জি-চেভেন সন্মিলনৰ পাছত ফ্ৰান্সৰ ৰাষ্ট্ৰপতি ইমানুৱেল মেক্ৰ‘নৰ সৈতে নৈশভোজৰ সময়ত চুক্তিত স্বাক্ষৰ আমেৰিকাৰ ৰাষ্ট্ৰপতি ডনাল্ড ট্ৰাম্পৰ, ত্ৰিশ দিনৰ ভিতৰত ইৰাণৰ পৰা নৌ-অৱৰোধ প্ৰত্যাহাৰৰ প্ৰতিশ্ৰুতি আমেৰিকাৰ
মধ্যপ্ৰাচ্যত চলি থকা সংঘাতৰ অৱসান ঘটোৱাৰ লক্ষ্যৰে আমেৰিকা যুক্তৰাষ্ট্ৰ আৰু ইৰাণে এক ঐতিহাসিক শান্তি চুক্তিত স্বাক্ষৰ কৰিছে। জি-চেভেন সন্মিলনৰ পাছত ফ্ৰান্সৰ ৰাষ্ট্ৰপতি ইমানুৱেল মেক্ৰ‘নৰ সৈতে পেৰিছৰ ভাৰ্ছেলছ প্ৰাসাদত আয়োজিত এক নৈশভোজৰ সময়ত আমেৰিকাৰ ৰাষ্ট্ৰপতি ডনাল্ড ট্ৰাম্পে এই চুক্তিত স্বাক্ষৰ কৰে। এই চুক্তিৰ জৰিয়তে যোৱা ২৮ ফেব্ৰুৱাৰীত আমেৰিকা আৰু ইজৰাইলৰ আক্ৰমণৰ পাছত ইৰাণত আৰম্ভ হোৱা প্ৰায় ১১০ দিনীয়া যুদ্ধখনৰ আনুষ্ঠানিকভাৱে অৱসান ঘটিছে।
ফ্ৰান্সৰ ৰাষ্ট্ৰপতি ইমানুৱেল মেক্ৰ‘নে সামাজিক মাধ্যম এক্সৰ জৰিয়তে এই চুক্তি স্বাক্ষৰৰ কথা প্ৰকাশ কৰি কয় যে এই চুক্তিয়ে স্থায়ী শান্তিৰ পথ প্ৰশস্ত কৰাৰ লগতে হৰমুজ প্ৰণালী পুনৰ মুকলি কৰাৰ সুযোগ প্ৰদান কৰিব। শক্তিৰ মূল্য হ্ৰাস কৰাত সহায়ক হ‘বলগীয়া এই পদক্ষেপক তেওঁ দেশবাসীৰ বাবে এক সঠিক আৰু গুৰুত্বপূৰ্ণ পদক্ষেপ হিচাপে আখ্যা দিছে। ইফালে, ইৰাণৰ তৰফৰ পৰাও এই চুক্তিত স্বাক্ষৰ কৰাৰ কথা নিশ্চিত কৰা হৈছে। ইৰাণৰ চৰকাৰী সংবাদ সংস্থা ইৰ্ণাৰ উদ্ধৃতিৰে ইৰাণৰ বৈদেশিক মন্ত্ৰালয়ৰ মুখপাত্ৰ ইছমাইল বাকাইয়ে জনাইছে যে ৰাষ্ট্ৰপতিসকলৰ স্বাক্ষৰৰ জৰিয়তে ইছলামাবাদ বুজাবুজি চুক্তিৰ পাঠ চূড়ান্ত কৰা হৈছে আৰু এতিয়া এই চুক্তিৰ ৰূপায়ণ পৰীক্ষা কৰাৰ সময় আহি পৰিছে।
দেওবাৰে ৰাষ্ট্ৰপতি ট্ৰাম্পে প্ৰথমবাৰৰ বাবে এই চুক্তিৰ কথা ঘোষণা কৰাৰ পাছত ইয়াৰ স্বচ্ছতাক লৈ ৰাজহুৱা হেঁচা বৃদ্ধি পাইছিল। ইয়াৰ পৰিপ্ৰেক্ষিতত বুধবাৰে আমেৰিকাৰ বিষয়াসকলে এক কনফাৰেঞ্চ কলৰ জৰিয়তে চুক্তিখনৰ পাঠ ৰাজহুৱা কৰে। আনুষ্ঠানিকভাৱে আমেৰিকা যুক্তৰাষ্ট্ৰ আৰু ইছলামিক ৰিপাব্লিক অৱ ইৰাণৰ মাজত ইছলামাবাদ বুজাবুজি চুক্তি হিচাপে নামকৰণ কৰা এই নথিখনে লেবাননকো সামৰি সকলোবোৰ সামৰিক অভিযান তাৎক্ষণিক আৰু স্থায়ীভাৱে বন্ধ কৰাৰ আহ্বান জনাইছে।
চুক্তিৰ চৰ্ত অনুসৰি, আমেৰিকা যুক্তৰাষ্ট্ৰই ত্ৰিশ দিনৰ ভিতৰত ইৰাণৰ ওপৰত আৰোপ কৰা নৌ-অৱৰোধ প্ৰত্যাহাৰ কৰিবলৈ প্ৰতিশ্ৰুতিবদ্ধ হৈছে আৰু এই সময়ছোৱাত জাহাজৰ চলাচল যুদ্ধৰ পূৰ্বৰ পৰ্যায়লৈ ঘূৰি আহিব বুলি আশা কৰা হৈছে। ইয়াৰ উপৰি, চূড়ান্ত চুক্তি সম্পন্ন হোৱাৰ ত্ৰিশ দিনৰ ভিতৰত আমেৰিকাই ইৰাণৰ আশে-পাশে থকা নিজৰ সামৰিক বাহিনী প্ৰত্যাহাৰ কৰিব। আনহাতে, ইৰাণে পৰৱৰ্তী ষাঠি দিনৰ বাবে কোনো মাচুল নোহোৱাকৈ বাণিজ্যিক জাহাজসমূহৰ সুৰক্ষিত যাতায়াতৰ বাবে সৰ্বোত্তম প্ৰয়াস কৰিব বুলি চুক্তিত উল্লেখ আছে।
এই চুক্তি স্বাক্ষৰিত হোৱাৰ লগে লগে আমেৰিকা আৰু ইৰাণে চূড়ান্ত চুক্তিৰ চৰ্তসমূহ আলোচনা কৰিবলৈ ষাঠি দিনৰ সময় লাভ কৰিব। প্ৰথমে এই আনুষ্ঠানিক স্বাক্ষৰ পৰ্ব শুকুৰবাৰে চুইজাৰলেণ্ডত অনুষ্ঠিত হোৱাৰ কথা আছিল যদিও শেহতীয়াকৈ ইৰাণে জানিবলৈ দিয়া মতে, জেনেভাত অনুষ্ঠিত হ‘বলগীয়া পৰৱৰ্তী বৈঠকখন পূৰ্বৰ নিৰ্ধাৰিত সূচী অনুসৰিয়েই আগবাঢ়িব। অনাগত সময়ত দুয়োখন দেশৰ মাজৰ এই বুজাবুজিয়ে মধ্যপ্ৰাচ্যৰ পৰিস্থিতি স্বাভাৱিক কৰাত নিৰ্ণায়ক ভূমিকা গ্ৰহণ কৰিব বুলি আশা কৰা হৈছে।
