চলিত বৰ্ষৰ মে’ মাহত ভাৰতত ইউনিফাইড পেমেন্টছ ইন্টাৰফেচ (ইউপিআই)ৰ লেনদেনে নতুন অভিলেখ স্থাপন কৰিছে। নেচনেল পেমেন্টছ কৰ্পৰেশ্যন অৱ ইণ্ডিয়া (এনপিচিআই)ৰ তথ্য অনুসৰি এপ্ৰিল মাহত দেশত ইউ পি আইৰ লেনদেনৰ পৰিমাণ আছিল ২৩.৯৪ লাখ কোটি টকা। এই মাহত ১,৭৮৯.৩ কোটি লেনদেন কৰা হৈছে। মে’ মাহত ১৮৬৭.৭ কোটি লেনদেন হৈছিল। মুঠ লেনদেন ২৫.১৪ লাখ কোটি টকা। যোৱা বছৰ মে’ মাহত ২০.৪৪ লাখ কোটি টকা আছিল। অৰ্থাৎ যোৱা বছৰৰ তুলনাত চলিত বৰ্ষৰ মে’ মাহত ইউপিআইৰ লেনদেন ২৩% বৃদ্ধি পাইছে।
এনপিচিআইৰ তথ্যই ইউপিআইৰ জনপ্ৰিয়তা আৰু ভাৰতৰ ডিজিটেল অৰ্থনীতিৰ দ্ৰুত বিকাশৰ প্ৰতিফলন ঘটাইছে বুলি ক’ব পাৰি। বিত্তীয় লেনদেনৰ কোম্পানী ‘স্পাইচ মানি’ৰ প্ৰতিষ্ঠাপক তথা মুখ্য কাৰ্যবাহী বিষয়া দিলীপ মোদীৰ মতে, এই অভূতপূৰ্ব বৃদ্ধি ভাৰতৰ ডিজিটেল পেমেন্ট ব্যৱস্থাৰ নিৰ্ভৰযোগ্যতা আৰু গ্ৰহণযোগ্যতাৰ প্ৰমাণ। ইউপিআইয়ে সাধাৰণ মানুহৰ দৈনন্দিন জীৱনত গুৰুত্বপূৰ্ণ ভূমিকা পালন কৰিছে। ইউপিআইৰ তাৎক্ষণিক লেনদেনৰ সুবিধা, ওপেন ছ’ৰ্চ এপিআই, আৰু ভাৰতীয় ৰিজাৰ্ভ বেংকৰ নিয়ন্ত্ৰণে ইয়াক বিশ্বৰ শীৰ্ষ ৰিয়েল-টাইম পেমেন্ট প্লেটফৰ্ম হিচাপে প্ৰতিষ্ঠিত কৰিছে।
ইয়াৰ সমান্তৰাল ভাবে ইউপিআই লাইটৰ দৰে নতুন বৈশিষ্ট্য আৰু অটো-পে’ৰ দৰে সুবিধাই গুৰুত্বপূৰ্ণ ভূমিকা পালন কৰিছে। ইউপিআই লাইটে ইণ্টাৰনেট সংযোগ অবিহনে কম মূল্যৰ লেনদেনৰ সুবিধা প্ৰদান কৰে, যাৰ ফলত গ্ৰামাঞ্চলতো ইয়াৰ ব্যৱহাৰ বৃদ্ধি পাইছে। অসমতো ইউপিআইৰ জনপ্ৰিয়তা দ্ৰুতগতিত বাঢ়িছে, বিশেষকৈ তৰুণ প্ৰজন্ম আৰু সৰু ব্যৱসায়ীসকলৰ মাজত। এনপিচিআইৰ তথ্যই ভাৰতৰ ডিজিটেল লেনদেনৰ ভৱিষ্যতৰ উজ্জ্বল সম্ভাৱনাৰ ইংগিত বহন কৰিছে।
