কৰ’নাৰ সংকটৰ মাজতে ট্ৰাম্পৰ ডাঙৰ সিদ্ধান্ত; আমেৰিকাত বাহিৰৰ লোকৰ বসবাসত নিষেধাজ্ঞা

কৰ’না বাইৰাছৰ বিৰুদ্ধে মৰণপন যুঁজ চলাই থকা আমেৰিকাই দেশত বাহিৰৰ লোকক ৰখা (ইমিগ্ৰেশ্যন) বন্ধ কৰিলে। আমেৰিকাৰ ৰাষ্ট্ৰপতি ডোনাল্ড ট্ৰাম্পে মঙলবাৰে পুৱা এই ডাঙৰ সিদ্ধান্তৰ কথা ঘোষণা কৰে।

আমেৰিকাত এতিয়া পৰৱৰ্তী নিৰ্দেশ নিদিয়ালৈকে কোনো বাহিৰা লোকক বসবাস কৰাৰ অনুমতি দিয়া নহয়।

ডোনাল্ড ট্ৰাম্পে এই ঘোষণা তেওঁৰ টুইটাৰ একাউন্টৰ জৰিয়তে সদৰী কৰিছে।

কৰ’না সংকটৰ ফলত দেশত উদ্ভৱ হোৱা অৰ্থনৈতিক পৰিস্থিতিৰ বাবেই ৰাষ্ট্ৰপতিগৰাকীয়ে এনে সিদ্ধান্ত লোৱা বুলি ব্যক্ত কৰিছে।

ট্ৰাম্পে মঙলবাৰে ৰাতিপুৱা টুইট কৰি কয়,’’অদৃশ্য শত্ৰুৰ আক্ৰমণৰ কাৰণে যি পৰিস্থিতিৰ সৃষ্টি হৈছে, তাত আমাৰ মহান আমেৰিকাৰ নাগৰিকসকলৰ চাকৰি বৰ্তাই ৰাখিব লাগিব। তালৈ চাই মই এক নিৰ্দেশত স্বাক্ষৰ কৰিলো,য’ত আমেৰিকাৰ বাহিৰৰ লোকক বসবাস কৰাত নিষেধাজ্ঞা অনা হৈছে।‘’

ইয়াৰ পৰা স্পষ্ট যে পৰৱৰ্তী নিৰ্দেশ নহা পৰ্যন্ত কোনো বিদেশী নাগৰিকে আমেৰিকাৰ নাগৰিক হ’ব নোৱাৰিব নাইবা ইয়াৰ বাবে আবেদন কৰিব নোৱাৰিব।

In light of the attack from the Invisible Enemy, as well as the need to protect the jobs of our GREAT American Citizens, I will be signing an Executive Order to temporarily suspend immigration into the United States!

— Donald J. Trump (@realDonaldTrump) April 21, 2020

বিশ্বৰ বিভিন্ন প্ৰান্তৰ পৰা লোক আমেৰিকাত চাকৰি তথা ব্যৱসায়ৰ বাবে যায় আৰু কিছুদিনৰ পাছত তাৰ নাগৰিকত্বৰ বাবে আবেদন কৰে।

লেটিন আমেৰিকা, য়ুৰোপৰ বহু লোক আমেৰিকাত থকাৰ উপৰি ভাৰতকে ধৰি এছিয়াৰ দেশসমূহৰ পৰাও যোৱা বহু লোক আমেৰিকাত আছে।

ডোনাল্ড ট্ৰাম্পে এতিয়া যিকোনো প্ৰকাৰৰ ইমিগ্ৰেশ্যনত নিষেধাজ্ঞা জাৰি কৰিছে। অৱশ্যে, এই নিষেধাজ্ঞা এতিয়া অস্থায়ীৰূপে কৰা হৈছে।

উল্লেখযোগ্য যে কৰ’না ভাইৰাছৰ মাৰাত্মক সংক্ৰমণৰ ফলত আমেৰিকা এতিয়া বৃহৎ সংকটত পৰিছে। দেশখনত এই সময়ছোৱাত ১কোটিতকৈয়ো অধিক লোকে চাকৰি হেৰুৱাইছে আৰু নিবনুৱাই লাভ কৰিব লগীয়া সুবিধাৰ বাবে আবেদন কৰিছে। তদুপৰি, দেশখনৰ বাণিজ্য ক্ষেত্ৰতো সংকটে দেখা দিছে।

আমেৰিকাত চলিত বছৰতে হ’বলগীয়া ৰাষ্ট্ৰপতি পদৰ নিৰ্বাচনলৈ লক্ষ্য কৰি আমেৰিকান নাগৰিকসকলক সন্তষ্ট কৰাটো ডোনাল্ড ট্ৰাম্পৰ বাবে অপৰিহাৰ্য হৈ পৰিছে।