কেৰালা ৰাজ্যৰ নাম সলনিৰ যি দীৰ্ঘদিনীয়া দাবী আছিল সেয়া এতিয়া পূৰণ হোৱাৰ পথত আগবাঢ়িছে। ৰাজধানী দিল্লীৰ চৰকাৰী মহলত এই বিষয়ে বিশেষ চৰ্চা আৰম্ভ হৈছে। প্রধানমন্ত্রী নৰেন্দ্ৰ মোদীৰ নতুন কাৰ্যালয় সেৱা তীৰ্থত আজি কেন্দ্ৰীয় মন্ত্ৰীসভাৰ এখন গুৰুত্বপূৰ্ণ বৈঠক অনুষ্ঠিত হ’ব পাৰে।
সূত্ৰৰ খবৰ অনুসৰি কেৰালা বিধানসভাই প্ৰেৰণ কৰা কেৰালাম নামকৰণৰ প্ৰস্তাৱটো এই বৈঠকত আলোচনাৰ বাবে উত্থাপন হোৱাৰ পূৰ্ণ সম্ভাৱনা আছে। দক্ষিণ ব্লকত যোৱা ১৩ ফেব্ৰুৱাৰীত হোৱা বৈঠকৰ পাছত এয়া হ’ব সেৱা তীৰ্থত অনুষ্ঠিত হ’বলগীয়া প্ৰথমখন উচ্চ পৰ্যায়ৰ বৈঠক য’ত এই বিষয়টোৱে অগ্ৰাধিকাৰ পাব পাৰে।
ৰাজ্যখনৰ মুখ্যমন্ত্ৰী পিনাৰাই বিজয়নে বহু দিনৰ পৰাই এই নাম সলনিৰ পক্ষত যুক্তি দি আহিছে। তেওঁৰ মতে মালায়ালম ভাষাত ৰাজ্যখনক কেৰালাম বুলি কোৱা হয় যদিও ভাৰতীয় সংবিধানৰ প্ৰথম অনুসূচীত ইয়াৰ নাম কেৰালা বুলিহে লিপিবদ্ধ হৈ আছে। বিজয়নে উল্লেখ কৰিছে যে স্বাধীনতা আন্দোলনৰ সময়ৰে পৰা মালায়ালম ভাষী লোকসকলৰ সপোন আছিল এখন অখণ্ড কেৰালাম গঠন কৰা। সেই ঐতিহাসিক পটভূমি আৰু স্থানীয় মানুহৰ আৱেগক সন্মান জনাই ৰাজ্যখনৰ নাম সলনি কৰাটো প্ৰয়োজনীয় বুলি তেওঁ গণ্য কৰে। সংবিধানৰ ৩ নং অনুচ্ছেদ অনুসৰি এই সংশোধনী আনিবলৈ তেওঁ কেন্দ্ৰীয় চৰকাৰৰ ওচৰত জোৰদাৰ দাবী জনাইছে।
নাম সলনিৰ এই প্ৰচেষ্টা কেৰালা চৰকাৰে পূৰ্বেও কৰিছিল। পিনাৰাই বিজয়ন চৰকাৰে ইয়াৰ আগতেও এবাৰ এই প্ৰস্তাৱ দিল্লীলৈ পঠিয়াইছিল যদিও কেন্দ্ৰীয় গৃহ মন্ত্ৰালয়ে কিছু কাৰিকৰী সালসলনিৰ পৰামৰ্শ দিছিল। সেই নিৰ্দেশনা অনুসৰিয়েই যাৱতীয় সংশোধন কৰি যোৱা ২৪ জুনত ৰাজ্যিক বিধানসভাত দ্বিতীয়বাৰৰ বাবে এই প্ৰস্তাৱ সৰ্বসন্মতিক্ৰমে গৃহীত কৰা হয়। এই প্ৰস্তাৱৰ মূল উদ্দেশ্য হ’ল সংবিধানৰ অষ্টম অনুসূচীত থকা সকলো ভাষাতে যাতে ৰাজ্যখনৰ নাম কেৰালাম হিচাপে চৰকাৰী স্বীকৃতি লাভ কৰে।
কেৰালাৰ আগন্তুক বিধানসভা নিৰ্বাচনলৈ মাত্ৰ এসপ্তাহ বাকী থকা অৱস্থাত এই বিষয়টোৱে বিশেষ ৰাজনৈতিক তাৎপৰ্য বহন কৰিছে। নিৰ্বাচনৰ ঠিক আগে আগে এই আৱেগিক বিষয়ত কেন্দ্ৰীয় চৰকাৰে সন্মতি প্ৰদান কৰিলে ইয়াৰ প্ৰভাৱ ভোটযুদ্ধতো পৰিব পাৰে। যদি বিজেপি নেতৃত্বাধীন কেন্দ্ৰীয় চৰকাৰে এই প্ৰস্তাৱত মোহৰ মাৰে তেন্তে ইয়াক স্থানীয় সংস্কৃতি আৰু ভাষাৰ প্ৰতি দিল্লীৰ সন্মান হিচাপে দেখা যাব। এতিয়া সকলোৰে চকু আজিৰ বৈঠকৰ ওপৰত কাৰণ কেন্দ্ৰীয় মন্ত্ৰীসভাৰ সেউজ সংকেট পালেই সংবিধান সংশোধনৰ কাম আৰম্ভ হ’ব আৰু ভাৰতৰ মানচিত্ৰৰ পৰা কেৰালা নামটো চিৰদিনৰ বাবে আঁতৰি গৈ কেৰালাম হিচাপে পৰিচিত হ’ব।
