সোমবাৰে ওমানৰ ওচৰত এখন বাণিজ্যিক জাহাজত আমেৰিকাৰ সেনাই আক্ৰমণ চলায়। সেই জাহাজখনত ২৪ জন ভাৰতীয় নাৱিক আছিল। অৱশ্যে এই ঘটনাত তেওঁলোকৰ কোনো ক্ষতি হোৱা নাই। এই ঘটনাৰ পিছত আমেৰিকাই আক্ৰমণৰ দায়িত্ব স্বীকাৰ কৰিছে। আমেৰিকাৰ সেনাই জনাইছে যে যুদ্ধৰ বাবে যি নৌ অৱৰোধ জাৰি কৰা হৈছিল, সেই নিয়ম উলংঘা কৰি জাহাজখন ইৰাণৰ বন্দৰৰ ফালে গৈ আছিল। সেই কাৰণেই জাহাজখনত এই আক্ৰমণ চলোৱা হৈছে।
মাদাগাস্কাৰৰ পতাকা থকা এই বাণিজ্যিক জাহাজখনৰ নাম হৈছে এম টি মাৰিভেক্স। জাহাজখন কৰ্ণাটকৰ কাৰৱাৰৰ পৰা ওমানৰ দুকাম অভিমুখে যাত্ৰা কৰিছিল। সোমবাৰে দুপৰীয়া হৰমুজ প্ৰণালীৰ পৰা কিছু দূৰত ওমানৰ উপকূলত জাহাজখন আক্ৰমণৰ সন্মুখীন হয়। আমেৰিকাৰ সেনাই জাহাজখনলৈ লক্ষ্য কৰি গুলীচালনা কৰে। সাগৰৰ মাজতেই জাহাজখনত জুই জ্বলি উঠে। জাহাজখনত থকা আটাইকেইজন ভাৰতীয় নাৱিকক উদ্ধাৰ কৰি নিৰাপদ স্থানলৈ লৈ যোৱা হয়।
এই ঘটনাৰ চৌবিশ ঘণ্টাৰ ভিতৰতেই আমেৰিকাৰ কেন্দ্ৰীয় কমাণ্ডে এক বিবৃতি জাৰি কৰে। বিবৃতিটোত কোৱা হৈছে যে বৰ্তমান যুদ্ধৰ পৰিস্থিতিৰ বাবে হৰমুজত নৌ অৱৰোধ জাৰি কৰা হৈছে। কিন্তু জাহাজখনে আমেৰিকাৰ সেনাৰ নিৰ্দেশ অমান্য কৰি ইৰাণৰ ফালে আগবাঢ়ি গৈছিল। ইয়াৰ পিছতেই যুদ্ধবিমান কঢ়িওৱা ৰণতৰী আব্ৰাহাম লিংকনৰ পৰা বাণিজ্যিক জাহাজখনলৈ লক্ষ্য কৰি অস্ত্ৰ নিক্ষেপ কৰা হয়। আমেৰিকাৰ সেনাই লগতে জনাইছে যে যোৱা তেৰ এপ্ৰিলত অৱৰোধ আৰম্ভ হোৱাৰ পৰা তেওঁলোকে নিয়ম উলংঘা কৰা সাতখন জাহাজ বিকল কৰি দিছে। আনহাতে নিয়ম মানি চলা এশ চৌত্ৰিশখন জাহাজক আন পথেৰে পঠিওৱা হৈছে আৰু মানৱীয় সাহায্য প্ৰদান কৰা বিয়াল্লিছখন জাহাজক নিৰাপদে পাৰ হোৱাৰ অনুমতি দিয়া হৈছে।
