বিয়াৰ প্ৰতিশ্ৰুতি দি সহবাস কৰাৰ পিছত সম্পৰ্ক ভাঙি যোৱাৰ ফলত ধৰ্ষণৰ গোচৰ ৰুজু কৰাৰ প্ৰবণতা বৃদ্ধি পোৱাত চিন্তিত হৈছে উচ্চতম ন্যায়ালয়। শীৰ্ষ আদালতে এনে ধৰণৰ অভিযোগৰ সত্যতা নিৰূপণ কৰোঁতে বিশেষ সতৰ্কতা অৱলম্বন কৰিবলৈ পৰামৰ্শ দিছে। আৰু প্ৰেমৰ সম্পৰ্ক ভাঙি যোৱাৰ পিছত ধৰ্ষণৰ গোচৰ ৰুজু কৰা উচিত নহয় বুলি মত প্ৰকাশ কৰিছে উচ্চতম ন্যায়ালয়ে।
যদি কোনো প্ৰেমৰ সম্পৰ্কৰ সঠিক পৰিণতি নঘটে আৰু ই ভাঙি যায়, তেন্তে স্বাভাৱিকতে ইয়াক ধৰ্ষণ বুলি গণ্য কৰিব নোৱাৰি। বৰ্তমানৰ সমাজত নৈতিক মূল্যবোধৰ পৰিৱৰ্তন হৈছে, সেই অনুসৰি এই বিষয়টোৰ প্ৰতি বিশেষ গুৰুত্ব দিব লাগে বুলি উল্লেখ কৰিছে ন্যায়াধীশ এম এম সুন্দৰ আৰু ন্যায়াধীশ ৰাজেশ বিন্দলৰ এখন বিচাৰপীঠে।
এজন যুৱকৰ আবেদনৰ শুনানিৰ সময়ত এই মন্তব্য প্ৰদান কৰে ন্যায়ালয়ে।
অভিযোগকাৰীগৰাকীয়ে দাবী কৰিছিল যে, বিয়াৰ মিছা প্ৰতিশ্ৰুতি দি তেওঁক প্ৰতাৰণা কৰি সহবাস কৰা হৈছিল। উচ্চতম ন্যায়ালয়ে গোচৰৰ শুনানিৰ গ্ৰহণ কৰি কয় “আপুনি যদি ইমানেই সৰল হ’লেহেঁতেন, তেন্তে ইয়ালৈ অহাৰ প্ৰয়োজন নহ’লহেঁতেন। আপুনি তেতিয়া প্ৰাপ্তবয়স্ক আছিল। আপোনাক বিয়াৰ মিছা প্ৰতিশ্ৰুতি দি প্ৰতাৰণা কৰা হৈছে বুলি ক’ব নোৱাৰি।
সকলোৰে প্ৰতি যথাযথ সন্মান জনাই ন্যালয়ে উল্লেখ কৰে যে আজিৰ যুৱ প্ৰজন্মৰ নৈতিকতাৰ এক বেলেগ ধাৰণা আছে। এনে ধৰণৰ অভিযোগ গ্ৰহণ কৰা মানে কলেজৰ ছাত্ৰ-ছাত্ৰীসকলৰ স্বাভাৱিক প্ৰেমৰ সম্পৰ্ককো শাস্তিযোগ্য কৰি তোলা হ’ব। এইবোৰ গোচৰৰ মূলতে এক ৰক্ষণশীল মানসিকতা থাকে বুলি উচ্চতম ন্যায়ালয়ে মত প্ৰকাশ কৰিছে।
