শিৱসাগৰৰ ঐতিহাসিক শিৱদ’লত শ্ৰী শ্ৰী মহা শিৱৰাত্ৰী আৰু আন্তঃৰাষ্ট্ৰীয় শিৱ মহোৎসৱৰ ব্যাপক প্ৰস্তুতি।
শিৱসাগৰৰ ঐতিহাসিক শিৱদ’লত অহা ২০ ফেব্ৰুৱাৰীৰ পৰা ২৩ ফেব্ৰুৱাৰীলৈকে চাৰিদিনীয়া কাৰ্যসূচীৰে অনুষ্ঠিত হব শ্ৰী শ্ৰী মহা শিৱৰাত্ৰী আৰু আন্তঃৰাষ্ট্ৰীয় শিৱ মহোৎসৱ।
আজি শিৱদ’ল চৌহদত অনুষ্ঠিত এক সংবাদ মেলত এই কথা ব্যক্ত কৰে দ’ল উন্নয়ন পৰিষদ আৰু শ্ৰী শ্ৰী শিৱৰাত্ৰী আৰু আন্তঃৰাষ্ট্ৰীয় শিৱ উৎসৱ উদযাপন সমিতিয়ে।
২০ ফেব্ৰুৱাৰীৰ পৰা আৰম্ভ হ’বলগীয়া শিৱৰাত্ৰী আৰু আন্তঃৰাষ্ট্ৰীয় শিৱ মহোৎসৱৰ শুভ উদ্ধোধন কৰিব অসমৰ ৰাজ্যপাল জগদীশ মুখীয়ে।
শ্ৰী শ্ৰী শিৱৰাত্ৰী আৰু আন্তঃৰাষ্ট্ৰীয় শিৱ মহোৎসৱ উপলক্ষে প্ৰস্তুত কৰা ‘বৰ্জমন্ত্ৰ’ নামৰ স্মৃতিগ্ৰন্থখন উন্মোচন কৰিব অসমীয়া প্ৰতিদিন কাকতৰ পৰিচালন সঞ্চালক জয়ন্ত বৰুৱাই।
ইফালে শিৱৰাত্ৰী আৰু আন্তঃৰাষ্ট্ৰীয় শিৱ মহোৎসৱত উত্তৰ পূৰ্বাঞ্চলৰ বিভিন্ন সাংস্কৃতিক দলে জাতীয় জনগোষ্ঠীয় অনুষ্ঠান পৰিৱেশন কৰাৰ লগতে নেপালৰ পৰা আমন্ত্ৰণ কৰা সাংস্কৃতিক দলে অনুষ্ঠান পৰিবেশন কৰিব বুলি উদ্যোক্তসকলে জানিবলৈ দিয়ে।
সাংস্কৃতিক কাৰ্যসূচীত কোঁচ ৰাজবংশীৰ চালী নৃত্য, ভাংৰা নৃত্য, মিচিং জনগোষ্ঠীৰ ঐনিতম, তাই নৃত্য, গাৰো, তিৱা, কাৰ্বি, মণিপুৰী, ৰাজস্থানী নৃত্যৰ লগতে নগা আৰু গোৰ্খা সাংস্কৃতিক দলে অংশ গ্ৰহণ কৰাৰ লগতে প্ৰতিদিনে শিৱ বন্দনা কৰা হ’ব।
আনহাতে শেষৰ দিনা অৰ্থাৎ ২৩ ফেব্ৰুৱাৰীত ‘হৰি হৰৰ যুদ্ধ আৰু বানৰ পৰাজয়’ ভাওনা প্ৰদৰ্শন কৰা হ’ব।
এইবাৰ আন্তঃৰাষ্ট্ৰীয় শিৱ মহোৎসৱৰ সাংস্কৃতিক কাৰ্যসূচী দ’লমুখ চাৰিআলিস্থিত ভাৰত ৰত্ন সুধাকন্ঠ ড০ ভূপেন হাজৰিকাৰ প্ৰতিমূৰ্তিৰ সন্মুখত অনুষ্ঠিত কৰা হ’ব।
শিৱসাগৰৰ ঐতিহাসিক শিৱদ’লত অনুষ্ঠিত শ্ৰী শ্ৰী মহাশিৱৰাত্ৰী আৰু আন্তঃৰাষ্ট্ৰীয় শিৱ মহোৎসৱৰ চাৰিওটা দিনৰ কাৰ্যসূচীত সকলো ভক্তপ্ৰাণ ৰাইজক অংশগ্ৰহণ কৰিবলৈ আহ্বান জনায়।