সাংবাদিক বিজয় কুমাৰ শৰ্মা , বিশিষ্ট কবি ধীমান দাস , শিক্ষয়িত্ৰী চয়নিকা ৰায় , ৰেজান হৰ’ ,ধুবুৰী জিলা সাহিত্য সভাৰ মুখপাত্ৰ তিলক চন্দ্ৰ প্ৰসাদ আদিকে ধৰি বিভিন্ন অনুষ্ঠান- প্ৰতিষ্ঠানে গভীৰ শোক প্ৰকাশ কৰি শোক সন্তপ্ত পৰিয়ালবৰ্গলৈ সমবেদনা জ্ঞাপন কৰিছে।
উল্লেখ্য যে প্ৰাক্তন বিধায়ক অশোক কুমাৰ সিংহীৰ জ্যেষ্ঠ ভাতৃ উমেদ কুমাৰ সিংহীৰ বিয়োগত সিংহী পৰিয়ালৰ ফালৰ পৰা গুৱাহাটী তেৰাপন্থ ভৱনত শ্ৰদ্ধাঞ্জলি জ্ঞাপন কৰি বিদেহ আত্মাৰ চিৰশান্তি কামনা কৰা হয় ।
