শুকুৰবাৰে (২৬ ছেপ্টেম্বৰ) বৈদেশিক পৰিক্ৰমা মন্ত্ৰালয়ে প্ৰকাশ কৰা অনুসৰি জানুৱাৰী মাহৰ পৰা ২৪০০ৰো অধিক ভাৰতীয়ক আমেৰিকাৰ পৰা বিতাড়িত কৰা হৈছে।
দ্য হিন্দুত প্ৰকাশিত এক প্ৰতিবেদন অনুসৰি বৈদেশিক পৰিক্ৰমা মন্ত্ৰালয়ৰ মুখপাত্ৰ ৰণধীৰ জয়ছৱালে কয় যে ভাৰত অবৈধ অনুপ্ৰৱেশৰ বিৰোধী আৰু মানুহে আইনী প্ৰক্ৰিয়াৰে যাত্ৰা কৰাটো বিচাৰে।
জয়ছোৱালে কয় যে জানুৱাৰী মাহৰ পৰা ২৪১৭ জন ভাৰতীয়ক আমেৰিকাৰ পৰা বিতাড়িত কৰা হৈছে।
জানিব পৰা মতে, তিনি দশক ধৰি আমেৰিকাত বাস কৰা পঞ্জাৱৰ ৭৩ বছৰীয়া শিখ মহিলা হৰ্জীত কৌৰক আমেৰিকা কৰ্তৃপক্ষই বিতাড়িত কৰাৰ পাছতে পুনৰবাৰ বিতাড়নৰ বিষয়টো চৰ্চালৈ আহিছে।
এই সন্দৰ্ভত ৰনধীৰ জয়ছৱালে কয় যে ২০২৫ চনৰ ২০ জানুৱাৰীৰ পৰা আমেৰিকা প্ৰশাসনে হৰ্জীত কৌৰকে ধৰি ২৪১৭ জন ভাৰতীয়ক বিতাড়িত কৰিছে।
জয়ছোৱালৰ মতে, যেতিয়া কোনো দেশত কোনো ব্যক্তিক আইনী মৰ্যাদা নোহোৱাকৈ পোৱা যায় আৰু ভাৰতীয় নাগৰিক বুলি দাবী কৰে তেতিয়া তেওঁলোকৰ নথি-পত্ৰ পৰীক্ষা কৰি তেওঁলোকৰ ৰাষ্ট্ৰীয়তআ নিশ্চিত কৰাৰ পাছতহে ভাৰতে তেওঁলোকক ঘূৰাই লয়।
জয়ছৱালে লগতে কয় যে আমেৰিকাৰ পৰা বিতাড়নৰ সৈতে এই প্ৰক্ৰিয়া অব্যাহত আছে।
তেওঁ লগতে উল্লেখ কৰে যে ভাৰতে ভিছা জালিয়াতি আৰু অন্যান্য গোচৰকে ধৰি অবৈধ প্ৰব্ৰজন ৰোধৰ বাবে নিজৰ প্ৰচেষ্টা শক্তিশালী কৰাৰ বাবে অবিৰতভাৱে কাম কৰি আছে। ইয়াৰ অংশ হিচাপে ৰাজ্য চৰকাৰসমূহৰ সহযোগত অবৈধ প্ৰব্ৰজনক প্ৰসাৰিত কৰাসকলৰ বিৰুদ্ধে ব্যৱস্থা গ্ৰহণ কৰা হৈছে।
বিবৃতিত বৈদেশিক পৰিক্ৰমা মন্ত্ৰালয়ে ভাৰতীয় নাগৰিকসকলক দক্ষিণ-পূব এছিয়াৰ সন্দেহজনক কৰ্মসংস্থাপনৰ সুযোগৰ পৰা আঁতৰি থাকিবলৈও সকীয়াই দিয়ে।
উল্লেখযোগ্য যে ড’নাল্ড ট্ৰাম্পে দ্বিতীয়বাৰৰ বাবে কাৰ্যভাৰ গ্ৰহণ কৰাৰ পাছত আমেৰিকাত অবৈধভাৱে বসবাস কৰা ১০৪ জন বিতাড়িত লোকক লৈ প্ৰথমখন আমেৰিকাৰ সামৰিক বিমান ৫ ফেব্ৰুৱাৰীত অমৃতসৰৰ শ্ৰীগুৰু ৰাম দাস জী আন্তঃৰাষ্ট্ৰীয় বিমানবন্দৰত অৱতৰণ কৰে।
আমেৰিকাৰ পৰা অহা দ্বিতীয়খন বিমানত মুঠ ১১৬ জন ভাৰতীয়ক বিতাড়িত কৰা হৈছিল, ইয়াৰে ৬৭ জন পঞ্জাৱৰ, ৩৩ জন হাৰিয়ানাৰ, ৮ জন গুজৰাটৰ পৰা, ৩ জন উত্তৰ প্ৰদেশৰ পৰা, দুজনকৈ গোৱা, মহাৰাষ্ট্ৰ, আৰু ৰাজস্থানৰ পৰা, আৰু এজনকৈ হিমাচল প্ৰদেশ আৰু কাশ্মীৰৰ।
একেধৰণৰ ক্ৰমত ১৬ ফেব্ৰুৱাৰীৰ নিশা ১০ বজাৰ ওচৰত বিতাড়িত লোকক লৈ তৃতীয়খন আমেৰিকাৰ সামৰিক বিমান ভাৰতত উপস্থিত হয়। এই বিমানত থকা ১১২ জন বিতাড়িত লোকৰ ভিতৰত ৪৪ জন হাৰিয়ানাৰ, ৩৩ জন গুজৰাটৰ, ৩১ জন পঞ্জাৱৰ, ২ জন উত্তৰ প্ৰদেশৰ, আৰু এজনকৈ হিমাচল প্ৰদেশ আৰু উত্তৰাখণ্ডৰ।
