ৰাছিয়া আৰু ইউক্ৰেইনৰ মাজত অব্যাহত থকা সংঘাতৰ চতুৰ্থ বৰ্ষপূৰ্তিত মঙলবাৰে ৰাষ্ট্ৰসংঘৰ সাধাৰণ পৰিষদত এক গুৰুত্বপূৰ্ণ শান্তি প্ৰস্তাৱ গৃহীত হয়। দুয়োখন দেশৰ মাজত তৎকালীন, পূৰ্ণাংগ আৰু চৰ্তহীন যুদ্ধবিৰতিৰ আহ্বান জনাই ইউক্ৰেইনে উত্থাপন কৰা এই প্ৰস্তাৱটোৰ সপক্ষে সংখ্যাগৰিষ্ঠ দেশে মতদান কৰে যদিও, ১৯৩ জনীয়া পৰিষদৰ এই নিৰ্ণায়ক ভোটদান প্ৰক্ৰিয়াৰ পৰা ভাৰতকে ধৰি ৫১ খন দেশে নিজকে আঁতৰাই ৰাখি এক নিৰপেক্ষ স্থিতি গ্ৰহণ কৰে।
উল্লেখ্য যে ‘ইউক্ৰেইনত স্থায়ী শান্তিৰ সমৰ্থন’ শীৰ্ষক এই প্ৰস্তাৱটোৰ সপক্ষে ১০৭ খন দেশে ভোটদান কৰাৰ বিপৰীতে ১২ খন দেশে ইয়াৰ বিৰোধিতা কৰে। ভাৰতৰ লগতে আমেৰিকা যুক্তৰাষ্ট্ৰ, চীন, বাংলাদেশ, শ্ৰীলংকা, ব্ৰাজিল, দক্ষিণ আফ্ৰিকা, বাহৰেইন আৰু সংযুক্ত আৰৱ আমিৰশ্বাহী আদিৰ দৰে ৫১ খন ৰাষ্ট্ৰই এই ভোটদান প্ৰক্ৰিয়াৰ পৰা নিজকে আঁতৰাই ৰাখে। অৱশ্যে বৃহৎ সংখ্যক দেশে ভোটদানৰ পৰা বিৰত থকাৰ পাছতো সৰহসংখ্যক সদস্য ৰাষ্ট্ৰৰ সমৰ্থনত প্ৰস্তাৱটো সাধাৰণ পৰিষদত আনুষ্ঠানিকভাৱে গৃহীত হয়।
কিয়েভে উত্থাপন কৰা এই প্ৰস্তাৱটোত ৰাষ্ট্ৰসংঘৰ চনদ আৰু আন্তঃৰাষ্ট্ৰীয় আইনৰ আধাৰত ইউক্ৰেইনত এক সৰ্বাংগীন, ন্যায়সংগত আৰু স্থায়ী শান্তি প্ৰতিষ্ঠাৰ আহ্বান জনোৱা হৈছে। পাৰস্পৰিক বিশ্বাস গঢ়ি তোলাৰ এক গুৰুত্বপূৰ্ণ পদক্ষেপ হিচাপে যুদ্ধবন্দীসকলৰ সম্পূৰ্ণ বিনিময়ৰ লগতে বেআইনীভাৱে বন্দী কৰি ৰখা লোকসকলৰ মুক্তিৰ দাবী জনোৱা হৈছে। তদুপৰি, বলপূৰ্বকভাৱে স্থানান্তৰিত কৰা অসামৰিক লোক তথা শিশুসকলক নিৰাপদে ঘূৰাই দিয়াৰ ওপৰতো প্ৰস্তাৱটোত বিশেষ গুৰুত্ব আৰোপ কৰা হৈছে।
আন্তঃৰাষ্ট্ৰীয়ভাৱে স্বীকৃত সীমাৰ ভিতৰত ইউক্ৰেইনৰ জলভাগকে ধৰি সমগ্ৰ অঞ্চলটোৰ সাৰ্বভৌমত্ব, স্বাধীনতা, একতা আৰু ভূখণ্ডগত অখণ্ডতাৰ প্ৰতি প্ৰস্তাৱটোত দৃঢ় সমৰ্থন ব্যক্ত কৰা হৈছে। ৰাছিয়াই সাধাৰণ নাগৰিক, অসামৰিক আন্তঃগাঁথনি আৰু গুৰুত্বপূৰ্ণ শক্তি প্ৰকল্পসমূহৰ ওপৰত অব্যাহত ৰখা তীব্ৰ আক্ৰমণৰ ফলত ইউক্ৰেইনত সৃষ্টি হোৱা ভয়াৱহ মানৱীয় সংকটক লৈয়ো ৰাষ্ট্ৰসংঘৰ এই প্ৰস্তাৱত গভীৰ উদ্বেগ প্ৰকাশ কৰা হৈছে।
