সমাজৰ পৰা কু-সংস্কাৰ তথা অন্ধবিশ্বাস দূৰীকৰণৰ লগতে বিজ্ঞানমনস্কতাৰ প্ৰসাৰত আটাইতকৈ মুখ্য ভূমিকা পালন কৰে শিক্ষানুষ্ঠানসমূহে। পিছে উত্তৰ প্ৰদেশৰ এখন চৰকাৰী বিদ্যালয়ে এই ভূমিকা গ্ৰহণৰ পৰিৱৰ্তে অন্ধবিশ্বাসৰহে আশ্ৰয় লৈ সৃষ্টি কৰিছে তীব্ৰ বিতৰ্কৰ।
ৰাজ্যখনৰ মাহ’বা জিলাৰ এখন চৰকাৰী বিদ্যালয়ত অধ্যয়নৰত ১৫ গৰাকী ছাত্ৰী মধ্যাহ্ন ভোজন কৰি অসুস্থ হৈ পৰাৰ পাছতে চিকিৎসাৰ বাবে মাতি আনে এগৰাকী তান্ত্ৰিক। এই খবৰ প্ৰকাশ পোৱাৰ পাছতে ৰাষ্ট্ৰীয় মানৱ অধিকাৰ আয়োগে উত্তৰ প্ৰদেশ চৰকাৰলৈ জাননী জাৰি কৰিছে।
প্ৰকাশিত খবৰ অনুসৰি সংবাদ মাধ্যমত প্ৰকাশ পোৱা এই ঘটনাৰ সত্যতা মানৱ অধিকাৰ আয়োগে পৰ্যবেক্ষণ কৰিছে। যদি এই ঘটনা সঁচা হয়, বিদ্যালয় কৰ্তৃপক্ষই অসুস্থ ছাত্ৰীসকলক চিকিৎসাৰ বাবে চিকিৎসালয়লৈ নিয়াৰ পৰিৱৰ্তে এনেদৰে তান্ত্ৰিকৰ সহায় লৈ চৰকাৰী বিদ্যালয় এখনত অন্ধবিশ্বাসক উদগনি যোগোৱাৰ লগতে ছাত্ৰ-ছাত্ৰীসকলৰ মানৱ অধিকাৰ উলংঘন কৰা হৈছে বুলি আয়োগে উল্লেখ কৰিছে।
আয়োগে উত্তৰ প্ৰদেশ চৰকাৰৰ মুখ্য সচিবলৈ জাননী জাৰি কৰি চাৰি সপ্তাহৰ ভিতৰত ঘটনা সন্দৰ্ভত বিশদ প্ৰতিবেদন দাখিল কৰিবলৈ নিৰ্দেশ দিছে। ভৱিষ্যতে ৰাজ্যত যাতে এই ধৰণৰ ঘটনা পুনৰ সংঘটিত নহয়, তাৰ বাবে গ্ৰহণ কৰা বা গ্ৰহণ কৰিবলগীয়া পদক্ষেপসমূহ প্ৰতিবেদনত অন্তৰ্ভুক্ত কৰিবলৈও আয়োগে নিৰ্দেশনা জাৰি কৰিছে।
আয়োগে লগতে ছাত্ৰ-ছাত্ৰীসকল এইদৰে অসুস্থ হৈ পৰাৰ মূলতে নিম্ন মানদণ্ডৰ মধ্যাহ্ন ভোজন পৰিবেশন কৰা হৈছিল নেকি সেই বিষয়টো গুৰুত্ব প্ৰদান কৰিছে। যদি এনে হৈছে, এনে কাৰ্যই সংশ্লিষ্ট কৰ্তৃপক্ষৰ উদাসীনতাৰ ইংগিত দিয়ে বুলি আয়োগে লগতে জাননীখনত উল্লেখ কৰিছে।
যোৱা ২১ ডিচেম্বৰত সংবাদ মাধ্যমত প্ৰকাশ পোৱা বাতৰি অনুসৰি, অসুস্থ ছাত্ৰীসকলক এক তান্ত্ৰিকে তন্ত্ৰ-মন্ত্ৰৰে চিকিৎসা কৰা এটা ভিডিঅ’ আৰক্ষীৰ দৃষ্টিগোচৰ হৈছিল আৰু ইয়াৰ পাছতে আৰক্ষীয়ে তান্ত্ৰিকগৰাকীক বিদ্যালয়ৰ পৰা খেদি পঠিয়াই অসুস্থ ছাত্ৰীসকলক চিকিৎসাৰ বাবে স্থানীয় সামূহিক স্বাস্থ্য কেন্দ্ৰলৈ লৈ গৈছিল।
অসুস্থ ছাত্ৰীসকলৰ অধিকাংশই ৯ বছৰৰ পৰা ১৩ বছৰ বয়সৰ ভিতৰত আছিল বুলি বাতৰিত প্ৰকাশ পাইছিল।
