ভেনিজুৱেলাত আমেৰিকাই চলোৱা সামৰিক আক্ৰমণক তীব্ৰ ভাষাৰে গৰিহণা দিছে ভাৰতৰ বাওঁপন্থী দলসমূহে। এই আক্ৰমণক ‘সাম্ৰাজ্যবাদী আগ্ৰাসন’ বুলি অভিহিত কৰি বাওঁপন্থী শক্তিসমূহে অভিযোগ কৰিছে যে ইয়াৰ মূল লক্ষ্য হৈছে ভেনিজুৱেলাৰ বিশাল তেল সম্পদৰ ওপৰত নিয়ন্ত্ৰণ স্থাপন কৰা। এই আগ্ৰাসন ৰোধ কৰিবলৈ বিশ্বজুৰি জনমত গঠন কৰাৰো আহ্বান জনাইছে দলসমূহে।
ভাৰতীয় কমিউনিষ্ট পাৰ্টি (মাৰ্ক্সবাদী), চমুকৈ চিপিআই(এম)-এ ভেনিজুৱেলাৰ বিভিন্ন স্থানত আমেৰিকাই কৰা বোমাবৰ্ষণক এক ‘প্ৰকাশ্য আগ্ৰাসন’ বুলি অভিহিত কৰিছে। দলটোৰ মতে, এই আক্ৰমণসমূহ আমেৰিকাৰ ২০২৫ চনৰ ৰাষ্ট্ৰীয় নিৰাপত্তা কৌশল আৰু লেটিন আমেৰিকাত আধিপত্য বিস্তাৰৰ নীতিৰেই এক অংশ। ইয়াক তথাকথিত “মন্ৰো মতবাদ”ৰ (Monroe Doctrine) আধুনিক ৰূপ বুলি আখ্যা দি চিপিআই(এম)-এ ৰাষ্ট্ৰসংঘৰ নিৰাপত্তা পৰিষদক (UNSC) এই কাৰ্যৰ গৰিহণা দিয়াৰ লগতে লেটিন আমেৰিকাক ‘শান্তিৰ অঞ্চল’ হিচাপে ঘোষণা কৰিবলৈ দাবী জনাইছে।
চিপিআই(এমএল) লিবাৰেশ্যনে অভিযোগ কৰা মতে, ইৰাকত কৰা হস্তক্ষেপৰ দৰেই একে অজুহাত ব্যৱহাৰ কৰি তেল সমৃদ্ধ ভেনিজুৱেলাত ‘শাসন পৰিৱৰ্তন’ কৰিবলৈ আমেৰিকাই চেষ্টা চলাইছে। আমেৰিকাই সমৰ্থন কৰা ‘পুতলা চৰকাৰ’ স্থাপন আৰু ৰাষ্ট্ৰপতি নিকোলাছ মাদুৰোক বন্দী কৰাৰ আহ্বানকো দলটোৱে তীব্ৰ ভাষাৰে নাকচ কৰে। গুৱেটামালা আৰু পানামাৰ ইতিহাস সোঁৱৰাই দি দলটোৱে ভেনিজুৱেলাৰ জনসাধাৰণৰ সৈতে সংহতি প্ৰকাশ কৰিছে।
চিপিআই-য়ে এই সামৰিক আক্ৰমণক ৰাষ্ট্ৰসংঘৰ চনদ আৰু আন্তঃৰাষ্ট্ৰীয় আইনৰ চৰম উলংঘা বুলি অভিহিত কৰিছে। দলটোৰ মতে, আমেৰিকাই ‘বলিভাৰিয়ান বিপ্লৱ’ দমন কৰাৰ নামত আচলতে দেশখনৰ তেল আৰু খনিজ সম্পদৰ ওপৰত চকু দিছে। চিপিআই-য়ে ভাৰতকে ধৰি বিশ্বৰ শান্তিপ্ৰেমী শক্তিসমূহক ভেনিজুৱেলাৰ সাৰ্বভৌমত্বক সমৰ্থন কৰিবলৈ আহ্বান জনায়।
