ৰাছিয়াৰ ৰাষ্ট্ৰপতি ভ্লাদিমিৰ পুটিনে ঘোষণা কৰিছে যে তেওঁলোকে ভাৰতক সু-৫৭ যুদ্ধবিমান যোগান ধৰিবলৈ সম্পূৰ্ণ সাজু হৈছে। বৰ্তমান সময়ত নতুন দিল্লীয়ে প্ৰতিৰক্ষা ব্যৱস্থা শক্তিশালী কৰিবলৈ পঞ্চম প্ৰজন্মৰ অত্যাধুনিক যুদ্ধবিমানৰ সন্ধান কৰি থকাৰ সময়তে পুটিনৰ এই প্ৰস্তাৱ যথেষ্ট গুৰুত্বপূৰ্ণ হিচাপে বিবেচিত হৈছে। ইয়াৰ লগতে তেওঁ জনাইছে যে ভাৰতৰ উন্নত প্ৰতিৰক্ষা ব্যৱস্থাৰ বাবে প্ৰয়োজনীয় গুৰুত্বপূৰ্ণ প্ৰযুক্তি হস্তান্তৰ কৰিবলৈও মস্কো মান্তি হৈছে।
সংবাদ মাধ্যমৰ সৈতে হোৱা বাৰ্তালাপত পুটিনে কয় যে ইয়াৰ পূৰ্বেও ৰাছিয়াই ভাৰতক যুটীয়াভাৱে সু-৫৭ যুদ্ধবিমান নিৰ্মাণৰ প্ৰস্তাৱ দিছিল। কিন্তু ২০১৮ চনত ভাৰতে সেই প্ৰকল্পৰ পৰা আঁতৰি আহিছিল। পুটিনৰ মতে, সেই সময়ত ভাৰতীয় বন্ধুসকলে তেওঁলোকক নিজাববীয়াকৈ আগবাঢ়ি যাবলৈ কৈছিল আৰু ভৱিষ্যতে একেলগে কাম কৰাৰ সম্ভাৱনা মুকলি ৰাখিছিল। এতিয়া ৰাছিয়াই নিজেই এই বিমান তৈয়াৰ কৰি উলিয়াইছে যদিও তেওঁলোকে এতিয়াও ভাৰতৰ সৈতে কাম কৰিবলৈ আগ্ৰহী। এই মন্তব্যৰ জৰিয়তে পুটিনে পশ্চিমীয়া দেশসমূহক এক প্ৰকাৰ বুজাই দিব বিচাৰিছে যে দুয়োখন দেশৰ মাজত প্ৰতিৰক্ষা সহযোগিতাৰ ক্ষেত্ৰত কোনো বাধা থাকিব নোৱাৰে।
উল্লেখযোগ্য যে ৰাছিয়াৰ সুখোই ডিজাইন ব্যুৰোৰ দ্বাৰা নিৰ্মিত এই সু-৫৭ যুদ্ধবিমানখনে আকাশ, স্থল আৰু সাগৰৰ যিকোনো লক্ষ্যস্থানত নিখুঁতভাৱে আঘাত হানিব পাৰে। অতি বেয়া বতৰ আৰু ইলেক্ট্ৰনিক যুদ্ধৰ পৰিস্থিতিতো দিন-ৰাত ২৪ ঘণ্টাই যুঁজ দিয়াৰ ক্ষমতা আছে এই বিমানখনৰ। আটাইতকৈ ডাঙৰ কথাটো হ’ল ইয়াৰ কম দৃশ্যমানতা, অৰ্থাৎ ই শত্ৰুৰ উন্নত ৰাডাৰকো অতি সহজে ফাঁকি দিব পাৰে। বিশেষজ্ঞসকলৰ মতে, এনে ধৰণৰ শক্তিশালী যুদ্ধবিমান ভাৰতৰ হাতলৈ আহিলে চীন আৰু পাকিস্তানৰ নিদ্ৰা হৰণ হোৱাটো নিশ্চিত।
আনহাতে আমেৰিকাৰ সৈতে চলি থকা শুল্ক যুদ্ধৰ বিষয়তো ৰাছিয়াই নিজৰ বন্ধু দেশ ভাৰতৰ পক্ষতে থিয় দিছে। সাংবাদিক সন্মিলনত পুটিনে কয় যে ভাৰত বৰ্তমান বিশ্বৰ অন্যতম শ্ৰেষ্ঠ আৰু দ্ৰুতগতিত বৃদ্ধি পোৱা অৰ্থনীতি। প্ৰধানমন্ত্ৰী নৰেন্দ্ৰ মোদীৰ বলিষ্ঠ নেতৃত্ব আৰু ভাৰত চৰকাৰৰ কঠোৰ পৰিশ্ৰমৰ বাবেই এইয়া সম্ভৱ হৈ উঠিছে। নিজৰ ৰাষ্ট্ৰীয় স্বাৰ্থ ৰক্ষা কৰি ভাৰতে বিশ্বৰ বেছিভাগ দেশৰ সৈতে দ্বিপাক্ষিক সম্পৰ্ক গঢ়ি তুলিবলৈ চেষ্টা কৰিছে আৰু ই এক অত্যন্ত ফলপ্ৰসূ পদক্ষেপ বুলিও পুটিনে প্ৰশংসা কৰে।
