ইউনাইটেড খ্ৰীষ্টান ফ’ৰাম (ইউচিএফ)ৰ শেহতীয়া এক সমীক্ষাত প্ৰকাশিত তথ্যত দেখা গৈছে ভাৰতত খ্ৰীষ্টানৰ ওপৰত উগ্ৰ হিন্দুত্ববাদীৰ হিংসাত্মক আক্ৰমণৰ ঘটনা ক্ৰমশঃ বৃদ্ধি পাইছে। ফ’ৰামে প্ৰকাশ কৰা তথ্যৰ মতে ২০২২ চনত ভাৰতত খ্ৰীষ্টান ধৰ্মাৱলম্বীৰ বিৰুদ্ধে সংঘটিত হিংসাত্মক আক্ৰমণৰ ঘটনাই পূৰ্বৰ সকলো অভিলেখকে অতিক্ৰম কৰিছে।
যোৱা ২৬ নৱেম্বৰত প্ৰকাশ পোৱা তথ্য অনুসৰি চলিত বৰ্ষৰ ২১ নৱেম্বৰলৈকে দেশত খ্ৰীষ্টানসকলৰ বিৰুদ্ধে প্ৰায় ৫১১টা হিংসাত্মক ঘটনা সংঘটিত হৈছে। ২০২১ চনত সংঘটিত এনে হিংসাত্মক ঘটনাৰ সংখ্যা আছিল ৫০৫ টা।
উল্লেখ্য, ২০১৫ চনৰ জানুৱাৰী মাহত খ্ৰীষ্টান ভুক্তভোগীসকলক আইনী প্ৰতিকাৰৰ সুবিধা লাভ কৰাত সহায়ক হোৱাকৈ এটা টোল ফ্ৰী নম্বৰ মুকলি কৰা হৈছিল। ইউচিএফ উক্ত হেল্পলাইন নম্বৰে সংগ্ৰহ কৰা তথ্যৰ ভিত্তিত এই প্ৰতিবেদন প্ৰস্তুত কৰিছে।
প্ৰতিবেদনখনৰ মতে এই হিংসাত্মক ঘটনাবোৰৰ মাজত আছে প্ৰাৰ্থনাত বাধা জন্মোৱা, খ্ৰীষ্টান ধৰ্মাৱলম্বী লোকক প্ৰত্যক্ষভাৱে আক্ৰমণ কৰা, যাজক আৰু তেওঁলোকৰ আত্মীয়ৰ ওপৰত আক্ৰমণৰ লগতে গীৰ্জা ভাঙি পেলোৱা আদি।
যোৱা পাঁচ বছৰৰ ইউচিএফৰ তথ্যসমূহৰ পৰা এইটো স্পষ্ট হৈছে যে খ্ৰীষ্টানসকলৰ বিৰুদ্ধে হিংসাত্মক আক্ৰমণৰ ঘটনা ক্ৰমাৎ বৃদ্ধি পাইছে। ২০১৮ চনত এনে ঘটনা ২৯২ টা হোৱাৰ বিপৰীতে ২০১৯ চনত ৩২৮ টালৈ বৃদ্ধি পায়।
আনহাতে, ২০২০ চনত ক’ভিদ পৰিস্থিতিৰ বাবে লকডাউন বলৱৎ কৰাৰ সময়তো ২৭৯ টাকৈ এনে আক্ৰমণৰ ঘটনা সংঘটিত হৈছিল। ইফালে ২০২১ চনত দেশত এই সংখ্যা প্ৰায় দুগুণ বৃদ্ধি পাই ৫০৫ টা হৈছিলল আৰু ২০২২ চনত ই ৫১১ টালৈ বৃদ্ধি পায়।
সমীক্ষাটোৰ মতে বিজেপি শাসিত ৰাজ্যসমূহ এনে আক্ৰমণ ঘটনা অধিক পৰিমাণে সংঘটিত হৈছে। চলিত বৰ্ষত যোগী আদিত্যনাথৰ শাসিত উত্তৰ প্ৰদেশত ১৪৯ টা আৰু ভূপেশ বাঘেলৰ শাসিত ছত্তিশগড়ত ১১৫ টা আক্ৰমণৰ ঘটনা সংঘটিত হৈছে।
চলিত বৰ্ষত ছেপ্টেম্বৰ আৰু মে’ মাহত খ্ৰীষ্টানসকলৰ বিৰুদ্ধে সৰ্বাধিক হিংসাৰ ঘটনা সংঘটিত হৈছে। ছেপ্টম্বৰত ৬৪ টাৰ বিপৰীতে মে’ত ৬১ টা এনেধৰণৰ ঘটনা সংঘটিত হয়।
উত্তৰ-পূৰ্বাঞ্চলৰ ৰাজ্যসমূহৰ ভিতৰত মেঘালয় আৰু ত্ৰিপুৰাত এনে আক্ৰমণৰ এটাকৈ ঘটনা সংঘটিত হোৱাৰ বিপৰীতে অসমত দুটাকৈ ঘটনা সংঘটিত হৈছিল।
দক্ষিণ ভাৰতৰ ৰাজ্যসমূহৰ ভিতৰত কৰ্ণাটক আৰু তামিলনাডুত খ্ৰীষ্টানসকলৰ বিৰুদ্ধে ৩০টাকৈ আক্ৰমণৰ সংঘটিত হৈছে। ইয়াৰ বিপৰীতে কেৰেলা আৰু পুডুচেৰীত খ্ৰীষ্টানসকলৰ ওপৰত আক্ৰমণৰ কোনো ঘটনা সংঘটিত হোৱা নাই যদিও অন্ধ্ৰপ্ৰদেশত ৬ টা আৰু তেলেংগানাত ৪ টা এনে আক্ৰমণ সংঘটিত হয়।
মুঠৰ ওপৰত দেখা গৈছে যে উগ্ৰ হিন্দুত্ববাদীসকলে কেৱল মুছলমানৰ ওপৰতে ধৰ্মীয় আক্ৰমণ সংঘটিত কৰি ক্ষান্ত থকা নাই। খ্ৰীষ্টানৰ বিৰুদ্ধেও এনে আক্ৰমণৰ ঘটনা ক্ৰমশঃ বৃদ্ধি পাইছে। এইটো নক’লেও হ’ব যে কেন্দ্ৰত বিজেপিয়ে শাসনলৈ অহাৰ পাছৰে পৰা দেশত ধৰ্মীয় অহিষ্ণুতা আৰু উগ্ৰ হিন্দুত্ববাদীৰ আক্ৰমণৰ ঘটনা ক্ৰমশঃ বৃদ্ধি পাবলৈ ধৰিছে। UCFৰ এই সমীক্ষাও এই কথাটোকে প্ৰমাণ কৰিছে।
