আমেৰিকা যুক্তৰাষ্ট্ৰৰ এখন চৰকাৰী আয়োগে ভাৰতৰ ৰাষ্ট্ৰীয় স্বয়ংসেৱক সংঘ অৰ্থাৎ আৰ এছ এছ আৰু ভাৰতৰ বাহ্যিক চোৰাংচোৱা সংস্থা ৰিচাৰ্চ এণ্ড এনালাইচিছ উইং বা ৰ’ৰ ওপৰত কঠোৰ নিষেধাজ্ঞা আৰোপ কৰিবলৈ পৰামৰ্শ দিছে। ধৰ্মীয় স্বাধীনতা উলংঘাৰ অভিযোগত আমেৰিকাৰ আন্তৰ্জাতিক ধৰ্মীয় স্বাধীনতা আয়োগে বা ইউ এছ চি আই আৰ এফ-এ তেওঁলোকৰ ২০২৬ চনৰ বাৰ্ষিক প্ৰতিবেদনত এই পৰামৰ্শ আগবঢ়াইছে। প্ৰতিবেদনখনত লগতে ভাৰতক ধৰ্মীয় স্বাধীনতাৰ ক্ষেত্ৰত উদ্বেগজনক দেশৰ তালিকাত অন্তৰ্ভুক্ত কৰিবলৈও কোৱা হৈছে।
আয়োগৰ প্ৰতিবেদন অনুসৰি, ধৰ্মীয় স্বাধীনতা উলংঘাৰ বাবে দায়ী ব্যক্তি বা প্ৰতিষ্ঠানৰ সম্পত্তি জব্দ কৰা আৰু তেওঁলোকৰ আমেৰিকা ভ্ৰমণত নিষেধাজ্ঞা আৰোপ কৰাৰ পৰামৰ্শ দিয়া হৈছে। ইয়াৰ উপৰি আমেৰিকা চৰকাৰক ভাৰতৰ সৈতে থকা প্ৰতিৰক্ষা সাহায্য আৰু বাণিজ্য নীতি ধৰ্মীয় স্বাধীনতাৰ সৈতে জড়িত কৰিবলৈ কোৱা হৈছে। ইয়াৰ জৰিয়তে আমেৰিকাই ভাৰতলৈ হথিয়াৰ ৰপ্তানি বন্ধ কৰাৰ বাবেও হেঁচা প্ৰয়োগ কৰাৰ সম্ভাৱনা আছে।
এই প্ৰতিবেদনৰ পাছতে কংগ্ৰেছে তীব্ৰ প্ৰতিক্ৰিয়া প্ৰকাশ কৰিছে। দলটোৱে আৰ এছ এছক দেশৰ ঐক্য আৰু ভাতৃত্ববোধৰ বাবে বিপদজনক বুলি অভিহিত কৰিছে। কংগ্ৰেছে মহাত্মা গান্ধীৰ হত্যাকাণ্ডৰ পাছত চৰ্দাৰ পেটেলৰ দ্বাৰা আৰ এছ এছক নিষিদ্ধ কৰাৰ কথা পুনৰ সোঁৱৰাই দিছে। লগতে দলটোৱে অভিযোগ কৰিছে যে এই সংগঠনটোৱে সংবিধান বিৰোধী কাম-কাজ চলাই আছে আৰু দেশখন মনুস্মৃতিৰ দ্বাৰা পৰিচালিত কৰাৰ পক্ষত থিয় দিছে।
আনহাতে, ভাৰত চৰকাৰৰ বৈদেশিক পৰিক্ৰমা মন্ত্ৰালয়ে এই প্ৰতিবেদনক সম্পূৰ্ণৰূপে নাকচ কৰিছে। চৰকাৰী মুখপাত্ৰ ৰণধীৰ জয়ছোৱালে কয় যে এই প্ৰতিবেদন পক্ষপাতদুষ্ট আৰু উদ্দেশ্যপ্ৰণোদিত। তেওঁ লগতে উল্লেখ কৰে যে আমেৰিকাত হিন্দু মন্দিৰৰ ওপৰত হোৱা আক্ৰমণ আৰু ভাৰতীয় প্ৰব্ৰজনকাৰীসকলৰ নিৰাপত্তাৰ বিষয়টোতহে আয়োগে গুৰুত্ব দিয়া উচিত। ভাৰত চৰকাৰে এনে প্ৰতিবেদনক কেৱল ভাৰতৰ বিৰুদ্ধে একপাক্ষিক প্ৰচাৰ বুলি গণ্য কৰি আহিছে।
প্ৰতিবেদনখনত যোৱা বৰ্ষত ভাৰতত ধৰ্মীয় স্বাধীনতাৰ অৱনতি ঘটাৰো অভিযোগ কৰা হৈছে। ইয়াৰ ভিতৰত ধৰ্ম পৰিৱৰ্তন বিৰোধী আইন, ৱাকফ সংশোধনী বিধেয়ক আৰু বিভিন্ন ঠাইত ধৰ্মীয় সংখ্যালঘুৰ ওপৰত হোৱা আক্ৰমণৰ কথা উল্লেখ আছে। লগতে কাশ্মীৰত হোৱা আক্ৰমণ আৰু তাৰ পৰৱৰ্তী পৰিস্থিতিৰ কথাও প্ৰতিবেদনত সামৰি লোৱা হৈছে। অৱশ্যে ভাৰতে এনে ধৰণৰ অভিযোগক ভিত্তিহীন বুলি স্পষ্ট কৰি দিছে।
