ক’ৰ’না ভাইৰাছ সন্দৰ্ভত বিশ্ব স্বাস্থ্য সংস্থাই চীনৰ পক্ষলোৱাৰ অভিযোগ তুলি আমেৰিকা যুক্তৰাষ্ট্ৰৰ ৰাষ্ট্ৰপতি ড’নাল্ড ট্ৰাম্পে বিশ্ব স্বাস্থ্য সংস্থালৈ আমেৰিকা যুক্তৰাষ্ট্ৰই প্ৰেৰণ কৰি অহা সাহায্য বন্ধ কৰাৰ বাবে ট্ৰাম্প প্ৰশাসনক নিৰ্দেশ দিছে বুলি ঘোষণা কৰাৰ পাছতে এই সন্দৰ্ভত মত প্ৰকাশ কৰিছে ৰাষ্ট্ৰসংঘৰ সচিৱ প্ৰধান জেনেৰেল এণ্টনিঅ’ গুৱেটৰেজে।
ট্ৰাম্পৰ ঘোষণাৰ পাছতে সচিৱ প্ৰধান গৰাকীয়ে প্ৰতিক্ৰিয়া ব্যক্ত কৰি ভাইৰাছৰ বিৰুদ্ধে যুদ্ধৰ সময়ত এয়া সম্পদ হ্ৰাস কৰাৰ সময় নহয় বুলি মন্তব্য কৰে।
‘‘ভাইৰাছৰ বিৰুদ্ধে যুদ্ধৰ সময়ত এয়া আমাৰ সম্পদ হ্ৰাস কৰাৰ সময় নহয়। এয়া সকলোৱে সংঘবদ্ধ হৈ আন্তৰাষ্ট্ৰীয় সম্প্ৰদায়ে একেলগে কাম কৰাৰ সময়,’’ গুৱেটৰেজৰ মন্তব্য ।
উল্লেখযোগ্য যে, মাৰ্কিন ৰাষ্ট্ৰপতি ট্ৰাম্পে ক’ৰ’না ভাইৰাছৰ সংক্ৰমণ ৰোধৰ ক্ষেত্ৰত আগতীয়া সতৰ্কতা অৱলম্বনত বিশ্ব স্বাস্থ্য সংস্থা ব্যৰ্থ হোৱা আৰু চীনৰ পক্ষ লোৱা সন্দৰ্ভত বিশ্ব স্বাস্থ্য সংস্থাক সমালোচনা কৰি আমেৰিকাই আগবঢ়াই অহা সাহায্য কৰ্তন কৰিব বুলি কৈছিল।
ইয়াৰ পূৰ্বে ট্ৰাম্পৰ সিদ্ধান্তৰ প্ৰতিক্ৰিয়া ব্যক্ত কৰি বিশ্ব স্বাস্থ্য সংস্থাৰ মুখ্য সচিৱ গৰাকীয়ে বিশ্বৰ সামূহিক ঐক্যৰ বাবে আহ্বান জনাইছিল।
আমেৰিকা যুক্তৰাষ্ট্ৰই বিশ্ব স্বাস্থ্য সংস্থাৰ অকলেই ১৫ শতাংশ সাহায্য প্ৰদান কৰি আহিছে।
