আমেৰিকা চৰকাৰৰ পুঁজিৰ অভাৱত নাছাই অভিযান বন্ধ কৰি দিয়াৰ কথা ঘোষণা কৰিছে। এক বিবৃতিত কোৱা হৈছে যে পৰৱৰ্তী জাননী নিদিয়ালৈকে সংস্থাটো বন্ধ থাকিব। ২০২৫ চনৰ ১ অক্টোবৰত আমেৰিকাৰ সংসদে (কংগ্ৰেছ) বাজেট বা অস্থায়ী পুঁজিৰ সৈতে জড়িত কোনো বিধেয়ক গৃহীত নকৰাৰ বাবে আমেৰিকা চৰকাৰ স্থবিৰ হৈ পৰাৰ পিছত এই পৰিস্থিতিৰ সৃষ্টি হয়।
প্ৰায় ছবছৰৰ ভিতৰত প্ৰথমবাৰৰ বাবে এনে স্থবিৰতাৰ বাবে নাছাকে ধৰি বিভিন্ন চৰকাৰী সংস্থাৰ হাজাৰ হাজাৰ ফেডাৰেল কৰ্মচাৰীয়ে বাধ্যতামূলক ছুটী ল’বলগীয়া হৈছে। চৰকাৰী নিৰ্দেশনা অনুসৰি জীৱন আৰু সম্পত্তিৰ সুৰক্ষাৰ বাবে প্ৰয়োজনীয় অত্যাৱশ্যকীয় কৰ্মচাৰীয়েহে কাম অব্যাহত ৰাখিছে। অৰ্থাৎ মহাকাশ বিজ্ঞানৰ গৱেষণাৰ পৰা আৰম্ভ কৰি সাধাৰণ জনতাৰ মাজলৈ যোৱালৈকে নাছাৰ প্ৰায়বোৰ প্ৰকল্প বৰ্তমান স্থগিত ৰখা হৈছে।
নাছাৰ দৈনিক যোগাযোগ বন্ধ হৈ আছে; বৰ্তমান তেওঁলোকৰ মিছন স্থগিত ৰখা হৈছে। আপডেট প্ৰকাশ কৰা হোৱা নাই। অৱশ্যে গুৰুত্বপূৰ্ণ কাম-কাজ চলাই ৰখা হৈছে। ইয়াৰ ভিতৰত আছে আন্তঃৰাষ্ট্ৰীয় মহাকাশ কেন্দ্ৰ (আই এছ এছ)ত থকা মহাকাশচাৰীসকলক নিৰীক্ষণ কৰা, সমগ্ৰ সৌৰজগতত বৰ্তমান চলি থকা মহাকাশযানসমূহ নিৰীক্ষণ কৰা, গ্ৰহ প্ৰতিৰক্ষাৰ কাম যেনে গ্ৰহাণু পৰ্যবেক্ষণৰ কাম আদি অন্যতম।
বন্ধৰ ফলত নাছাৰ কাৰ্যসূচী আৰু ভৱিষ্যতৰ অভিযানৰ ক্ষেত্ৰত সুদূৰপ্ৰসাৰী প্ৰভাৱ পৰিব পাৰে। মানুহ চন্দ্ৰলৈ পুনৰ পঠিওৱাৰ পৰৱৰ্তী পদক্ষেপ যেনে আৰ্টেমিছ প্ৰগ্ৰেমৰ প্ৰস্তুতি পলম হ’ব পাৰে। নাছাৰ পুঁজিৰে চলি থকা গৱেষণা প্ৰকল্পসমূহ স্থগিত ৰখা হৈছে, যাৰ ফলত বৈজ্ঞানিক গৱেষণা আৰু বিশ্ববিদ্যালয়ৰ সহযোগিতাত বাধাৰ সৃষ্টি হৈছে। যদিহে চৰকাৰী পুঁজিৰ এই দীৰ্ঘদিনীয়া অভাৱ অব্যাহত থাকে তেন্তে নাছাৰ সৈতে কাম কৰা সংস্থাসমূহো ব্যাঘাতৰ সন্মুখীন হ’ব পাৰে।
ৱাশ্বিংটনৰ এই অচলাৱস্থা যিমানেই বেছি দিন থাকিব সিমানেই নাছাৰ বাবে চন্দ্ৰ অভিযান আৰু মংগল গ্ৰহলৈ অভিযানৰ দৰে অভিলাষী লক্ষ্যৰ ওপৰত গতি বজাই ৰখাটো কঠিন হ’ব। কোনো স্পষ্ট সমাধানৰ দৃষ্টিগোচৰ নোহোৱাত নাছা বন্ধই এক কঠিন পৰিস্থিতিৰ সৃষ্টি কৰিছে।
ইয়াৰ পৰা স্পষ্ট হৈ পৰে যে ৰাজনৈতিক অচলাৱস্থাই বিজ্ঞান আৰু মহাকাশ অন্বেষণক কেনেদৰে প্ৰত্যক্ষভাৱে প্ৰভাৱিত কৰিব পাৰে! এতিয়াৰ বাবে সংস্থাটোৰ বৃহৎ সংখ্যক কৰ্মচাৰীয়ে পৰৱৰ্তী ঘোষণাৰ বাবে অপেক্ষা কৰি আছে। মহাকাশচাৰী আৰু মহাকাশযান উভয়ৰে সুৰক্ষা সুনিশ্চিত কৰিবলৈ মনে মনে কাম কৰি আছে।
অৱশ্যে এনে নহয় যে নাছাই আগতে এনে সমস্যাৰ সন্মুখীন হোৱা নাই। ২০১৮-২০১৯ চনত উল্লেখযোগ্য বন্ধকে ধৰি পূৰ্বৰ অচলাৱস্থাইও বিভিন্ন প্ৰকল্পৰ অগ্ৰগতিত বাধাৰ সৃষ্টি কৰাৰ লগতে সংস্থাটোৰ বিজ্ঞানী আৰু অভিযন্তাসকলৰ মাজত অনিশ্চয়তাৰ সৃষ্টি কৰিছিল।
