বিগত ২২ মাহত ৰে’ল দুৰ্ঘটনাৰ ফলত কোনো লোকৰ মৃত্যু হোৱা নাই বুলি শুকুৰবাৰে লোকসভাত তথ্য দাঙি ধৰে কেন্দ্ৰীয় ৰে’ল মন্ত্ৰী পিযুষ গোৱেলে।
‘‘ৰে’ল দুৰ্ঘটনাৰ ফলত অন্তিমগৰাকী যাত্ৰীৰ মৃত্যু হৈছিল ২০১৯ বৰ্ষৰ ২২ মাৰ্চত,’’ গোৱেলে লোকসভাত কয়।
আনহাতে, বিজেপি নেতৃত্বাধীন কেন্দ্ৰীয় চৰকাৰখনে ৰে’লযাত্ৰী সকলৰ সুৰক্ষাৰ বিষয়টোক আটাইতকৈ বেছি অগ্ৰাধিকাৰ দিছে বুলিও গোৱেলে লগতে কয়।
‘‘বিগত ছয় বছৰত আমি সুৰক্ষাৰ ক্ষেত্ৰত অধিকতকৈ অধিক গুৰুত্ব আৰোপ কৰিছো,’’ কেন্দ্ৰীয় ৰে’ল মন্ত্ৰীৰ মন্তব্য।
লোকসভাত ৰে’ল বাজেটৰ বিষয়ে উল্লেখ কৰিব গৈ পিযুষ গোৱেলে এইদৰে মত প্ৰকাশ কৰে।
ৰে’লৰ দুৰ্ঘটনা ৰোধ কৰাৰ ক্ষেত্ৰত ৰে’ল লাইন, ৰে’ল দলং আদিৰ পৰ্যবেক্ষণ ইত্যাদি বিষয়ত যথেষ্ট গুৰুত্ব আৰোপ কৰা হৈছে বুলিও গোৱেলে মন্তব্য কৰে।
আনহাতে, অতি শীঘ্ৰে ৰে’লৱে বোৰ্ডৰ গুৰুত্বপূৰ্ণ বিকাশ সাধন কৰা হ’ব বুলিও তেওঁ লগতে কয়।
