অসমৰ চাহ উদ্যোগকলৈ বিভিন্ন আঁচনি আৰু পদক্ষেপলৈ থকাৰ সময়তে এইবাৰ উক্ত উদ্যোগক শক্তিশালী আৰু প্ৰতিযোগিতামূলক কৰাৰ বাবে আগবাঢ়ি আহিছে ৰাষ্ট্ৰসংঘৰ উদ্যোগিক বিকাশ সংস্থা। এই সন্দৰ্ভত অলপতে গোলাঘাট নগৰৰ বেঙেনাখোৱাস্থিত নৰ্থ ইষ্টাৰ্ন টী এছ’চিয়েশ্যনৰ কাৰ্যালয়ত এক কৰ্মশালা সম্পন্ন হৈ যায়।
যোৱা ৪ ডিচেম্বৰত অনুষ্ঠিত হোৱা ৰাষ্ট্ৰসংঘৰ ঔদ্যোগিক বিকাশ সংস্থাৰ কৰ্মশালাখনত উক্ত আঁচনিৰ বিষয়ে আলোচনা কৰা হয়। জানিব পৰা মতে ভাৰত চৰকাৰৰ মিনিষ্ট্ৰী অৱ মাইক্ৰ, স্মল এণ্ড মেডিয়াম এণ্টাৰপ্ৰাইছেছে ৰাষ্ট্ৰসংঘৰ উদ্যোগিক বিকাশ সংস্থাৰ সহযোগত উক্ত পদক্ষেপ লৈছে। এইক্ষেত্ৰত আৰ্থিক সহায় আগবঢ়াব গ্লোবেল এনভাইৰ’মেণ্ট ফেচিলিটিয়ে আৰু ইয়াৰ বাবে প্ৰকল্পটোক “Promoting Market Transformation for Energy Efficiency in Micro, Small and Medium Energy Efficiency Services Limited ” হিচাবে নামাকৰণ কৰিছে।
উক্ত প্ৰকল্পক কাৰ্যকৰী কৰিব ভাৰত চৰকাৰৰ শক্তি বিভাগৰ অন্তৰ্গত এনাৰ্জি এফিচিএণ্ট ছাৰ্ভিচেজ লিমিটেড নামৰ এক অনুষ্ঠানে। উক্ত প্ৰকল্পৰ সফল ৰূপায়নৰ বাবে যোৰহাট, গোলাঘাট, শিৱসাগৰ, ডিব্ৰুগড় আৰু তিনিচুকীয়া জিলাত থকা ক্ষুদ্ৰ, সৰু আৰু মধ্যমীয়া চাহ উদ্যোগসমূহক সামৰি “যোৰহাট টী ক্লাষ্টাৰ” গঠন কৰিব বুলিও জানিবলৈ দিছে। নৰ্থ ইষ্টাৰ্ন টী এছ’চিয়েশ্যনলৈ সমৰ্থন আগবঢ়োৱা উক্ত প্ৰকল্প সম্পৰ্কত অনুষ্ঠিত কৰ্মশালাত আৰম্ভণিতে ‘নেতা’ৰ অধ্যক্ষ নেপুল শইকীয়াই আদৰণি ভাষণ আৰু উদ্দেশ্য ব্যাখ্যা কৰে।
অনুষ্ঠানত ৰাষ্ট্ৰ সংঘৰ উদ্যোগিক বিকাশ সংস্থাৰ তৰফৰ পৰা প্ৰকল্প সমন্বয় ক দেৱজিত দাস, ডি ই এছ এলৰ অৰিন্দম মুখাৰ্জী, ই ই এছ এলৰ জ্যেষ্ঠ কাৰিকৰী বিশেষজ্ঞ মৃণাল সৌৰভ ভাস্কৰ আদিয়ে বিশদ ব্যাখ্যা কৰে। কৰ্মশালাৰ সামৰণিত ‘নেতা’ৰ উপাধ্যক্ষ সুনীল জালানে বক্তব্য প্ৰদান কৰে।
