ভাৰতত চলি থকা কৃষক আন্দোলন, সাংবাদিকসকলৰ ওপৰত দেশদ্ৰোহীতাৰ গোচৰ আৰু সামাজিক মাধ্যমত ভাৱপ্ৰকাশৰ বাধাআৰোপক কেন্দ্ৰ কৰি ৰাষ্ট্ৰসংঘৰ মানৱ অধিকাৰ আয়োগে মাত মাতিছে।
আয়োগৰ আয়ুক্ত মিচেল বেচেলেটে শুকুৰবাৰে কয় যে তেওঁ কৃষক আন্দোলনটোক লক্ষ্য কৰি আছে।
তেওঁ আশা কৰে কৃষক আৰু কেন্দ্ৰীয় চৰকাৰে আলোচনাৰ মাধ্যমেৰে আন্দোলনটোৱে উপস্থাপন কৰা বিষয়সমূহ সমাধা হ’ব।
তদুপৰি সাংবাদিক-ৰাজহুৱা কৰ্মীসকলৰ ওপৰত দেশদ্ৰোহীতাৰ গোচৰ আৰু সামাজিক মাধ্যমকেন্দ্ৰীক বাধা-নিষেধসমূহে মানৱ অধিকাৰক মূলগতভাৱে অৱদমিত কৰা বুলিও তেওঁ কয়।
সামাজিক মাধ্যম টুইটাৰকো কেন্দ্ৰীয় চৰকাৰে নিজৰ দখলত আনিবলৈ চেষ্টা কৰিছিল। আনকি আন্দোলনকাৰী সংগঠন কিষাণ একতা মৰ্চাৰ টুইটাৰ একাউণ্টটোকো ব্লক কৰিবলৈ চৰকাৰে টুইটাৰৰ ওচৰত দাবী জনাইছিল।
আনহাতে আয়ুক্তগৰাকীয়ে কৰোণা মহামাৰীৰ সময়ত ভাইৰাছৰ ক্ষীপ্ৰ টেষ্টিঙৰ বাবে কেৰেলা চৰকাৰে লোৱা ‘‘পাইলট প্ৰগ্ৰেম’’ক প্ৰশংসা কৰি কয় যে ই পিছপৰা লোকসকলৰ বাবে সুবিধাজনক হৈ পৰিছে।
আয়ুক্তগৰাকীয়ে কাশ্মীৰ সন্দৰ্ভতো আয়োগৰ স্থিতি স্পষ্ট কৰি কৈছে যে ইণ্টাৰনেট যোগাযোগৰ ক্ষেত্ৰত বাধা-নিষেধ আৰু ৰাজহুৱা কৰ্মীসকলৰ ওপৰত ভাৰত চৰকাৰৰ দমনমূলক পদক্ষেপসমূহক আয়োগে চোকা নজৰ ৰাখিছে।
আয়ুক্তগৰাকীৰ এই বক্তব্যৰ পাছতে ৰাষ্ট্ৰসংঘৰ ভাৰতৰ প্ৰতিনিধি মণি পাণ্ডেই ভাৰত চৰকাৰৰ কৃষি আইন তিনিখনৰ সমৰ্থনত কয় যে ইয়াৰ দ্বাৰা চৰকাৰে ২০২৪ চনৰ ভিতৰত কৃষকৰ আয় দুগুণ কৰিব বিচাৰিছে।
তেওঁ কয় যে আইন তিনিখনে ক্ষুদ্ৰ কৃষকসকলক উপকৃত কৰিব। তদুপৰি চৰকাৰে কৃষকৰ প্ৰতিবাদটোক যথাযোগ্য সন্মান প্ৰদৰ্শন কৰি অহা বুলিও তেওঁ জনায়।
আয়োগৰ কাশ্মীৰকেন্দ্ৰীক স্থিতিকো সমালোচনা কৰি ভাৰতৰ প্ৰতিনিধি মণি পাণ্ডেই কয় যে ভাৰত চৰকাৰৰ এই পদক্ষেপসমূহক জম্মু কাশ্মীৰৰ নাগৰিকৰ লগতে সমগ্ৰ ভাৰতৰ জনতাই আদৰণি জনাইছে।
আয়ুক্তগৰাকীৰ বক্তব্যক তথ্যভিত্তিক আৰু নিৰপেক্ষ নহয় বুলিও তেওঁ ক্ষোভিত হৈ পৰে।
উল্লেখযোগ্য যে ২৬ জানুৱাৰীৰ ট্ৰেক্টৰ ৰেলী সম্পৰ্কত কেইবাজনো সাংবাদিকক ‘ভুৱা বাতৰি’ পৰিবেশনৰ বাবে বিজেপিশাসিত ৰাজ্যসমূহে এজাহাৰ দাখিল কৰাৰ উপৰিও সাংবাদিক মনদীপ পুনিয়াক সিংঘু বৰ্ডাৰত কৰ্মৰত অৱস্থাতে আটক কৰা হৈছিল।
সামাজিক মাধ্যম টুইটাৰকো কেন্দ্ৰীয় চৰকাৰে নিজৰ দখলত আনিবলৈ চেষ্টা কৰিছিল। আনকি আন্দোলনকাৰী সংগঠন কিষাণ একতা মৰ্চাৰ টুইটাৰ একাউণ্টটোকো ব্লক কৰিবলৈ চৰকাৰে টুইটাৰৰ ওচৰত দাবী জনাইছিল।