জনসাধাৰণৰ সুৰক্ষাৰ দায়িত্বত নিয়োজিত খোদ আৰক্ষীৰ ওচৰতে সুৰক্ষিত নহয় মহিলা আৰক্ষী।
আকৌ এবাৰ পুৰুষ আৰক্ষীয়ে সতীৰ্থ মহিলা আৰক্ষীক ধৰ্ষণ কৰাৰ খবৰ আহিছে।
ঘটনাটো সংঘটিত হাছে যোগী আদিত্যনাথৰ শাসিত উত্তৰ প্ৰদেশত।
বুধবাৰে উত্তৰ প্ৰদেশ আৰক্ষীয়ে প্ৰকাশ কৰিছে যে ৰাজ্যখনৰ গুন্দা জিলাৰ এগৰাকী আৰক্ষী কনিষ্ঠবলে এগৰাকী সতীৰ্থ মহিলা আৰক্ষীক ধৰ্ষণ কৰাৰ অভিযোগ উত্থাপন হৈছে।
আৰক্ষী বিষয়া চাইলেশ কুমাৰ পাণ্ডেই প্ৰকাশ কৰা অনুসৰি যোৱা ১০ জানুৱাৰীত আৰক্ষী কনিষ্ঠবলজনে মহিলা আৰক্ষীগৰাকীক নিজৰ ৰুমটো দেখুওৱাবলৈ নিয়াৰ চলেৰে নি ধৰ্ষণ কৰে বুলি অভিযোগ উত্থাপন কৰিছে মহিলা আৰক্ষীগৰাকীয়ে।
আৰক্ষী কনিষ্ঠবলজনে ঘটনাটো গোপনে ৰাখিবলৈ মহিলা আৰক্ষীগৰাকীক ভাবুকি প্ৰদান কৰে বুলিও অভিযোগ উত্থাপন কৰিছে।
ইতিমধ্যে মহিলা আৰক্ষীগৰাকীৰ অভিযোগৰ ভিত্তিত আৰক্ষীয়ে ধৰ্ষণৰ অভিযুক্ত আৰক্ষী কনিষ্ঠবলজনৰ বিৰুদ্ধে গোচৰ পঞ্জীয়ন কৰিছে।
ইফালে মহিলা আৰক্ষীগৰাকীৰো স্বাস্থ্য পৰীক্ষা কৰোৱা হৈছে বুলি প্ৰকাশ কৰিছে আৰক্ষী বিষয়া পাণ্ডেই।
