ওদালগুৰি চহৰৰ পৰা প্ৰায় ২০ কি.মি উত্তৰ-পশ্চিম দিশৰ ভাৰত-ভূটান সীমান্তত অৱস্থিত আমজুলিৰ মধ্য ইংৰাজী বিদ্যালয়ত স্বাধীনতা দিৱসৰ বিৰোধিতাৰে বুধবাৰে কোনো দুৰ্বৃত্তই ক’লা পতাকা উৰুৱাক কেন্দ্ৰ কৰি অঞ্চলটোত এক চেপা উত্তেজনাময় পৰিৱেশৰ সৃষ্টি হয়।
উল্লেখ্য যে কালি ৭২ সংখ্যক স্বাধীনতা দিৱস উপলক্ষে বিদ্যালয়ৰ শিক্ষক-কৰ্মচাৰী, ছাত্ৰ-ছাত্ৰীৰ লগতে স্থানীয় ৰাইজে পতাকা উত্তোলন কৰিবলৈ আহি বিদ্যালয়ত উৰি থকা দেখে ক’লা পতাকা। লগে লগে স্কুল কৰ্তৃপক্ষই ক’লা পতাকাখন আঁতৰাই পেলায়।
ইয়াৰ পাছত ঘটনাস্থলীত ওদালগুৰিৰ অতিৰিক্ত আৰক্ষী অধীক্ষক অভিজিৎ গৌতমৰ নেতৃত্বত হৰিশিঙা আৰক্ষীৰ এটা দল উপস্থিত হৈ পৰিস্থিতিৰ বুজ লোৱাৰ লগতে পতাকাখন জব্দ কৰে।
ঘটনা সন্দৰ্ভত অতিৰিক্ত আৰক্ষী অধীক্ষক গৰাকীৰ পৰা সবিশেষ জানিব বিচৰাত সংবাদ মাধ্যমৰ আগত তেওঁ কোনো ধৰণৰ মন্তব্য দিয়া পৰিলক্ষিত নহ’ল।
ভাৰত-ভূটান সীমান্তত অৱস্থিত উক্ত বিদ্যালয়খনত কোনে এনেধৰণৰ ঘটনা সংঘটিত কৰিব পাৰে সেয়া এতিয়াও পোহৰলৈ অহা নাই যদিও আৰক্ষীয়ে তদন্ত অব্যাহত ৰখা বুলি জানিবলৈ দিছে।
